Lɛrɛvɔ Sɛbɛ 86 - Kazambale lé Sebe Sauunu 1979

Bɔle mi va ma bazorole

¹ David lé bazorole lé. Gakelebale, ’i an ban i tɔné nya, ’i anlé bazorodére nyi si. Naa, maa a wenaanébɔmazan valé nyanégyɛzan nya.

² ’I an boen tabin, naa, maa a ilé zi sɔlɛzan nya. Anlé Bale, i wuozan lé é pa i ta, ’bé si we gi.

³ Mizan, ’i nyanai zén an ta, Naa, an siaan i lɛ bladi fɔɔ nyanadi.

⁴ ’I i wuozan boen gi nana, Naa, bii, Mizan, an gibɔrɔle faa a bii ɛ va.

⁵ Naa, Mizan, bii a é zin, i mi ma we voo, Munu faa lé wo i tɔ laan, wo va sɔlɛle a i gi blɛn.

⁶ Gakelebale, ’i anlé bazorodére ban i tɔné nya, ’I anlé nyanainya dérenu ’ma ma.

⁷ Anlé klebleyi nya ma i tɔ laan, I an dére nyi sié, azama.

⁸ Mizan, i zoɛzan ’ka balenu va lo, Yé woan woo nyanama paan i panyanama zo, ’bɛzan ’ka lo.

⁹ Mizan, bɛnnu faa lé bé kɛlɛ, wo dan da lɛ Dia lɛ ’wo bli la i ’lɛ, Yé wo dan i tɔ bɔ lɛ.

¹⁰ Naa, i a blɛn, i we blɛnblɛn kɛla, Bii do kpen, bii ɛ ke Bale nya.

¹¹ Oo Gakelebale, ’ilé zinu tawe paa an gi; Maa dan tawo lɛ ilé yarapale we la yɛrama; ’I an kɛlɛ yuɛidozan nya yé an kana i tɔ ma.

¹² Mizan, anlé Bale, an dan i tɔ zin fe lɛ an bli faa nya, Yé an dan i tɔ bɔ lɛ yifaama, ’bɛ glɛ ’ka lo.

¹³ Naa, ilé zin a blɛn an vazia, Yé i an boen si gamunu nyanana.

¹⁴ Oo Bale, boblɛnzannu nwa an ma, É sɔ glawekɛlɛmunu palu do lɛ léé, ’wo an gyɛ; Wo ’ka wo gibɔrɔma i ma lo.

¹⁵ Naa, bii, Mizan, i a nyanai zén Bale valé mi mawe dɔɔ Bale nya, I bli ’ka flian é kele lo; ilé zin valé ilé yarapale we ta, wa i gi blɛn;

¹⁶ ’I yara nɔla an vazia; yé ’i nyanai zén an ta. ’I plɛplɛ nɔ maa, i wuozan lɛ, Yé ’i wuole be si we gi.

¹⁷ ’Ilé zin kɛlɛ an lɛ tɔmase nya, Yé an nyanézannu ’é ’bɛ ye yé yara ’é wo gyɛ. Naa, oo Gakelebale, i bɔa an va yé i an tɔrɔ paan.