Lɛrɛvɔ Sɛbɛ 88 - Kazambale lé Sebe Sauunu 1979

Gulioo guli vɔle

¹ Ezra mi Éman lɛrɛ ’ko vɔle gɔɔn lɛrɛvɔmunu zilɛzan lɛ. Bale tɔbɔlɛrɛ lé. Koré kulunu lé lɛrɛ lé. ’Wa vɔ séén va.

² Gakelebale, an Siéwegibale, Maa siaan i ’lɛ é yiéyi valé é béli,

³ Anlé bazorole ’é bɔ i va ma; ’I tɔné dɔ anlé nyanainya dére lɛ;

⁴ Naa, wenaanénu an kan Yé an bié gamunu nyanana sɔnɔ.

⁵ Munu lé wo wo pa guru gi, maa a wo vazan do nya, Maa a bélé mi lé plɛplɛ ’ka a lee é dɛrɛ lo, a zo.

⁶ Maa a é soile gamunu va, Maa a bélé munu lé wo wo gyɛ yé wo yia mipaguru gi, wo zo, Bélé munu lé wo sele ’ka dɔa i gi é dɛrɛ lo, ’Té ka kini wo nya ékema, wo zo.

⁷ I an vuli guru lé, a gi ke baa, a wɔlɛ ma, I an vuli gunutinu va, guru lé a wɔlɛ ma nyaana ’ka lo, a gi.

⁸ I wɛwɛ a é dɔle an ma, Yé i an wɔlɛi nyaa an ma we tɔntɔn saa bɔle nya an ma. Ka ye do.

⁹ I an béénu si an ma baa, Yé an kɛlɛ naaninvɔmafɛ nya wo yuɛ gi; Wo an lɛ tan yé an ’ka bɔa bɔrale lɛ lo.

¹⁰ An yuɛ tana nyanéblele nya; Oo Gakelebale, maa i laan yifaama. Maa an bɛnu soian i vazia.

¹¹ Mi galenu lɛ lé i gyɛzorowenu kɛlaa? Mi galenu ɛ nwaan i tɔ zin fele we maa? Ka ye do.

¹² Wo ilé zin zuo fé mipaguru gii? Wo i yara pale we la zuo fé guru lé, a wɔlɛma nyaana ’ka lo, a gii?

¹³ Wo ilé weblɛnblɛn dɔɔ gunutinu vaa? Wo ilé we tegele dɔɔ tɛrɛ lé ana munu sele ’ka dɔa mi gi é dɛrɛ lo, anaa?

¹⁴ Gakelebaleoo, Bale, ilé zanté, ’i bɔ an va. Anlé bazoro dére ’é bɔa i va é bladi;

¹⁵ Gakelebale, mɛmalé i sɔn vɔa an boen maa? Mɛmalé i yara yɔɔan an maa?

¹⁶ É sia an boroné la bléyi va fɔɔ kyɔ, maa a wenaanébɔmazan nya, yé gale a an ma, Kɔné lé bé nɔ an lɛ, é di kini an gi, yé an we gi bɔrɔ paan.

¹⁷ I wɛwɛ dɔle an ma mini an lɛ, Ilé di kinile an gi an sɛra tata;

¹⁸ Wo an zi lɛ sɔɔ bélé ’yinu zo, bladi fɔɔ nyanadi, Wo faa zén an ta ékeva, yé woo an ta yɔɔan.

¹⁹ I an béénu valé an bɔlunu si an ma baa; An giwe ’mazannu kini an ma.