Wegɔɔnle 17 - Kazambale lé Sebe Sauunu 1979

Bale gɔnégini le baba lé we ble

¹ ’Bɛ zuo lanje sɔrafié lé, kana sɔrafié ke wo lee, wo vazan do da yé é we fe an lɛ, yé é léé: ’I da, gɔnégini le baba lé é ke é nyanale ’yi blɛnnu ta, alé we é dan nyaa lɛ fɛan zo, maa dan a gɔɔn lɛ i lɛ.

² A va lé tɛrɛ la minwiinmunu ’wobo nɔ pɛnpɛnnégyɛle lɛ, yé alé pɛnpɛnnégyɛle tɛrɛlamunu gyɛ bélé nwɛ zo.

³ An si an pɔlɛ gi yé an nɔla miléli nya yé é go an nya bwi gi. Yé maa le do ye é nyanale wi sɔɔn lé é ke é fanle sɔnɔ tɔnu nya, ’té a ’wuo ke sɔrafié yé a béli ke vu, a ta.

⁴ Galunaa sɔ valé sɔ sɔɔn a le ’ko ta, ’té é a é ’lɛrɛle kyan koo, gɔlɛwezannu koo, pɛrɛlnu koo, wo nya. Kyankana lé é ke é fanle fɛ naanénu valé alé gɔnéginile tiri nya, é a a lee.

⁵ Tɔ do lé a gi ke é yɔɔle, wa gyɛ a yarapɛla léé: Fla blɛn Babilɔn, pɛnpɛnnégyɛzannu valé tɛrɛ la fɛ naanénu bu.

⁶ Yé maa le ’ko ye é gyɛlɛ Kazambale lé munu valé Jézu lé wenayemunu nyɛ nya bélé nwɛ zo. Maa a ye aan wo, an gi vuru é baba.

⁷ Lanje lé an lɛ léé: Mɛmalé i gi vuruu? Le valé wi lé é ke é nyanale a ta, ’té a ’wuo ke sɔrafié yé a béli ke vu bɛ, maa dan wolé weyɔɔle gi bɔra lɛ i lɛ.

⁸ Wi lé bé ye, é ana é kyɛn yé é ’ka ana é dɛrɛ lo. É a lé, ’é si guru lé a wɔlɛ ma nyaana ’ka lo, a gi, yé ’é go mi sanlenu gona. Yé tɛrɛlamunu lé wo ’ka wo tɔ gyɛ lɛ mi bélilenu tɔgyɛlasɛbɛ gi tɛrɛ pélisia bléyi va lo, wo gi é dan vuru lɛ wi ’ko yele ma; naa, é a é kyɛn, yé é ’ka ana é dɛrɛ lo, yé é dan bɔra lɛ é ziin, ’bɛzama.

⁹ Gikini lé é ke wedɔɔle nya, yee lé é ke ’ko: ’wuo sɔrafié a gɔ sɔrafié lé lezan éé nyanaan wo ta, wo nya.

¹⁰ Wa é ziin minwiinzan sɔrafié nya; a soru dia, a do ana, yé a do ’ka tan da lɛ lo, yé dé ’bɛ da é a lé ’bɛ é mɔn sɛ.

¹¹ Wi lé é ke é kyɛn, ’té é ’ka ana é dɛrɛ lo bɛ, yeebozen a minwiinzan sɔraazan nya, yé é a minwiinzan sɔrafié vazan do nya, yé é a gona mi sanlenu gona.

¹² Béli vu lé bé ye, wa minwiinzan vu nya. Wo ’ka tan bɛntɛrɛ ye lɛ lo, naa, wo kɛlɛle minwiinzan nya se kɛlɛ wo lɛ lɛrɛ do nya wi va.

¹³ Wo giwe a do kpen yé woo ’wolé plɛplɛ valé ’wolé se no wi lɛ.

¹⁴ Wo dan guli dan lɛ ’Blané va, yé ’Blané é dan wo kele lɛ; é a Mizannuzan nya yé é a minwiinzannu Nwiinzan nya, azama. Yé a vamunu lé é wo laa, ’té é wo si a va, ’té woo yara paan we la bɛ, ’bɛnu é dan wo kele lɛ é ziin.

¹⁵ Yé é lé an lɛ léé: ’Yinu lé bé ye, ’té gɔnégini le ke é nyanale wo ta bɛ, wa migɔnɔnu koo, mi gunu koo, bɛnnu koo, dérenu koo, wo nya.

¹⁶ Béli vu lé bé ye, wo valé wi, wo dan gɔnégini le za pa lɛ, yé wo dan ’bɛlé fɛnu faa si lɛ, yé wo dan ’bɛ poro lɛ, yé wo dan ’bɛ wi ble lɛ, yé wo dan ’bɛ kyɛ ble lɛ.

¹⁷ We lé Kazambale ’é bɔn‐in dan a ma é kyɛn, é a pa wo bli gi léé, ’wa kɛlɛ, yé wo giwe ’é kɛlɛ do yé wo ’wolé bɛngɔnɔnu nɔ wi lɛ fɔɔ yé Kazambale dérenu lɛ é sɔɔ.

¹⁸ Lezan lé bé ye, é a fla blɛn lé é ke é plale tɛrɛ la minwiinzannu nwiin, a nya.