Wegɔɔnle 14 - Kazambale lé Sebe Sauunu 1979

Mi baa yɔ yaa wɔlɛ vu ta fié lé lɛrɛ

¹ Maa a naginina ’té ’Blané dɔ Siɔn gɔ nwiin, ’té mi baa yɔ yaa wɔlɛ vu ta fié lé, a tɔ valé a Ti tɔ ke é gyɛle wo yarapɛla, wa a va.

² Yé maa dére do ’ma la gi, bélé ’yi blɛnnu vun zo, bélé zagele blɛn banle vun zo; dére lé maa a ’ma, éé wé bélé kɔnɔnu lé munu ke wo gyɛna, wo vun zo.

³ ’Té woo lɛrɛ dɛrɛ vɔa webleblin koo, fɛ yuɛmale ziɛn koo, mi segelenu koo, wo ’lɛ. Yé dé é ’ka mi baa yɔ yaa wɔlɛ vu ta fié lé wo wo tabo tɛrɛ la, wo nya lo, mi do kpen ’ka bɔa lɛrɛ ’ko vɔle lɛ lo.

⁴ Wa munu lé wo ’ka ’wobo tiri dɔ lɛ lomu va lo, wo nya, naa, wo ’ka le dɔɔ lɛ lo; fɛ faa lé ’Blané éé goo ana, woo goo a zuo. Bale wo tabo munu méléna féifɛ bɔrale vinin nya Kazambale valé ’Blané zé nya;

⁵ viédére do kpen ’ka bɔra lɛ wo ’léé lo, naa, gun ’ka wo ma lo.

Lanje yaa lé wefele

⁶ Maa lanje do ye é ziin sina la méléna, ’té Wenéné lé é ’ka nyaan lo, é a a lee, a fele tɛrɛlamunu lɛ we gi, bɛntɛrɛ faa koo, bɛn faa koo, dére faa koo, migɔnɔ faa koo, woo lé.

⁷ É lé dére plɛplɛ nya léé: A bléyi bɔ! Kazambale é dan munu lé we ble lɛ, amalé ’ka kana Kazambale lee ma, yé ’ka a tɔ bɔ ma; la koo, tɛrɛ koo, wɛyi koo, ’yibɔnanu koo, ’ka dia ka bli la wo Kɛlɛzan ’lɛ ma.

⁸ Yé lanje fiézan da a zuo yé ’bɛ léé: Fla blɛn Babilɔn lé élé pɛnpɛnnégyɛle nɔ bɛntɛrɛnu faa lɛ yé é wo gyɛ bélé nwɛ plɛplɛ lé mi gyɛle zo, a guru zana a gioo, a guru zana a gi!

⁹ Lanje yaazan da wo zuo yé ’bɛ lé dére plɛplɛ nya léé: Dé mian é dia é bli la wi valé é yili ’lɛ, yé dé wo tɔmase gyɛ a ma, dé a yarapɛla léé, dé a bɛ ma léé, ana,

¹⁰ yee é ziin, é dan Kazambale lé bliflile mini lɛ bélé nwɛ zo. Bliflile ’ko ’ka é vɔɔle lo, é a Kazambale lé bliflile zéngikana gi, yé azan é dan a mini lɛ, yé é dan nyané ble lɛ kyɛ valé povun kyɛ va, lanje sauunnu valé ’Blané yuɛ va.

¹¹ Yé munu lé wo dia ’wo bli la wi valé é yili ’lɛ, yé mian a tɔ tɔmase ke é gyɛle a ma, wolé nyanéblele goi é dan nwa lɛ lɛɛfaama yé wo ’ka dan flin lɛ bladi nyanadi lo.

¹² Kazambale lé munu lé yara pale we la lé é ke ’ko: woo Kazambale lé bélidɔwenu kɛla, ’té wo bli a Jézu lɛ.

¹³ Yé maa dére do ’ma la gi yé é léé: ’Bé gyɛ léé: É sia bléyi ’ko va, munu lé wo ga Mizan gi, wozé a néné. Kazambale Léli léé: Iin, wa flinna wolé nyanama ma, naa, wo kɛlɛwenu éé goo wo zuo.

Wo tɛrɛ lé fɛ gyɛ

¹⁴ Maa a nagini, ’té lafu do ana, yé mi do lé é ke bélé blami be zo é a é nyanale lafu ta; kyankoro a a ’wuo ma, yé kɔblané ’lɛzan a a lee.

¹⁵ Yé lanje do bɔra Balebangikɔn gi, yé é siaa dére plɛplɛ nya, mi lé é ke é nyanale lafu ta, a lɛ léé: Fɛgyɛbléyi bɔ, tɛrɛlafɛnu tana, bɛwemalé ’i kɔblané gié.

¹⁶ Yé mi lé é ke é nyanale lafu ta, é ’élé kɔblané gié tɛrɛ la, yé é tɛrɛlafɛnu gyɛ.

¹⁷ Yé lanje do bɔra é ziin Balebangikɔn lé é ke la gi, a gi. Kɔblané ’lɛzan do a ’bɛ lee é ziin.

¹⁸ Yé lanje do lé é ke kyɛ nwiinzan nya, é si balebanna gi yé é we fe dére plɛplɛ nya, mi lé kɔblané ’lɛzan ke a lee, a lɛ, yé é lé a lɛ léé: Tɛrɛ la dɔrɔporo tana, amalé ’ilé kɔblané ’lɛzan gié, yé ’bé pannu bɔi.

¹⁹ Yé lanje élé kɔblané gié tɛrɛ la. É tɛrɛ la dɔrɔporo pannu bɔi yé é a zén Kazambale lé bliflile zéngikana blɛn gi.

²⁰ Wo kanagifɛ zɔn ’wo gane nya fla gini ma; yé nyɛ si kana gi yé a guru bɔ fɔɔ wisoo ’léé foliɛwɔlɛnu ma, yé é yoro fɔɔ yé é bɔ kilo wuru do yɔ ziɛn wɔlɛ vu ta suiɛdo.