Lɛrɛvɔ Sɛbɛ 80 - Kazambale lé Sebe Sauunu 1979

Wo bɛn lé we ’é dɔ ’é dɔna

¹ Azafa lɛrɛ ’ko vɔle gɔɔn lɛrɛvɔzannu zilɛzan lɛ. Lɛrɛvɔafɛ lé wa laama bolu lé goo, ’wa gyɛ a va. Lɛrɛ lé.

² Izraɛl tabinzan, bii lé i goo Jozɛfu nya bélé trubɛ zo, ’I an ban i tɔné nya. Bii lé i ke é nyanale sérubɛnnu ta, ’I da ilé fua blɛn tagɔɔn.

³ ’I nwa, Éfraim koo, Bɛnjamɛn koo, Manasé koo, wo yuɛ va, ’Ilé plɛplɛ nagɔɔn yé ’i da bɔ ko va.

⁴ Baleoo, Bale ’i ko nwa, ’I yara soi ko lɛ, yé ko dan si lɛ we gi.

⁵ Gakelebale, lai sunyanu lé Bale, Dé ko bazoro, i bli éé flian ko ma, mɛ yi la léé, i dan daan lɛ ’bɛ maa?

⁶ Ko fɛ blé ko yuɛyi va, ’Té i ko yuɛyi no ko lɛ ’yiminile nya;

⁷ I ko nɔ ko bɔluzannu lɛ léé, ’wo ko sɔnɔ, ’Té ko nyanézannu éé yéri sié ko ma.

⁸ Lai sunyanu lé Bale, ’i ko nwa, ’I yara soi ko lɛ, yé ko dan si lɛ we gi.

⁹ I dɔrɔyili soowɔla Éjipiti tɛrɛ la; I bɛnnu bin, yé bé suru wo pa gi.

¹⁰ I fɛna ma’lɛrɛ a ’lɛ; Yé a suninu wɔra tɛrɛ gi, yé é tɛrɛ fan;

¹¹ A furɔ sɔɔla gɔblɛnnu ta, Yé a bɛnu kɛlɛ bélé Bale lé sɛdrɛyilinu zo;

¹² A bɛnu toro fɔɔ yé wo bɔ wɛyi ta, Yé a nénu goo fɔɔ yé wo bɔ yuu ma.

¹³ Mɛmalé i a zi gɔrɔ zana a gii? Yé giémunu faa a poro soo?

¹⁴ Pɔrɔ gi surugɔné a suni ma blé, Yé bwigiwinu a kɛla ’wo blena nya.

¹⁵ Lai sunyanu lé Bale, é a lé i da é ziin, Biian i ke lagi loru, bé nagini, bé ye, ’i gi bɔrɔ dɔrɔyili ’ko ma.

¹⁶ Fɛan bé suru i bɛyi nya, ’bé tabin, É valé i be lé bé si a va izé nya, wo nya.

¹⁷ Wo dɔrɔyili kyɛ ble, yé wa bɔi, Woo zamaga woo i yara tɔntɔn?-?gyɛle lee.

¹⁸ Mian é ke i bɛyila, ’i bɛ pla a ta ma, Blami be lé bé si a va izé nya, ’i bɛ pla a ta ma.

¹⁹ Yé ko ’ka dan si lɛ i ma baa é dɛrɛ lo, ’I ko vo é yuɛma é ziin, yé ko dan i tɔ laa lɛ.

²⁰ Gakelebale, lai sunyanu lé Bale, ’i ko nwa. ’I yara soi ko lɛ, yé ko dan si lɛ we gi.