Wegɔɔnle 10 - Kazambale lé Sebe Sauunu 1979

Lanje valé sɛbɛ kiéné

¹ Maa lanje plɛplɛ do ye é ziin sina la gi; lati a zi lɛ sɔɔ, bɔmlɛ a a nwiin yé a yara a bélé yiri zo yé a ganenu a bélé kyɛnɛnɛ pɔrɔlɔ zo.

² Sɛbɛ kiéné do a a lee ’é lɛ nya é sole. É bɛyila gane dɔra wɛyi ta, yé é bɛbola gane dɔra tɛrɛ la;

³ yé é siaa dére plɛplɛ nya bélé golizra wele zo. É siaa aan wo, zagele sɔrafié ban.

⁴ Zagele sɔrafié ban aan wo, maa a gona a gyɛna sɛbɛ la yé maa dére do ’ma la gi yé é léé: We lé zagele sɔrafié a fe ’wo banle nya, ’é vo i ’wuo gi; té bé gyɛ lo.

⁵ Yé lanje lé maa a ye é dɔle wɛyi valé tɛrɛ la, é bɛyi nwa loru,

⁶ yé mi lé é ke é yuɛma lɛɛfaama ’té la valé é gifɛnu koo, tɛrɛ valé é tafɛnu koo, wɛyi valé é gifɛnu koo, ’té é wo kɛlɛ bɛ, é ’bɛzan ’nyɔɔn léé, yi bɛ dɔle ’ka é dɛrɛ lo;

⁷ naa, lanje sɔrafiézan lé wefeyi nya, dé é béli fɛn, Kazambale lé weyɔɔle lɛ é dan sɔɔ lɛ, bélé fɛan zo lé é a fe é wuomunu balelayemunu lɛ, a zo.

⁸ Dére lé maa a ’ma la gi, é we fe an lɛ é ziin yé é léé: ’I go, yé sɛbɛ kiéné lé a lɛ ke é sole, ’bé si lanje lé é ke é dɔle loru wɛyi valé tɛrɛ la, a lee.

⁹ Yé an go lanje va yé maa lé a lɛ léé: ’I sɛbɛ kiéné nɔ an lɛ. Yé é lé an lɛ léé: ’Bé si, ’bé mini; é dan kɛlɛ lɛ néné i ’léé bélé zɔrɔnyɔnɔ zo, naa, é ’ka dan sɔ lɛ i bun‐annu lɛ lo.

¹⁰ Maa sɛbɛ kiéné si lanje lee yé maa a mini; é kɛlɛ an ’léé néné bélé zɔrɔnyɔnɔ zo, naa, dé maa a mini faa é ’ka sɔ lɛ an bun‐annu lɛ lo.

¹¹ A zuo é lé an lɛ léé: É a lé i balelawe fe é ziin migɔnɔ kiɛrɛ koo, bɛntɛrɛnu koo, dérenu koo, minwiinmunu koo, wo ma we nya.