Lɛrɛvɔ Sɛbɛ 78 - Kazambale lé Sebe Sauunu 1979

Bale valé élé munu

¹ Bale tɔbɔlɛrɛ lé Azafa a vɔ. Anlé munu, ’ka tɔné dɔ anlé wepaalenu lɛ. ’Ka an ’léé dérenu ban ka tɔné nya.

² An we gibɔidérenu fé, An vinin la wedɔɔlenu zana dɔɔan.

³ We lé ko a ’ma koo, we lé ko a dɔɔ koo, We lé ko tinu a zuo fe ko lɛ koo,

⁴ Ko ’ka dan wo yɔɔ lɛ wolé nénu ma pelo; Gakelebale tɔ zin fele koo, alé plɛplɛ koo, Givuruwenu lé é a kɛlɛ koo, ko dan wo fe lɛ ko nénézinénénu lɛ.

⁵ É Jakɔb dɔ élé wenayezan nya, É bélidɔwe bɛ pa Izraɛl munu lee, Yé é a fe ko tranu lɛ léé, ’wa paa ’wolé nénu gi,

⁶ Léé, wo nénézinénénu wo we ’konu dɔɔ; Nénu lé wo dan wo yaa lɛ, dé wo kɛlɛ segele, Yé wozé paa wozé nénu gi,

⁷ Léé, ’wo pa Bale ta, Léé, té wo gi é san Bale panyanamanu ma lo, Yé ’wo alé bélidɔwe sɔnnénu pa,

⁸ Léé, té wo kɛlɛ bɛn lé woo mi lɛgaan a ma, yé wo tɔné gi ke plɛplɛ bélé wo tinu zé zo, wo nya lo, Bɛn lé wo bli ta ’ka é dɔle plɛplɛ lo, Yé wo léli fuu ’ka é ta Bale lé we gi lo, té wo kɛlɛ ’bɛ nya lo.

⁹ Éfraim benu lé gulidanfɛnu ke wo lee, yé woo sawɔlɛnu vulian, Gulidanyi nya wo nwunzi dɔ.

¹⁰ Wo ’ka Bale lé gipawe tawe kɛlɛ lɛ lo, Yé wo sɔn vɔ alé bélidɔwe ta tawole ma.

¹¹ Wo gi san a panyanamanu ma, Alé we blɛnnu lé é a kɛlɛ wo yuɛ va, wo gi san ’bɛnu ma.

¹² É we blɛnblɛnnu kɛlɛ wo tranu yuɛ va, Éjipiti tɛrɛ la, Soan féinu ta.

¹³ É wɛyi fee bo, yé é zi pla wo giéna nya, Yé é ’yinu dɔ bélé kɔnguru zo,

¹⁴ É zi gɔɔn wo lɛ é yiéyi lati nya, Yé é béli bléyi faa va é zi gɔɔn wo lɛ kyɛsan nya.

¹⁵ É ’yi si gɔlɛnu gi nyéné saa lé fɛna, Yé é miniyi nɔ wo lɛ kiɛre;

¹⁶ É ’yi bɔra gɔlɛ gi, ’té éé duun‐an, ’Té ’yinu éé yoroan bélé yuunu zo.

¹⁷ Naa, wo vo wenyané kɛlɛna a ma, Wo bli vo nwana Loruzan ma, nyéné saa lé fɛna.

¹⁸ Wo Bale gi dan wo bli gi, Yé wo ’wo blibɔmafɛ blele ma laa a lee.

¹⁹ Wo we fe Bale ma, Yé wo léé: Bale é bɔa Fɛblele nɔle lɛ ko lɛ nyéné saa lé fɛna ’koo?

²⁰ Bé ye, é fɛ duun gɔlɛ lɛ, yé ’yinu bɔra a gi yé wo yoro, Yé ’yi blɛnnu vo zanana; Yé wo lé é ziin léé: É bɔalɛ é ziin léé, é buru nɔ ko lɛɛ? É bɔa wi nɔle lɛ élé munu lɛɛ?

²¹ Gakelebale a ’ma, yé a bli flile Kyɛ bi Jakɔb ma plaun, Yé alé bliflile nwa Izraɛl munu ma,

²² Wo ’ka ’wo bli vo lɛ Bale lɛ lo, azama; Wo ’ka pa lɛ a ta léé, é dan bɔ lɛ ’wo va lo.

²³ Latinu lé ke loru, é we fe wo lɛ, Yé é lanu lɛ so;

²⁴ É mana zana wolé fɛblele nya bélé lɛɛ zo, É lagi ’sa nɔ wo lɛ.

²⁵ Wo faa mi blɛn lé buru ble, Yé é fɛblele nɔ wo lɛ fɔɔ yé wo kan.

²⁶ É yirinwanazia fu gié la gi, Yé é da yirinwana bɛyilazia fu nya élé plɛplɛ nya;

²⁷ Lɛɛ éé dan fɛan zo, é wi nɔ wo lɛ a zo, bélé vun zo, É mianénu nɔ wo lɛ bélé wɛyi gɔɔn ma nyéné zo;

²⁸ É wo zana wo nyanana méléna, Wo nyanana zi nuu.

²⁹ Bale wolé blibɔmafɛ nɔ wo lɛ, Wa ble yé wo kan é baba.

³⁰ Bléyian va lé wolé fɛblele a tan wo ’léé, ’Té a lɔrɔ ’ka tan si lɛ wo ma lo,

³¹ Bale lé bliflile nwa wo ma; É munu va mi plɛplɛnu gyɛ yé wo ga, É Izraɛl pɛniɛnu guru zana a gi.

³² Naa, duowo, wo vo wenyané kɛlɛna, Wo ’ka wo bli do kpen vo lɛ alé weblɛnblɛnnu kɛlɛle lɛ lo.

³³ Wo ’wolé yinu sɛrɛ boawe saa kɛlɛle nya. Wo lɛɛ nyaale bɔra wo ma fiaa.

³⁴ Dé Bale a wo gyɛna, wo kun a naginile ma, Yé wo zi nɔla yé wo da Bale va;

³⁵ Yé a sele dɔ wo gi léé, Bale ɛ ke wolé gɔlɛgɔ nya, Loruzan Bale a wo Siéwegizan nya.

³⁶ Naa, wo dabli kɛlɛ a lɛ wo ’léé dére nya, Yé wo vié wo a lɛ;

³⁷ Wo bli ’ka é dɔle gligli alé we gi lo, Yé wo ’ka yara pa lɛ alé gipawe kɛlɛle ta lo.

³⁸ Naa, duowo, alé nyanaizénle zi, é wo ma we vo wolé weple kɛlɛle ma, yé é ’ka wo gyɛ lɛ lo; Yi kiɛre nya é ’é bli kun yé é ’ka é bli faa fli lɛ lo.

³⁹ A sele dɔ a gi léé, wa mi nya é pla, Fu lé éé giéan yé é ’ka dan é zuo zia lo, yee lé ke wo nya.

⁴⁰ Dé wo nwa Bale ma nyéné saa lé fɛna gɔnɔ nɔɔ? Dé wo a ’léé gini bwi gi gɔnɔ nɔɔ?

⁴¹ Wo ’ka daan lɛ Bale gi danle ma lo, Wo ’ka daan lɛ zɛn vɔle ma Izraɛl lé Mi Sauun lɛ lo.

⁴² Alé plɛplɛ sele ’ka dɔ lɛ wo gi lo, Yé yi lé é wo si ’wo nyanémunu lee, ’bɛ sele saan wo gi.

⁴³ Gyɛzorowenu lé é a kɛlɛ Éjipiti tɛrɛ la, ’Bɛ valé alé weblɛnblɛnnu lé é a kɛlɛ Soan lé féinu ta, wo gi san ’bɛ ma.

⁴⁴ É wolé yuunu nɔla nyɛ nya, Yé wo ’ka bɔ lɛ a minile lɛ lo.

⁴⁵ É kyɛnyɔnɔgɔnénu pa wo lɛ zia yé ’bɛnu suiɛ dɔ wo ma, Yé é yolunu pa wo lɛ zia yé ’bɛnu wolé fɛna faa sɛrɛ.

⁴⁶ É wolé féifɛnu nɔ gangannu lɛ, É wo panyanama tɔnɔ nɔ gangannu lɛ.

⁴⁷ É wolé dɔrɔyilinu gyɛ goowɔlɛlɛɛ nya, É wolé sikomɔyilinu sɛrɛ dunu nya.

⁴⁸ É zi nɔ goowɔlɛlɛɛ lɛ, yé ’bɛ wolé winu gyɛ, Yé é wolé trubɛnu vo yé lagikyɛ wo ble.

⁴⁹ Alé bliflile plɛplɛ koo, a wɛwɛ koo, a bli tɔntɔn koo, kleblele koo, é wo nwa wo ma. Nwunvɔzannu lé Bale wo pa zia we tɔntɔn kɛlɛle wo lɛ we gi, wo lé ke bɛ.

⁵⁰ É zi nɔ élé bliflile lɛ, É ’ka wo boen si lɛ gale lee lo, É wolé tɛrɛla nyaa;

⁵¹ É Éjipiti tɛrɛ la né vininzannu faa gyɛ, Wolé pɛniɛ la né vininzannu lé, wa Sam lé sɔkɔnnu wuo.

⁵² É go élé munu nya bélé ’blanu zo, Bélé trubɛ zo, nyéné saa lé fɛna.

⁵³ É go wo nya tegele, té kana é zén wo gi lo we ma, Yé wɛyi wo nyanézannu ta bua.

⁵⁴ Tɛrɛ lé Bale a pa é yɛrama wozé nya, é go wo nya a vazia, Gɔblɛn lé é a si gla nya, é go wo nya a vazia.

⁵⁵ É bɛnnu bin wo ’lɛ, É wolé tɛrɛ guli wo ma wolé tɔnɔfɛ nya, Yé é Izraɛl bɛnnu nyana wolé sɔkɔnnu wuo.

⁵⁶ Naa, wo Loruzan Bale gi dan, yé wo nwa a ma, Wo ’ka tawo lɛ a dére yɛrama lo,

⁵⁷ Wo si Bale ma baa, wa bélé ’wo tranu zo, yé wo ’ka kɛlɛ lɛ yarapawelazannu nya lo, Wo nɔla bélé sawɔlɛ lé é zi buu, a zo.

⁵⁸ Wa bli fli wolé gɔ nwiin yobannanu nya, Yé walé maawole nwa wolé miyilinu nya.

⁵⁹ Bale a ’ma, yé a bli fli, É Izraɛl munu nyunu gla nya léé, ’wo si ’é ma.

⁶⁰ É sɔn vɔ é nyanana lé ke Silo, a ma, Sɔkɔn lé éé nyanaan a gi munu méléna, é sɔn vɔ ’bɛ ma;

⁶¹ É daan é tɔbɔzannu ma léé, wo go wo nya luu gi, Yé ’élé fuasan vo é nyanézannu lee.

⁶² É élé munu bɛ pa gwɔunzannu lee, Yé a bli fli élé munu ma.

⁶³ Kyɛ alé pɛniɛnu ble, Yé wo ’ka alé blɛnnu tɔ nwa lɛ lo;

⁶⁴ Wo alé Balebanzannu gyɛ gwɔun nya, Yé alé gyɛzaralomu ’ka wuvɔ lɛ lo.

⁶⁵ Mizan nwa bélé yigyɛzan vuole zo, É nwa bélé nyanazan lé nwɛ a gyɛ, a zo.

⁶⁶ A nyanézannu vlan buru ’té éé goo wo gyɛle nya, ’Té alé serele bole wo ma glɛ ’ka lo.

⁶⁷ Naa, duowo, é sɔn vɔ Jozɛfu lé sɔkɔnnu ma, Yé é ’ka Éfraim bɛn si lɛ a va pelo;

⁶⁸ É Juda bɛn si a va ézé nya, Siɔn gɔblɛn lé, é sɔ a lɛ, é a si.

⁶⁹ Yé é ’é nyanana sauun dɔ bélé la zo, Bélé tɛrɛ lé é a gane vɔ yifaama zé nya, a zo.

⁷⁰ É ’é wuozan David si a va, Yé é a si ’blanu tabinna;

⁷¹ É a si ’blanu lé wo nyɔ no ’wolé nénu lɛ, wo zuo, Léé, é fɛblele nɔ élé munu Jakɔb lɛ, É valé Izraɛl munu lé wo ke alé munu nya, wo lɛ.

⁷² Yé David go wo nya bli zin nya, Bɛ lé é we dɔɔ a nya, é go wo nya ’bɛ bɛ gi.