Wegɔɔnle 13 - Kazambale lé Sebe Sauunu 1979

Wi fié

¹ A zuo, an wi do ye sina wɛyi va, a béli a vu yé a ’wuo a sɔrafié, yé kyankoro vu a a bélinu ta, yé Bale sɔnɔ tɔnu a é gyɛle a wuonu ma.

² Wi lé maa a ye, é a bélé kua zo; yé a ganenu a bélé wi blɛn urisi gane zo, yé a ’léé a bélé golizra ’léé zo. Dragɔn lé plɛplɛ koo, alé webleblin koo, alé se blɛn koo, é wo nɔ wi lɛ.

³ Maa a ’wuo do ye, é tuo yé é a bélé é ga, naa, a tuona nyaa. Yé tɛrɛlamunu faa zén wi zuo a ze vɔle nya.

⁴ Dragɔn ézé plɛplɛ nɔ wi lɛ amalé wo dia ’wo bli la a ’lɛ, yé wo dia ’wo bli la wi ’lɛ é ziin, yé wo léé: Wi ’ko danmazan a kyɛɛn? De ɛ bɔalɛ léé, é guli dan a vaa?

⁵ Yé wo zi nɔ wi lɛ léé, ’é dére blɛnblɛn valé Bale sɔnɔdére fe; yé wa se kɛlɛ a lɛ léé, ’é we kɛlɛ moné yɔ fié wɔlɛ fié nya.

⁶ Yé é ’léé fuo, Kazambale koo, é tɔ koo, élé laikɔn koo, lagimunu koo, wo sɔnɔle we gi.

⁷ Wa se kɛlɛ a lɛ léé, ’é guli dan Kazambale lé munu va yé ’é wo kele. Yé bɛn faa koo, migɔnɔ faa koo, dére faa koo, bɛntɛrɛ faa koo, Bale a pla wo nwiin.

⁸ Tɛrɛlamunu faa é dan dia lɛ ’wo bli la a ’lɛ; ’Blané lé wa gyɛ, tɛrɛlamunu faa lé wo tɔ ’ka é gyɛle alé mibélilenu tɔgyɛlasɛbɛ gi tɛrɛ pélisia bléyi va lo, wo dan dia lɛ yee wi ’ko ’lɛ.

⁹ Mian we ma tɔné ke a ’wuo ma, ’é a ’ma ma.

¹⁰ Dé mian a go yara lé luu gi, ’bɛzan é dan go lɛ luu gi; dé mian a ga gwɔun ’léé yara lé, é a lé ’wo ’bɛzan gyɛ gwɔun nya. Fɛkona lé Kazambale lé munu ’wolé yara pale we la valé ’wolé blipale nagɔɔn‐an.

¹¹ A zuo maa wi bɛ ye bɔrana tɛrɛ gi, a béli fié a ’blané zé zo, yé éé we fé bélé dragɔn zo.

¹² Éé we kɛla wi vininzan lé se faa lé wa kɛlɛ ’bɛ lɛ, a nya, ’bɛ yuɛ va. Wi vininzan lé é tuo yé é a bélé é ga yé a tuona nyaa bɛ, tɛrɛ valé é tamunu dia ’wo bli la a ’lɛ wi fiézan dére ta.

¹³ É we blɛnblɛnnu kɛlɛ fɔɔ yé é kyɛ si la gi yé é zana tɛrɛ va munu yuɛ va.

¹⁴ Yé é tɛrɛlamunu saan, we blɛnblɛnnu lé wa se kɛlɛ a lɛ léé, ’é wo kɛlɛ wi yuɛ va, wo nya, yé é lé tɛrɛlamunu lɛ léé, ’wo miyili nyaa, wi lé wa tuo gwɔun nya yé é vo é yuɛma, a dɔbɛ zo.

¹⁵ Bale se kɛlɛ a lɛ léé, ’é flinle nɔ miyili ’ko lɛ, miyili lé wefele we ma, yé é a kɛlɛ léé, munu lé wo ’ka diaan ’wo bli la yee miyili ’lɛ lo, ’é wo gyɛ yé ’wo ga.

¹⁶ Yé wi fiézan a kɛlɛ léé, mi kiéné valé mi blɛn koo, fuablezannu valé nyanégyɛzannu koo, minénu valé luunu koo, tɔmase ’é kɛlɛ wo faa bɛyi ma, dé ’bɛ kaan lo, ’é kɛlɛ wo yarapɛla,

¹⁷ yé é a kɛlɛ léé, dé é a wi lé tɔmase nyaoo, dé é a wi tɔ nyaoo, dé é a a tɔ nibiéro nyaoo, dé wo do ’ka mian ma lo, é ’ka bɔa fɛ lɔle valé fɛ danle lɛ lo.

¹⁸ Wedɔɔle lé é ke ’ko. Mi lé a ’wuo ke a ta, ’é wi lé nibiéro nɔnɔ ma. Naa, é a gɔné tɔ lé nibiéro nya, yé wi lé nibiéro a 666, ’bɛ gi léé, wuru yaa yɔ yaa wɔlɛ suiɛdo.