Lɛrɛvɔ Sɛbɛ 96 - Kazambale lé Sebe Sauunu 1979

Minwiinzan blɛn Bale

¹ ’Ka lɛrɛ dɛrɛ vɔ Gakelebale lɛ. Ka faa lé ka ke tɛrɛlamunu nya,

² ’Ka lɛrɛ vɔ Gakelebale lɛ, ’ka a drɔɔ vo, ’Ka alé mi sile we gi zana dɔɔ yioo yi.

³ ’Ka a tɔbɔle zuo fe bɛnnu lɛ, ’Ka alé we blɛnnu zuo fe migɔnɔnu faa lɛ,

⁴ Naa, Gakelebale a blɛn, a tɔ zin fe yara lé é baba, É a kanamazan nya é mini balenu faa ta;

⁵ Naa, munu lé balenu faa a miyilinu nya, Yé Gakelebale ɛ lanu kɛlɛ.

⁶ Zevɔfɛ blɛnblɛnnu a kolé Bale blɛɛn zi, Fuasan alé kɔn sauun nɔnɔmi fan.

⁷ Migɔnɔ lelenu, ’ka Gakelebale tɔ zin fe, ’ka a tɔ bɔ. ’Ka kɛlɛ ma.

⁸ ’Ka Gakelebale tɔ bɔ, a tɔ lé we ma, ’Ka da blɛnu nya, yé ’ka wɔra alé gɔrɔnu gi.

⁹ Dé Mi Sauun bɔra a gi, ’ka ’wuo wɔra a gane wuo. ’Kaa tɛrɛlamunu faa, ka ma ’é nyɔɔn a ’lɛ.

¹⁰ ’Bé fe bɛnnu lɛ léé, Gakelebale a é plale mi nwiin; Amalé tɛrɛ a é dɔle gligli, a ma ’ka nyɔɔn‐an lo. Gakelebale éé migɔnɔnu lé we blé we drɔle nya.

¹¹ Lanu gi ’é nana ma, yé tɛrɛ gi ’é nana ginanale blɛn nya ma, Yé wɛyi valé é vafɛnu vun wele zuogi ’é go ma;

¹² Féi valé a tafɛnu faa gi ’é nana ma, Yé pɔrɔ gi yilinu faa ’é siaa ginanale nya

¹³ Gakelebale ’lɛ ma. Naa, é a dana, É a dana tɛrɛlamunu lé we ble lɛ; É dan tɛrɛlamunu lé we ble lɛ tegele, É dan migɔnɔnu lé we ble lɛ é yara pale we ta yɛrama.