Lɛrɛvɔ Sɛbɛ 89 - Kazambale lé Sebe Sauunu 1979

Ezra mi Étan lé lɛrɛ

¹ Ezra mi Étan lɛrɛ ’ko vɔ.

² Maa dan Gakelebale lé zin vɔ lɛ lɛrɛ nya yifaama; Maa dan i yara pale we ta zuo fe lɛ yifaama,

³ Naa, maa léé: Ilé zin a é dɔle gligli lɛɛfaama zé nya; I i yarapale we ta dɔ plɛplɛ la gi.

⁴ Maa an gi pa do munu lé maa wo si a va anzé nya, wo va; Wean maa anbo ’nyɔɔn a nya an wuozan David lɛ, yee lé ke léé:

⁵ I kulu ’ka dan nyaa lɛ pelo. I plale mi nwiin glɛ ’ka dan dɔ lɛ lo.

⁶ Oo Gakelebale, lanu i bɔ vɔa i kɛlɛwe blɛnblɛnnu lé we ma. Woo i yara pale we ta glewoo mi sauunnu lé wo zén ékeva, wo va.

⁷ Naa, lagimunu va, mi kyɛn ɛ bɔa ébo danle lɛ Gakelebale maa? Bale benu va, mi kyɛn ɛ ke bélé bii zoo?

⁸ Bale a kanamazan blɛn nya mi sauunnu lé wo zén ékeva, wo va, Éé kana zén‐é munu faa lé woo dirian a zi, wo gi.

⁹ Gakelebale, lai sunyanu lé Bale, oo Gakelebale, de ɛ lé plɛplɛ ke bélé bii zé zoo? I yarapale we ta i zi lɛ sɔɔan.

¹⁰ I plaan wɛyi lé boblɛn nwiin, Dé é nwa fɔrɔle nya bé ta zanaan.

¹¹ I Éjipiti tɛrɛ ’wii, I bɛ plɛplɛ nya lé i i nyanézannu fwila.

¹² Lanu valé tɛrɛ a izé nya, Bii ɛ tɛrɛ valé é tafɛnu faa kɛlɛ,

¹³ Bii ɛ yirinwana bɛbolazia valé yirinwana bɛyilazia kɛlɛ. Tabɔɔ gɔ valé Eɛmɔn gɔ gi éé nanaan i tɔ lé we ma.

¹⁴ I bɛ a plɛplɛ, I bɛlaa a plɛplɛ, i bɛyi a é nwale.

¹⁵ We tegele valé we drɔle a ilé plale mi nwiin pun nya; Zin valé yara pale we ta a i yara.

¹⁶ Munu lé woo béli vun wele maan, wozé a néné; Oo Gakelebale, woo tawoo i yara bile va.

¹⁷ Wo gi éé nanaan bléyi faa ma i tɔ lé we ma, Yé wobo tɔ bɔa ilé we tegele gi,

¹⁸ Naa, bii ɛ ke wolé plɛplɛ tɔbɔfɛ nya, Ilé zin ɛ kolé plɛplɛ nwaan.

¹⁹ Naa, Gakelebale a ko takuunzan nya, Izraɛl lé Mi Sauun a ko nwiinzan blɛn nya.

²⁰ É vinin, i we fe mi lé é sɔ i lɛ, a lɛ, yuɛzi gi, Yé i léé: Maa bɔ nyanazan va, Maa pɛniɛ do si munu va yé maa a nwa;

²¹ Maa an wuozan David ye; Yé an nyɔnɔ ’lɛzan zén a ta.

²² Maa dan a kun lɛ an bɛ nya kli, Yé an bɛ é dan a dɔ lɛ plɛplɛ.

²³ A nyanézan ’ka dan bɔra lɛ a ma fiaa lo, Yé mi nyané ’ka dan yaa lɛ a ta lo;

²⁴ Maa dan a mazannu ’wii lɛ a ’lɛ, Yé munu lé a za ke wo gi, an dan wo bla lɛ.

²⁵ An dan an yara pa lɛ alé we ta, yé an dan zin kɛlɛ lɛ a lɛ, Yé alé plɛplɛ é dan nwa lɛ an tɔ gi.

²⁶ Maa dan a bɛ pla lɛ wɛyi ta, Yé a bɛyi é dan pla lɛ yuunu ta.

²⁷ Yee ɛ dan an laa lɛ, ’té é a fé léé, bii a an ti nya, Anlé Bale valé an Siéwegi gɔlɛgɔ nya,

²⁸ Yé maa, an dan a kɛlɛ lɛ né vinin nya, Tɛrɛla minwiinzannu faa va minwiinzan blɛn nya,

²⁹ Maa dan anlé zin tadɔ lɛ azé nya yifaama, Yé anlé gipawe é dan vo lɛ é dɔbɛ gi yifaama.

³⁰ A kulunu ’ka dan nyaa lɛ pelo, Yé alé plale mi nwiin é dan vo lɛ ana bélé la mɔnle zo.

³¹ Dé a benu sɔn vɔ anlé bélidɔwenu ma, Yé dé wo ’ka tawo lɛ an déretawenu ta lo,

³² Dé wo anlé weplalenu sɛrɛ, Yé dé wo ’ka anlé bélidɔwe sɔnnénu pa lɛ lo,

³³ Maa dan wo bla lɛ vlewɔlɛ nya, wolé wesɛrɛle we ma, Yé maa dan wo bla lɛ wolé weplenu ma;

³⁴ Naa, maa ’ka dan anlé zin si lɛ a lee lo, Yé maa ’ka dan an yara pale we ta nyané kɛlɛ lɛ a lɛ lo.

³⁵ Maa ’ka dan anlé gipawe sɛrɛ lɛ lo, Yé dérenu lé wo bɔra an ’léé, maa ’ka dan a nɔla lɛ lo.

³⁶ Maa an kɛlɛle sauun ’nyɔɔn ’naan, An dan vié wo lɛ David lɛɛ?

³⁷ A kulu é dan vo lɛ ana yifaama; Alé plale mi nwiin é dan vo lɛ an ’lɛ bélé yiri zo,

³⁸ É dan vo lɛ ana lɛɛfaama, a glɛ ’ka lo, bélé moné zo. Wenayezan lé é ke la gi, é a yarapawelazan nya. Ka ye do.

³⁹ Yé duowo, mi lé i nyɔnɔ zén a ta, i sɔn vɔ a ma, i a nyunu, I bli fli a ma.

⁴⁰ Gipawe lé bé kɛlɛ i wuozan va, i serele bo a ma; I alé tɔkoro dia tɛrɛ va yé bé sɛrɛ.

⁴¹ I alé brikigɔrɔnu faa sɛrɛ, I alé kɔn plɛplɛnu guru zana a gi.

⁴² Giézannu faa alé fɛnu sian; A punmazannu a ye naaninvɔmafɛ nya.

⁴³ I a mazannu bɛyi nwa a ma, I a nyanézannu faa gi nana a ma;

⁴⁴ I alé gwɔun si ana, Yé i ’ka bɔ lɛ a va gulidanna lo.

⁴⁵ I alé sanbile glɛ dɔ, Yé i alé webleblin vuli tɛrɛ va;

⁴⁶ I a boroné la yinu bɔi a ta, Yé i yaragyɛwe blɛn bɔ a ma. Ka ye do.

⁴⁷ Gakelebale, i dan vo lɛ é yɔɔle fɔɔ bléyi faa vaa? ’Té i wɛwɛ ’lɛ sié bélé kyɛ zoo?

⁴⁸ Fɛan zo lé anlé tɛrɛla ’ka mɔn‐o lo, Yé i blaminu faa kɛlɛ é pla, a sele ’é dɔ i gi ma.

⁴⁹ Mian é bɔa vole lɛ é yuɛma, ’té é ’ka gaan lo, ’bɛzan anaa? De ɛ bɔa éboen sile lɛ we gi, ’té é ’ka zunwo gamunu nyanana loo? Ka ye do.

⁵⁰ Mizan, ilé zin vininnu lé bé kɛla, wa kyɛɛn? Té i bale ’nyɔɔn a gi David lɛ yarapalale nya bɛ, ’bɛ a kyɛɛn?

⁵¹ Mizan, serele lé wa bo i wuozannu ma, a sele ’é dɔ i gi ma; Sɔnɔ faa lé munu kiɛre a woo, wa an gi;

⁵² Gakelebaleoo, Bale, i nyanézannu an sɔnɔ fɛan zo, a sele ’é dɔ i gi, Sɔnɔdére lé wa fe ilé nyɔnɔzénnwiinzan ma, a sele ’é dɔ i gi ma.

⁵³ ’Wo Gakelebale drɔɔ vo lɛɛfaama! Amɛɛn! Amɛɛn!