Wegɔɔnle 18 - Kazambale lé Sebe Sauunu 1979

Babilɔn guru zana a gi

¹ ’Bɛ zuo maa lanje do ye sina la gi; é a mi plɛplɛ nya yé alé fuasan tɛrɛ ta kini.

² É siaa dére plɛplɛ nya yé é léé: A guru zana a gioo, a guru zana a gi, fla blɛn Babilɔn guru zana a gi! É kinin yonu nyanana nya, yé yo tiridɔlenu faa koo, miané tiridɔle ginzannu faa koo, é kinin wo zénna ékeva nya;

³ bɛnnu faa alé pɛnpɛnnégyɛle baba mini bélé nwɛ zo, yé tɛrɛ la minwiinzannu ’wobo nɔ pɛnpɛnnégyɛle lɛ a va, yé tɛrɛ la yaawomunu fua ble alé fuafɛ kiɛre kiɛre nya, azama.

⁴ Maa dére do ’ma la gi é ziin yé é léé: Anlé munu, ’ka si fla ’ko la, dé ka da pa a va alé wenyané kɛlɛle gi, yé bawurumagyɛ lé é dan a gyɛ lɛ bɛ, dé é da vɔ ka ma.

⁵ Naa, alé wenyané gi gyɛ fɔɔ yé é bɔ la gi, yé alé weplenu sele dɔ Kazambale gi.

⁶ ’Ka a banwo bélé fɛan zo lé éé mi banwoo, a zo, yé ’ka a nɔ a lɛ gɔnɔ fié a kɛlɛwenu yɛrama. Kana lé, é fɛ zén a gi, ’ka azé zén a gi gɔnɔ fié.

⁷ Fɛan zo lé ébo tɔ kɛlɛ blɛn yé ébo nɔ fua kiɛre blele lɛ, a zo duo lé ’ka nyanéblele kaii valé gyɛbole nɔ a lɛ. Naa, é lé é bli gi léé, ’é a mi nwiin le nya é nyanale, ’é ’ka gyɛzara le nya lo, yé ’é ka dan gyɛ bo lɛ monomono lo.

⁸ Bɛwemalé, yi do nya bawurumawe ’konu é dan bɔ lɛ a ma: ga koo, gyɛbole koo, lɔrɔ koo, woo lé, yé a kyɛ é dan ble lɛ. Mizambale lé, é alé we ble, é a plɛplɛ.

⁹ Yé tɛrɛ la minwiinzannu faa lé, wo ’wobo nɔ pɛnpɛnnégyɛle valé fua kiɛre blele lɛ a va, dé wa kyɛblele goi ye, wo dan wuvɔ lɛ yé wo dan a gyɛ bo lɛ.

¹⁰ Wo dan dɔ lɛ baa, kanale alé nyanéblele lee we ma, yé wo dan a fe lɛ léé: Yuuu! An bu loo! Fla blɛn Babilɔn, fla plɛplɛ! Ilé we nyaa ’bɛ zo bléyi do nyaa?

¹¹ Mi do kpen ’ka bɔa fɛ lɔle lɛ ana é dɛrɛ lo, amalé tɛrɛ la yaawomunu éé wuvɔa, ’té wa gyɛ boo.

¹² Kyan koo, gɔɔlifu koo, gɔlɛwezannu koo, pɛrɛlnu koo, lɛnsɔ zima koo, galunaa sɔ koo, lasɔané sɔ koo, sɔ sɔɔn koo, yili gin néné gɔnɔ faa koo, fɛ gɔnɔ faa lé wa kɛla vwii suiɛ nya koo, fɛ gɔnɔ faa lé wa kɛla yiliwezan valé zéné valé foliɛwɔlɛ valé gɔlɛ plɛplɛ nya koo,

¹³ zian pun kanɛl koo, lia ginzannu koo, lasikɔrɔ koo, miré koo, lasikɔrɔpo koo, dɔrɔ koo, nyɔnɔ koo, burupun zima koo, buruwɔlɛ koo, dirinu valé ’blanu koo, wisoonu valé wisoogoronu koo, munu kɔlɛnu valé wo boennu koo, wo ’ka dan yaawo lɛ wo do kpen nya ana é dɛrɛ lo, amalé wa wuvɔna.

¹⁴ Tɔnɔyefɛ lé i bli bɔ wo ma, wo si i ma baa; ’léé néné fɛ zima faa san i lee, yé i ’ka dan wo ye lɛ é dɛrɛ lo.

¹⁵ Munu lé woo yaawoo fɛ ’konu nya yé wo fua ble fla ’ko ta, wo dan dɔ lɛ baa, kanale alé nyanéblele lee we ma, yé wo dan wuvɔ lɛ, yé wo dan a gyɛ bo lɛ yé wo dan a fe lɛ léé:

¹⁶ Yuuu! An bu loo! Fla blɛn lé, lɛnsɔ zima koo, galunaa sɔ koo, sɔ sɔɔn koo, wo ke a ta, ’té é ke é ’lɛrɛle kyan koo, gɔlɛwezannu koo, pɛrɛlnu koo, wo nya! Fua ’ko zo sɛrɛ ’bɛ zo bléyi do nyaa?

¹⁷ ’Yitagoro vɔzannu koo, munu faa lé woo tawoo ’yitagoronu gi koo, ’yitagoro gi nyanamapamunu koo, wɛyi ta yaawomunu koo, wa é dɔle baa,

¹⁸ yé wo siaa a kyɛblele goi yele we ma, yé wo léé: Fla blɛn dan?-?mafla lé é ke fla kyɛn nyaa?

¹⁹ Yé wo tɛrɛ zén ’wo nwiin, yé wo wuvɔ yé wa gyɛ bo, yé wo siaa yé wo léé: Yuuu! An bu loo! Fla blɛn lé, ’yitagorozannu faa fua ble alé fuafɛ kiɛre we ma ’naan, yee ɛ sɛrɛ ’bɛ zo bléyi do kpen nya, yé ana vo é ’bin nyaa?

²⁰ La, i gi ’é nana a sɛrɛle lé we ma ma. Yé ’kaa Kazambale lé munu koo, nwunvɔmunu koo, balelayemunu koo, ka gi ’é nana é ziin ma. Kazambale alé we nyaa a zo, amalé é we tegele kɛlɛ ka lɛ.

²¹ Gɔlɛ blɛn lé é ke bélé fɛzɔngɔlɛ zo, lanje plɛplɛ do a si yé é a vuli wɛyi va yé é léé: ’Ko zo lé wo dan fla blɛn Babilɔn vuli lɛ plɛplɛ yé wo ’ka dan a ye lɛ é dɛrɛ lo.

²² Kɔnɔ koo, gobé koo, séén koo, béli koo, wo ’ka dan wo dére ’ma lɛ i ta é dɛrɛ lo, yé dé é a blaobla‐an bozan nyaoo, wo ’ka dan wo ye lɛ i ta é dɛrɛ lo, yé wo ’ka dan fɛ zɔnle vun ’ma lɛ i ta é dɛrɛ lo,

²³ kyɛbɔ ’ka dan bi lɛ i ta é dɛrɛ lo, yé wo ’ka dan lesizan valé bosizan dére ’ma lɛ i ta é dɛrɛ lo; ilé yaawomunu kɛlɛ tɛrɛlami blɛnnu nya, yé i bɛnnu faa saan ilé yo kɛlɛlenu nya,

²⁴ yé balelayemunu koo, Kazambale lé munu koo, munu faa lé wo wo bɔrɔ bo tɛrɛ la koo, wo wo nyɛ ye bii Babilɔn ta, ’bɛzama.