Lɛrɛvɔ Sɛbɛ 84 - Kazambale lé Sebe Sauunu 1979

Bale lé kɔn lɔrɔ

¹ Koré kulunu lɛrɛ ’ko vɔle gɔɔn lɛrɛvɔmunu zilɛzan lɛ. Lɛrɛvɔafɛ lé wa laama gititi, ’wa gyɛ a va. Lɛrɛ lé.

² Lai sunyanu lé Gakelebale, I nyanananu a é zima ’lɛ.

³ An boen a bakinimaflin wona, yé maa kɛlɛ tɔɔtɔɔ nyanale Gakelebale lé gɔrɔ gi lɔrɔ nya. An bli valé an kɔlɛ a siaana Bale yuɛmale lɛ.

⁴ Gbé boen, éé kɔn yé, Yé leelené kɔn a, ’té é ’élé nénu plaan a gi, Lai sunyanu lé Gakelebale, i bannanu lé. An nwiinzan blɛn valé anlé Bale.

⁵ Munu lé woo nyanaan ilé kɔn gi, wozé a néné. Wo bɔa i tɔ nwale lɛ é ziin. Ka ye do.

⁶ Munu lé wolé plɛplɛ éé sié i va, wozé a néné. Zi lé wa pla, wa yé wo bli gi.

⁷ Dé wa giéna Baka lé gɔworona, Wana nɔlaan fɛana ke é fanle ’yibɔnanu nya, a nya, Lɛɛ da, yé é ana fan drɔɔvole nya.

⁸ Wolé tawo bléyi va, wolé plɛplɛ taa zén wo ta, Yé wo ’wobo nagɔɔn Gakelebale lɛ Siɔn.

⁹ Gakelebale, lai sunyanu lé Bale, ’i anlé bazorodére ’ma, Jakɔb lé Bale, ’i an ban i tɔné nya. Ka ye do.

¹⁰ Biian i ke ko takuunzan nya, oo Bale, bé ye, ’Ilé nyɔnɔzénnwiinzan yara nagini.

¹¹ Dé mi yi do kɛlɛ ilé gɔrɔ gi, ’bɛ fila vɔ, é mini yi wuru soru lé mi a kɛla fɛ bɛna, a ta. Dɔle anlé Bale lé kɔnpa la fila vɔ É mini nyanale mi nyanénu lé sɔkɔn gi lɛ.

¹² Naa, Bale, Gakelebale a yiri nya; é a mi takuunzan nya, Gakelebale éé zin valé fua no mi lɛ, Munu lé gun ’ka wolé tawobɛ ma lo, é ’ka sɔn vɔa zin do kpen kɛlɛle ma wo lɛ lo.

¹³ Lai sunyanu lé Gakelebale, Mi lé éé paan i ta, azé a néné.