Lɛrɛvɔ Sɛbɛ 83 - Kazambale lé Sebe Sauunu 1979

Izraɛl nyanézannu kelele ma bazorole

¹ Bale tɔbɔlɛrɛ lé. Lɛrɛ lé Azafa a vɔ, yee lé.

² Oo Bale, té i vo é tadɔle lo, Oo Bale, té i tadɔ lo; té i nyana lo,

³ Naa, bé ye, i nyanézannu woo bli nwaan, Munu lé i za ke wo gi, woo ’wo ’wuo nwaan.

⁴ Woo wɔraan do ilé munu ma, wo tablele saa lé we ma, Yé munu lé i wo takuun‐an, woo gi paan do wo ma.

⁵ Wo léé: ’Ka da, kaa wo kulu ga bɛnnu méléna, Yé té Izraɛl tɔ sele é dɔ mi gi é dɛrɛ lo.

⁶ Wo faa bli kɛlɛ do. Wo ’wo gi pa do i ma;

⁷ Édomnu valé Ismaɛlnu koo, Moabnu valé Agarénu koo,

⁸ Gébalnu koo, Amɔnnu koo, Amalɛknu koo, Filisitinu valé Tiinu koo, woo lé.

⁹ Asirinu é ziin, wo pa wo va, Woo ’wo bɛ bɔa Lɔt lé nénu va. Ka ye do.

¹⁰ ’I we kɛlɛ wo lɛ bélé Madiannu koo, Sizéra koo, Jabɛn lé é ke Kizɔn yuu sɔnɔ bɛ koo, wo zo.

¹¹ Wo ’bɛnu sɛrɛ tata An‐Dɔɔ, Wo kinin bélé tɛrɛ lé bli vɔnle zo.

¹² ’I we kɛlɛ wo nwiinzannu lɛ bélé Orɛb valé Zééb zo, Yé ’i we kɛlɛ wo nwiinzannu faa lɛ bélé Zébak valé Salmuna zo.

¹³ Naa, wo léé: Ko Bale nyanananu si Gla nya ma.

¹⁴ Anlé Bale, ’i wo kɛlɛ bélé barikoko giéle zo, Bélé lɔɔ lé fu a sian, a zo.

¹⁵ ’I wo kɛlɛ bélé pɔrɔ lé kyɛ a blé, a zo, Bélé kyɛnɛnɛ lé éé vɔa gɔblɛnnu ma, a zo.

¹⁶ ’I wo zuo bin fu blɛn giéle nya, Yé ilé fɛsɛrɛfu giéle ’é wo manyɔɔn ma.

¹⁷ Gakelebaleoo, Bale, ’i wo gyɛ yara nya ma, Wolé i tɔ gininle we ma.

¹⁸ Yara ’é wo gyɛ yé di ’é kini wo gi yifaama ma, ’I wo gyɛ yara nya yé ’wo zamaga wo ma.

¹⁹ Bii do kpen ɛ tɔ ke Gakelebale nya, Bii a Loruzan nya tɛrɛ faa la; ’wo we ’ko dɔɔ ma.