Wegɔɔnle 19 - Kazambale lé Sebe Sauunu 1979

¹ ’Bɛ zuo, maa vun do ’ma la gi bélé mi gu blɛn dére plɛplɛ zo, ’té éé siaan léé: Aléluya! Mi sile we gi koo, tɔbɔle koo, plɛplɛ koo, wa kolé Bale zé nya;

² naa, alé weblelenu a webozen valé we tegele nya; gɔnégini le baba lé, é tɛrɛ sɛrɛ élé pɛnpɛnnégyɛle nya, é alé we ble, yé ’é wuomunu nyɛ lɛgi pa a ma.

³ Yé wo siaa a gɔnɔ fiézan nya léé: Aléluya! Alé kyɛgoi éé nwaan lɛɛfaama, a glɛ ’ka dɔa lo.

⁴ Yé mi segele yɔ do wɔlɛ ziɛn valé fɛ yuɛmale ziɛn dia ’wo bli la yé wo webleblin ta Bale bɔ yé wo siaa léé: Amɛɛn! Aléluya!

⁵ Yé dére do si webleblin va yé é léé: ’Ka kozé Bale tɔ zin fe; ’kaa a wuozannu faa, ka lé ka kanaan a lee, mi kiénénu valé mi blɛnnu, ’ka kolé Bale tɔ zin fe.

’Blané lé lesile lé fɛti

⁶ Yé maa vun do ’ma bélé mi gu blɛn dére zo, bélé ’yi blɛnnu vun zo, bélé zagele blɛnnu banle zo, yé é siaa léé: Aléluya! Mizan, kozé Bale, Plɛplɛfaazan, é a é plale munu nwiin sin.

⁷ Kaa gi ’é nana ma, yé kaa vo gi nanale blɛn gi ma, kaa a tɔ bɔ ma; naa, Blané lé lesile bɔ yé a na ma’lɛrɛle nyaa,

⁸ yé wa se kɛlɛ lezan lɛ léé, ’é lɛnsɔ zima nyananyana gibɔle zén ’é ta. Naa, lɛnsɔ a Kazambale lé munu kɛlɛwe tegelenu nya.

⁹ Yé lanje lé an lɛ léé: ’Bé gyɛ sɛbɛ gi léé: Munu lé wo wo laa ’Blané lé lesile lé fɛti kɛlɛle ma, wozé a é zima. Yé é lé an lɛ léé: Dére ’konu a Kazambale dére bozennu nya.

¹⁰ Yé maa dia a gane ma a bɔle we gi, naa, é lé an lɛ léé: Té bé kɛlɛ lo. Bii valé i bwenu lé woo Jézu lé we fé, maa a ka vazan do nya. ’I Kazambale ɛ bɔ. Jézu lé we a balelawefele pun nya.

Wisoo fu tazan

¹¹ A zuo maa la lɛ ye é sole yé bé ye, wisoo fu bɔra. Wo atazan laama yarapawelazan valé webozen, yé éé we blé tegele ’té éé guli daan tegele.

¹² A yuɛnu a bélé kyɛnɛnɛ zo; tɔkoro kiɛre a a ’wuo ma; yé wa tɔ gyɛ, tɔ lé dé é ’ka yeebozen nya lo, mi do kpen ’ka a dɔɔa lo, a nya.

¹³ Sɔ lé wa vɔ nyɛ va, é a é zénle a ta. A tɔ lé, Bale Dére.

¹⁴ Lai sunyanu da a zuo wisoonu ta, lɛnsɔ zima fu gibɔle nya ’wo ta.

¹⁵ Gwɔun ’lɛzan do bɔra a ’léé, bɛnnu gyɛfɛ nya; é dan pla lɛ wo nwiin foliɛwɔlɛ nya é lee; yé Plɛplɛfaazan Bale lé bliflile baba lé é ke kana blɛn gi, é dan a zɔn lɛ é gane nya bélé dɔrɔporo zo.

¹⁶ Wo tɔ do gyɛ alé sɔ valé a boro ta léé: Minwiinzannu Nwiinzan, Mizannuzan.

¹⁷ Yé maa lanje do ye é dɔle yiri ta. Yé é siaa dére plɛplɛ nya yé mianénu faa lé wo ke sina la worona, é lé wo lɛ léé: ’Ka daoo, ka da! ’Ka zén ékeva Kazambale lé fɛti blɛn kɛlɛle we ma,

¹⁸ minwiinzannu koo, sunyazannu koo, mi plɛplɛnu koo, wisoonu valé ’wotazannu koo, munu faa, miné valé luunu, mi kiénénu valé mi blɛnnu, wo faa koo, yé ’ka wo wi ble.

¹⁹ Wi koo, tɛrɛ la minwiinzannu valé ’wolé sunyanu koo, maa wo ye é zénle ékeva gulidanle we gi wisootazan valé ’élé sunyanu va.

²⁰ Wo wi kun, ’é valé viébalelayezan lé é we blɛnblɛnnu kɛlɛ wi yuɛ va, yé munu lé wo wi lé tɔmase si yé wo dia ’wo bli la a yili ’lɛ, ’té éé wo saan élé we blɛnblɛn kɛlɛle nya bɛ, wo ’bɛ kun, yé kyɛ lé ke blɛn bélé gyankyɛ zo, ’té wo povun zén a va, wo wo fiénu vuli a va, ’té wa é yuɛma.

²¹ Yé wisootazan mi pɔnénu gyɛ gwɔun lé é bɔra a ’léé, a nya; yé mianénu faa kan wo wi nya.