Lɛrɛvɔ Sɛbɛ 81 - Kazambale lé Sebe Sauunu 1979

Fɛti kɛlɛna lɛrɛ

¹ Azafa lɛrɛ ’ko vɔle gɔɔn lɛrɛvɔzannu zilɛzan lɛ. Lɛrɛvɔafɛ lé wa laama gititi, ’wa gyɛ a va.

² ’Ka lɛrɛ vɔ kolé Plɛplɛzan Bale lɛ, ginanale blɛn nya, ’Ka siaa ginanale nya Jakɔb lé Bale lɛ.

³ ’Ka lɛrɛ vɔ, ’ka poo gyɛ yé a dére ’é we, Kɔnɔ lé a dére ke néné, é valé gitaa, ’wo wo gyɛ ma.

⁴ ’Ka béli fɛn moné dɛrɛ bɔra bléyi va, ’Ka moné bɔle pɔrɔ la lé fɛti kɛlɛ, yé ’ka béli fɛn é ziin.

⁵ Naa, é a Izraɛl lé bélidɔwe do nya, Jakɔb lé Bale déretawenu lé é a vo wo va, a nya.

⁶ Bléyian va lé é nwa Éjipiti tɛrɛ ma, É yee valé Jozɛfu dɔlawe fe, Dére do lé maa ’ka a dɔɔa lo, maa a ’ma.

⁷ An kɔné si ka bɛapa ta, Yé ka bɛ daan kyɛɛ kɔné sile ma.

⁸ Ilé kleblele gi i siaa, yé maa i si munu lee; Maa a zi pa zagele yɔɔna; Maa i gi dan Mériba lé ’yinu sɔnɔ. Ka ye do.

⁹ Anlé munu, ’ka tɔné dɔ yé maa dan we do lɛ kini lɛ ka lɛ; Izraɛl munu, ’ka tɔné dɔ an lɛ ma.

¹⁰ Té bale bɛ do kpen é kɛlɛ ana ka va lo, Té ka dia ka bli la bale bɛnu ’lɛ lo.

¹¹ Maa a Gakelebale nya, kalé Bale lé é ka si Éjipiti tɛrɛ la, a nya. ’Ka ’léé fuo, yé maa dan a fan lɛ.

¹² Naa, anlé munu ’ka tɔné dɔ lɛ an dére lɛ monomono lo. Izraɛl munu ’ka an lɛdɔ lɛ a ma pelo.

¹³ Naa, wo bli a zi bɛ ta, amalé maa wo vo wobo lé blibɔmawe lee, Woo tawoo ’wobozen lé weplalenu yɛrama.

¹⁴ Oo, dé é vo kɔɔn léé, anlé munu ’wo tɔné dɔ an lɛ; Dé é vo kɔɔn léé, Izraɛl munu tawo anlé tawobɛ gi,

¹⁵ ’Té maa wo nyanézannu gyɛ yara nya bléyi do kpen nya, ’Té an bɛ mane wo mazannu ma;

¹⁶ Munu lé Gakelebale za ke wo gi, ’té wo blaané dére fe, Yé ’té Izraɛl munu gi é dan nana lɛ yifaama;

¹⁷ Yé ’té maa fɛblele zin nɔ wo lɛ, Yé ’té maa wo kan zɔrɔnyɔnɔ lé é ke gɔlɛgɔ gi, a nya.