Lɛrɛvɔ Sɛbɛ 9 - Kazambale lé Sebe Sauunu 1979

Wo Bale bɔvɔ alé we tegele lé we ma

¹ Lɛrɛ lé David a vɔle gɔɔn lɛrɛvɔmunu ’lɛzan lɛ; wa vɔ mi benu dɔgɔnɔ ma.

² Maa dan Gakelebale tɔ bɔ lɛ an bli faa nya, An dan a kɛlɛwe blɛnnu faa zuo fe lɛ.

³ Maa dan i kɛlɛ lɛ an ginanamazan valé anlé ginanale blɛn lé éé giéan é glɛ ta, a nya. Loruzanbale, maa dan i tɔ vɔ lɛ lɛrɛ nya.

⁴ An nyanézannu éé goo ’wo zuozia, Woo diaan yé woo zamaga woo i yara.

⁵ Naa, i an dɔ an dɔna yé i dɔ an zi, I nyanaan ilé webleblin ta weblezan tegele nya.

⁶ I we lɛdɔa bɛnnu gi, yé i mi nyanénu sɛra tata. I wo tɔnu fwian yifaama zé nya, a glɛ ’ka dɔa lo.

⁷ An nyanézannu ’ka é dɛrɛ lo, wo sɛrɛle glɛ ’ka lo, I wolé flanu zana a gi tata, Wo sele ’ka dɔa mi gi é dɛrɛ pelo.

⁸ Gakelebale a é plale mi nwiin yifaama, É ’élé webleblin dɔraan munu lé weblele we ma.

⁹ Éé tɛrɛlamunu lé we blé tegele, Éé migɔnɔnu lé we blé é boen ma.

¹⁰ Munu lé woo yaan ’bɛnu ta, Gakelebale a ’bɛnu yɔɔna nya, É a wo yɔɔna nya wolé kle ble bléyi va.

¹¹ Munu lé wo i tɔ dɔɔ, woo paan bii ɛ ta, Naa, munu lé woo i naginian, oo Gakelebale, I ’ka dan wo vo lɛ lo.

¹² Gakelebale lé éé nyanaan Siɔn, ’ka lɛrɛ vɔ a lɛ, We blɛnnu lé é a kɛlɛ, ’ka sɔɔla migɔnɔnu va.

¹³ Naa, éé we lɛgi paan mi nyɛ zana?-?zannu ma, yé wenaané bɔmazannu sele éé dɔa a gi, Yé wo siaalenu sele ’ka saan a gi lo.

¹⁴ Gakelebale, i nyanai ’é zén maa ta, An nyanézannu an kɛlɛ nyanaizénlazan nya fɛan zo, bé ye do; ’I an si gale lee,

¹⁵ Léé, maa i tɔbɔlenu faa sɔɔla Siɔn munu lé kɔn ’léé nuu, Yé an gi é nana ilé mi sile we gi we ma.

¹⁶ Migyɛguru lé bɛnnu a bo, wobozen éé diaan a gi, Séli lé wa vɔ é yɔɔle, woboen a sian a gi ’wo gane nya.

¹⁷ Gakelebale éé ’é dɔbɛ gɔɔn‐an wo lɛ, éé we tegele kɛla, Éé minyanénu yerean ’wo bɛnu panyanama nya. ’Ka dɔ. ’Wo flinnu gyɛ.

¹⁸ Mi nyanénu éé yara nɔlaan migalenu nyanana vazia, Bɛnnu faa lé wo gi éé saan Bale ma, woo lé.

¹⁹ Naa, Bale gi ’ka saan wenaané bɔmazannu ma monomono lo, Nyanaizénlazan lé bli kɛlɛle we lɛ ’ka dan vo lɛ é pla monomono lo.

²⁰ Gakelebaleoo, Bale, ’i nwa. Té guliwuo é vo mi lee lo ma. ’Wo bɛnnu lé we ble i yara ma:

²¹ Oo Gakelebale, ’i di kini wo gi, Léé, migɔnɔ a gi dɔɔ léé, wa blaminu nya. Ka ye do.