Wegɔɔnle 12 - Kazambale lé Sebe Sauunu 1979

Lezan valé dragɔn blɛn

¹ Givuruwe do bɔra la gi: lezan doan ke, yiri a é wole a ma sɔ nya yé moné a a gane wuo yé monéné vu ta fié a a ’wuo ma tɔkoro nya.

² A bɔn a a ma, yé é vɔ lu zi yé é siaa né?-?yaale lé nyanéblele lee.

³ Givuruwe do bɔra la gi é ziin. Dragɔn blɛn sɔɔn doan ke, a ’wuo a sɔrafié yé a béli a vu yé kyankoro sɔrafié a a ’wuo ma.

⁴ Lagi monénénu faa va, dé monéné a yaa, dragɔn woli a do ganaan a va, yé é a vuli tɛrɛ va yé a fié é voo. Yee dragɔn a é dɔle lezan lé é ke né yaana bɛ, a ma, léé, dé é né yaa tɔɔn yé ’é alé né mini.

⁵ Lezan né yaa, gɔné lé é dan pla lɛ bɛnnu faa nwiin foliɛwɔlɛ nya, a nya. Yé wo go alé né nya loru Kazambale valé élé webleblin va.

⁶ Yé lezan vɔ fli gi yé é go bwi gi, fɛna lé Kazambale a ma’lɛrɛ azé nya, ana, yé wo fɛblele nɔ a lɛ ’bɛna yi wuru suiɛdo yi yɔ yaa.

⁷ Gulidanle kɛlɛ la gi. Misɛl valé élé lanjenu guli dan dragɔn va.

⁸ Yé dragɔn valé ézé lanjenu guli dan Misɛlnu va yé wo ’ka mini lɛ Misɛlnu lɛ lo, yé wo nyanana ’ka kɛlɛ lɛ é dɛrɛ la gi lo.

⁹ Dragɔn blɛn, méné kwakwa lé wa laama yonufaatagɔné valé Satan, ’té éé tɛrɛlamunu faa saan bɛ, wa vuli tɛrɛ va, yee valé élé lanjenu nya.

¹⁰ Yé maa dére plɛplɛ ’ma la gi, yé é léé: Bélile koo, kozé Bale lé plɛplɛ valé alé plale munu nwiin koo, alé Krist lé se koo, wo bléyi bɔ sin, naa, ko bwenu tɔfezan, mi lé éé wo tɔ fé kozé Bale lɛ bladi nyanadi, wa vuli, azama.

¹¹ Wa kele ’Blané nyɛ valé wolé wenayedére fele nya, yé wo bli si wobo lɛ léé, ’wo ga.

¹² Bɛwemalé, lanu valé ’wo gi munu, ka gi ’é nana ma. Tɛrɛ valé wɛyi, we kɛlɛ ka lɛ. Naa, yonufaatagɔné zun ka va, yé é a gi dɔɔ léé, ézé bléyi ’ka vo lɛ blɛn lo, amalé a bli a flina é baba.

¹³ Dragɔn a ye aan wo léé, wo ’é vuli tɛrɛ va, lezan lé é négɔné yaa, é a zuo bin.

¹⁴ Wo gola blɛn bɛa fié nɔ lezan lɛ, a sile we gi yé é go ’élé fɛna bwi gi méné lee baa, ana lé wo fɛblele nɔ a lɛ lɛɛ yaa é buu.

¹⁵ ’Yi lé é ke bélé yuu zo, é bɔra méné ’léé, yé é a nwɛɛn lezan zuo, lezan ganale yuu nya we gi.

¹⁶ Yé tɛrɛ bɔ lezan va, yé tɛrɛ ’é lɛ so yé yuu lé dragɔn a bɔra é ’léé yé é a nwɛɛn bɛ, tɛrɛ a mini.

¹⁷ Yé dragɔn bli fli lezan ma, yé é go guli dan lɛ a kulu pɔnénu lé, woo tawoo Kazambale lé bélidɔwenu ta, ’té wo ke Jézu lé wenayezannu nya bɛ, wo va.

¹⁸ Yé é dɔ wɛyi gɔ la nyéné la.