Lɛrɛvɔ Sɛbɛ 79 - Kazambale lé Sebe Sauunu 1979

Wo bɛn sile we gi ma bazorole

¹ Lɛrɛ lé Azafa a vɔ. Baleoo, Bale, bɛnnu ’wii ilé munu ta, Wo ilé kɔn sauun sɔnné sɛrɛ, Yé wo Jérusalɛm kɛlɛ é’bin nya.

² Wo i wuozannu galenu nɔ lagi mianénu lɛ Fɛblele nya, Wo ilé yarapawelazannu galenu nɔ tɛrɛlawinu lɛ;

³ Wo wo nyɛ zana bélé ’yi zo Jérusalɛm zi fɛfaana; Wo pazannu ’ka ye lɛ lo.

⁴ Ko kɛlɛ serelebomazannu nya ko punmazannu yuɛ gi, Yé munu lé wo ko zi lɛ sɔɔ, woo ko ma we nanaan, ’té woo yéri sié ko ma.

⁵ Yiba! Gakelebale, i ’ka wé ko zi loo? Yé i bli é dan vo lɛ flina ko ma ’bɛ zoo?

⁶ ’I wɛwɛ dɔ bɛnnu lé wo ’ka i dɔɔa lo, wo ma ma, É valé migɔnɔnu lé wo ’ka i tɔ laan lo, wo ma.

⁷ Naa, wo bɛ mini Jakɔb lɛ, azama, Yé wa nyanana guru zana a gi.

⁸ Kolé weple lé ko kɛlɛ é kyɛn, té ’bɛ sele é dɔ i gi é dɛrɛ lo ma. I nyanai ’é zén ko ta é kele ma. Naa, ko a wenaanébɔmazannu nya é baba.

⁹ Ko Siéwegizan Bale, ’i bɔ ko va, i tɔ kɛlɛle blɛn lé we ma. ’I ko si munu lee yé ’i ko ma we vo kolé wenyanénu ma, i tɔ lé we ma.

¹⁰ Mɛmalé bɛnnu é dan a fe lɛ léé, wozé Bale a kyɛɛn? É a lé wa gi dɔɔ ko yuɛ va, bɛnnu méléna Léé, ko, i wuozannu nyɛ lé wa zana bɛ, bé lɛi paan.

¹¹ Luunu lé dunnulenu ’é go fɔɔ ’é bɔ i va ma. Yé munu lé wa gona gana za ma, ’i wo si we gi i bɛ plɛplɛ nya.

¹² Mizan, sɔnɔnu lé ko punmazannu a wo ko lɛ, ’Bé lɛgi pa wo ma gɔnɔ sɔrafié ma.

¹³ Yé ko, ilé munu, ilé wi lé lublena trubɛnu, Ko dan i tɔ nwa lɛ lɛɛfaama, a glɛ ’ka lo; Ko kulu é kulunu é dan i tɔ zin fele zana dɔɔ lɛ.