Wegɔɔnle 11 - Kazambale lé Sebe Sauunu 1979

Wenayezannu fié

¹ Wo gyan do nɔ an lɛ bélé fɛ?-?danmayili zo yé wo léé: ’I nwa, Balebangikɔn koo, balebanna koo, munu lé woo Bale bɔa ana koo, ’i go, ’i wo dan a nya ma.

² Naa, wo Balebangikɔn zi gɔrɔ gi nɔ bɛnnu lɛ, amalé ’i ’bɛ vo, té i ’bɛ dan lo, yé bɛnnu é dan fla sauun zɔn lɛ ’wo gane nya moné yɔ fié wɔlɛ fié.

³ Maa dan balelawe fele se kɛlɛ lɛ anlé wenayezannu fié lɛ ’yi wuru suiɛdo yi yɔ yaa, ’té bɔlɔ a wo ta sɔ nya.

⁴ Wo ɛ ke ɔliviyili fié valé fintran fié lé wo ke é dɔle Tɛrɛzan ’lɛ, a nya.

⁵ Dé mian é a a va léé, ’é wenyané kɛlɛ wo lɛ, kyɛ éé sié wo ’léé yé éé wo nyanézannu blé; iin, dé mian é a a va léé, ’é wenyané kɛlɛ wo lɛ, a zo lé wo dan a gyɛ lɛ.

⁶ A se a wo lɛ léé, wo la lɛ tan, té lɛɛ é da wolé balelawefe yinu ta lo we gi; yé dé é sɔ wo lɛ léé, ’wo ’yinu nɔla nyɛ nya bléyioo bléyian va, a se a wo lɛ; dé é sɔ wo lɛ léé, ’wo tɛrɛ gyɛ migyɛgyɛ gɔnɔ faa nya bléyioo bléyian va, a se a wo lɛ.

⁷ Dé wolé wenayedére fele lɛ sɔɔ, wi lé é dan si lɛ guru gi, é dan guli dan lɛ wo va yé é wo kele, yé é wo gyɛ.

⁸ Wo dan wo galenu pla lɛ fla blɛn lé wo Sɔdɔm valé Éjipiti tɔ pa a ma, ana vuun la; fla ’ko ta lé munu Wozan gyɛ yiliblan ta.

⁹ Migɔnɔnu koo, bɛnnu koo, dérenu koo, bɛntɛrɛnu koo, wo vamunu é dan wo galenu ye lɛ yi yaa é buu yé wo ’ka dan dɔ lɛ a nyi wuo léé, wo wo paan lo.

¹⁰ Wolé we ma lé tɛrɛlamunu é dan zana gyɛ lɛ yé wo gi é dan nana lɛ; yé wo dan blannu pa lɛ ’wo ke lɛ zia; balelayezan fié ’ko, wo nyané pa tɛrɛlamunu ta, azama.

¹¹ Yi yaa é buu zuo Kazambale lé flinle lé éé mi bélié, é dan zun lɛ wo ta yé wo nwa yé wo dɔ loru; yé kana blɛn é dan zén lɛ wo yemunu gi.

¹² Yé wo dan dére do ’ma lɛ la gi yé é a fe wo lɛ léé: ’Ka da loru ’ko. Yé wo dan go lɛ la gi lati méléna; yé wo nyanémunu é dan wo ye lɛ.

¹³ ’Bɛ bléyi va, tɛrɛ ma é dan nyɔɔn lɛ blɛɛn, yé dé flakɔnbale a vu a bale do guru é zanaan a gi, yé a sɔraziɛn é voo; tɛrɛ manyɔɔnle ’ko é dan mi baa yaa wuru soru gyɛ lɛ, yé mi pɔnénu gi nyɛ é dan kini lɛ yé wo dan la gi Bale tɔ bɔ lɛ.

¹⁴ We tɔntɔn fiézan gié. Yé bé ye, a yaazan a dana laoɛ.

¹⁵ Lanje sɔrafiézan béli fɛn. Yé dére plɛplɛnu we la gi, yé wo léé: Tɛrɛ la bɛnlubɛn faa kinin Kozan valé élé Krist zé nya; yé é dan pla lɛ wo nwiin lɛɛfaama, a glɛ ’ka lo.

¹⁶ Yé mi segele yɔ do wɔlɛ ziɛn lé wo ke é nyanale ’wolé webleblinnu ta Kazambale ’lɛ, wo dia ’wo bli la yé wo Kazambale bɔ a fele nya léé:

¹⁷ Mizambale, Plɛplɛfaazan, bii lé i ke, ’té i ke ana é kyɛn, ko i bɔ vɔa léé, i kun sin izé plɛplɛ nagɔɔnle ma, yé i kun plale ma munu nwiin.

¹⁸ Bɛnnu bli fli; yé izé bliflile nwa yé migalenu lé weblebléyi bɔ; i wuozan balelayemunu koo, Kazambale lé munu koo, mi kiénénu valé mi segelenu lé woo kanaan i tɔ lee koo, wo faa goolipabléyi bɔ, yé tɛrɛ sɛrɛmunu kulugabléyi bɔ.

¹⁹ Balebangikɔn lé é ke la gi, a lɛ so yé munu gipawe pagikɛsu ye Balebangikɔn gi. Lɛɛ yuɛ wuo vɔ yé dérenu we, zagelenu ban yé tɛrɛ manyɔɔn, yé goowɔlɛlɛɛ plɛplɛ da.