Lɛrɛvɔ Sɛbɛ 94 - Kazambale lé Sebe Sauunu 1979

Munu faa lé weblezan Bale

¹ Gakelebale, welɛgipa Bale, Panu dɔrazan Bale, ’i bɔra a gi.

² Tɛrɛlamunu lé weblezan, ’i nwa, ’I boblɛnzannu banwo wo panyanamanu yɛrama.

³ Oo Gakelebale, guliwuo é dan vo lɛ mi nyanénu lɛɛ? Guliwuo é dan vo lɛ mi nyanénu lɛ yifaamaa?

⁴ Woo za vɔa, woo we fé dére blɛnblɛn nya; Munu faa lé woo wenaané kɛla, woo wobo ze vɔa.

⁵ Gakelebale, woo ilé munu wiian, Woo yaan ilé munu ta;

⁶ Woo zanagalale valé bɛnnu bɔrɔ boo, Woo ti valé bu galanénu gya.

⁷ Yé wo léé: Gakelebale ’ka a naginian lo, Jakɔb lé Bale ’ka a yé lo.

⁸ Wedɔɔalozannu, ’ka yuɛ pa kabozen va. Tavozannu, dé ka dan we dɔɔ lɛ mɛ bléyi vaa?

⁹ Mian é tɔné kɛlɛ, é ’ka we maan loo? Mian é mi yuɛ kɛlɛ, é ’ka fɛna yé loo?

¹⁰ Mian éé gikinile no mi lɛ, Mian éé we lɛdɔa bɛnnu gi, é ’ka we lɛdɔa munu gi loo?

¹¹ Gakelebale éé mi lé gibɔrɔlenu dɔɔan, É a gi dɔɔ léé, wa é pla.

^12-13 Oo Gakelebale, mian i we lɛdɔa a gi, Yé ilé bélidɔwe paa a gi, Léé, é vo drɔɔ we tɔntɔn bɔyi la, Fɔɔ yé wo guru blɛn bo mi nyanénu lee, azé a néné.

¹⁴ Naa, Gakelebale ’ka daan élé munu ma lo, É ’ka sɔn vɔa élé munu ma lo;

¹⁵ Naa, é dan we ble lɛ we tegele yɛrama, Yé munu faa lé wo bli ke é drɔle, wo dan dɔ lɛ a zuo.

¹⁶ De ɛ dan nwa lɛ an nyanézannu ma an lɛɛ? De ɛ dan an kun lɛ kli wenaanékɛkɛmunu maa?

¹⁷ Dé Gakelebale ’ka kɔɔn an bɔvazan nya lo, ’Té an boen é go é kele fɛ lé fɛ do kpen vun ’ka wé ana lo, ana.

¹⁸ Oo Gakelebale, dé maa léé, an sɔné san, Ilé zin kɛlɛ an buvɔmafɛ nya.

¹⁹ Dé gibɔrɔle kiɛre da an ’wuo gi, ’Té i an tɔrɔ paan yé an gi éé nanaan.

²⁰ Mi nyanénu lé woo ’wo bɔngiwe plenu kɛla bélidɔwe ma é yɛrama, Wo dan i kɛlɛ lɛ ’wolé webleblin tazan nyaa?

²¹ Woo zén‐é ékeva mi tegele lé tɛrɛla ma, Yé woo weanwiinlozan gya we nya.

²² Naa, Gakelebale a an yɔɔna plɛplɛ nya, Anlé Bale a an vɔzigɔlɛgɔ nya.

²³ É dan wolé weple nɔla lɛ wo ta, É dan wo sɛrɛ lɛ tata wo kɛlɛwe nyané nya. Gakelebale, kolé Bale, é dan wo sɛrɛ lɛ tata.