Lɛrɛvɔ Sɛbɛ 91 - Kazambale lé Sebe Sauunu 1979

Ko tabin Bale

¹ Mian ke é yɔɔle Loruzan bɛ wuo, Éé flin‐é Plɛplɛfaazan furɔ va.

² Maa lé Gakelebale lɛ léé: An vɔzizan valé anlé kɔn plɛplɛ, Anlé Bale, maa paan bii ɛ ta.

³ Naa, yee ɛ i sié we gi, bélé miané éé soo é gyɛsan ’léé fɛan zo, a zo. Yee ɛ i sié mi gyɛgyɛ lee.

⁴ É dan i ta bua lɛ é kyɛɛ nya Yé i dan yɔɔna ye lɛ a bɛanu wuo; Alé yara pale we ta a i takuunfɛ valé i golɛtayɔɔfɛ nya.

⁵ Dé gunu dɔra, kana ’ka dan vɔ lɛ i gi lo, Sawɔlɛ lé wa vulian é yiéyi, i ’ka dan kana lɛ a lee lo,

⁶ Migyɛgyɛ lé éé tawoo gunutinu va koo, Gyɛ lé éé ’wiié mi ta é yiéyi koo, i ’ka dan kana lɛ wo lee lo.

⁷ Dé mi wuru soru dia i bɛ do laoo, Yé dé mi baa soru dia i bɛyilaoo, Wo ’ka dan bɔ lɛ i lɛ lo;

⁸ I dan wo nagini lɛ i yuɛ nya é pla, Yé woo we lɛdɔa mi nyanénu gi fɛan zo, i dan a ye lɛ.

⁹ Oo Gakelebale, i a an vɔzizan nya, I Loruzan kɛlɛ i yɔɔna plɛplɛ nya.

¹⁰ We tɔntɔn do kpen ’ka dan bɔ lɛ i ma lo, Mi gyɛgyɛ do kpen ’ka dan bié lɛ ilé kɔn sɔnɔ lo.

¹¹ Naa, é dan fe lɛ élé lanjenu lɛ léé, ’Wo yuɛ pa ilé tawozi faa ta;

¹² Wo dan i kɔné si lɛ ’wo bɛ gi, Dé i sɔné é da san gɔlɛ ma.

¹³ I dan tawo lɛ golizra valé dubolu ta, I dan golizrané valé dragɔn zɔn lɛ

¹⁴ Bale léma: An sɔ a lɛ, amalé maa dan a si lɛ munu lee; É an tɔ dɔɔ, amalé maa dan a takuun lɛ wo lee.

¹⁵ É dan an tɔ laa lɛ, yé an dan we lɛ; Maa dan kɛlɛ lɛ a va alé kleblele gi; Maa dan a so lɛ wo lee, yé maa dan a tɔ zin bɔ lɛ.

¹⁶ Maa dan a kan lɛ yi kiɛre nya, Yé maa mi sié we gi fɛan zo, maa dan a gɔɔn lɛ a lɛ.