Lɛrɛvɔ Sɛbɛ 95 - Kazambale lé Sebe Sauunu 1979

Bale tɔbɔlɛrɛ lé

¹ ’Ka da, kaa lɛrɛ vɔ Gakelebale lɛ, ginanale blɛn nya. Kaa sia ginanale nya Gakelebale lé é ke kolé gɔlɛgɔ nya, ko siéwegizan nya, a lɛ.

² Kaa go a ’lɛ a tɔ zin fele nya, Kaa lɛrɛnu vɔ, ’té kaa dére zuogi éé goo wele nya a tɔbɔle nya.

³ Naa, Gakelebale a Bale blɛn nya, É a minwiinzan blɛn nya é mini balenu faa ta.

⁴ Tɛrɛ a é kunle a bɛ nya, Yé gɔblɛnnu a azé nya.

⁵ Wɛyi a azé nya; yee ɛ kɛlɛ, Tɛrɛ é ziin, a bɛ ɛ ’bɛ kɛlɛ.

⁶ ’Ka da, kaa dia a ’lɛ, yé kaabo kɛlɛ kiéné, Kaa zun kaa powuo ta kaa Kɛlɛzan Gakelebale ’lɛ.

⁷ Naa, é a kaalé Bale nya, Yé kaa a alé trubɛ blena munu nya, Trubɛ lé éé goo a nya, kaa a ’bɛ nya, Oo, dé ka bɔa ka tɔné dɔle lɛ a dére lɛ kyɔɔ?

⁸ Té ka bli dɔ a ma plɛplɛ bélé fɛan zo lé ka tranu a kɛlɛ Mériba, a zo lo; Fɛan zo lé wa kɛlɛ yi la Masa, a zo lo.

⁹ Ka tranu an gi dan ’bɛna, Yé wo dia an zi, dɔlé ’té wo an panyanama ye.

¹⁰ Lɛɛ yɔ fié gi bɛn ’ko sɛrɛ an gi, Yé maa léé, migɔnɔ ’ko, bli lé éé wo saan, é a wo gi; Wo ’ka anlé zinu dɔɔa lo.

¹¹ Yé é ziin, maa anbo ’nyɔɔn anlé bliflile gi léé: Maa ’ka dan flinle nɔ lɛ wo lɛ lo.