Lɛrɛvɔ Sɛbɛ 90 - Kazambale lé Sebe Sauunu 1979

SEBE ZIENZAN (Lɛrɛvɔle 90–106) Bale valé blami lé we

¹ Bale lé mi Moizi lé bazorole lé. Mizan, i a ko vɔzizan nya, Ko kulu é kulunu zé nya.

² Gɔblɛnnu bɔrale ’lɛ, ’Té i ’ka tan tɛrɛ valé é tafɛnu kɛlɛ lɛ lo, Lɛɛfaama a glɛ ’ka lo, ’té bii a Bale nya.

³ I munu nɔlaan vun nya A fele nya léé: Blaminu, ’ka nɔla é ziin.

⁴ Naa, lɛɛ wuru soru a i yuɛ gi Bélé yese yi lé é gié, a zo, Bélé béli bléyi do zo.

⁵ I wo giéan bélé nyɛ do gyɛle zo, Dé tu kini tɔɔn, ’té é gié bélé lu zo.

⁶ Lu vwi éé bié bladi, yé éé zanaan, Dé wa bɔi nyanadi, ’té é ga.

⁷ Ilé bliflile éé ko gya Yé i wɛwɛ éé di kinié ko gi.

⁸ I kolé weplenu voo i yuɛ gi yifaama, Ko saanlenu lé wo ta ke é yɔɔle, i yara san éé wo ta bɔraan.

⁹ Kolé yi faa éé giéma i bli tɔntɔn zi, Ko ko lɛɛnu yé giéna bélé bakinimaflinle zo.

¹⁰ Ko lɛɛnu éé kɛla lɛɛ yɔ yaa wɔlɛ vu, Yé dé mi kenu zé éé kɛla lɛɛ yɔ ziɛn, ’Bɛ éé kɛla nyanéblele valé blikyɛdɔle nya, Naa, woo giéan é kele, yé ko san sɔɔn.

¹¹ De ɛ ilé bliflile lé plɛplɛ dɔɔ? Yé de ɛ i bli tɔntɔn yé kanamawe nyaa?

¹² ’Bé paa ko gi léé, kolé tɛrɛlayinu ’ka di lo Yé ko kwa kuli yé ko we dɔɔ.

¹³ Gakelebale, ’i da; ko vo a zo ’koo? ’I nyanai zén i wuozannu ta.

¹⁴ ’I ko kan bladi faa do do ma ilé zin nya, Yé kolé tɛrɛla faa gi, ko gi é dan nana lɛ ginanale lé a glɛ ’ka lo, a nya.

¹⁵ Lɛɛnu lé i ko gyɛ nyané nya a gi, ’i ko gi nana ’bɛ lɛɛnu ’léé yɛrama, Lɛɛnu lé ko we tɔntɔn ye wo gi, ’i ko gi nana ’bɛ lɛɛnu ’léé yɛrama.

¹⁶ ’I ilé nyanama gɔɔn i wuozannu lɛ ma, Yé wolé nénu i dɔɔ mi blɛn nya ma.

¹⁷ Gakelebale, kolé Bale lé zin ’é kɛlɛ ko ta ma. ’I ko bɛnu panyanama dɔ gligli, Iin, ’i ko bɛnu panyanama dɔ gligli ma.