Lɛrɛvɔ Sɛbɛ 74 - Kazambale lé Sebe Sauunu 1979

Wolé munu sile we gi ma bazorole

¹ Azafa lé Bale tɔbɔlɛrɛ lé. Oo Bale, mɛmalé i sɔn vɔa an ma yifaamaa? Mɛmalé i bli éé flian ilé wi lé lu blena trubɛ maa?

² Ilé munu lé i wo si izé nya é vinin, ’Té i wo tabo é ziin ilé tɔnɔyéma bɛnnu nya bɛ, wo sele ’é dɔ i gi ana ma; Fɛ lé i ke é nyanale ana, Siɔn gɔblɛn nwiin bɛ, wo sele ’é dɔ i gi ana ma;

³ Fɛnanu lé wo guru ke é zanale a gi yifaama, ’i tawo ana, I nyanézan ilé fɛna sauun gifɛnu faa sɔnné sɛrɛ.

⁴ I mazannu éé siaan ilé kɔn gi bélé winu zo, Wo ’wozé tɔmasenu dɔ ana tɔmasenu nya.

⁵ Wo wo ye bélé mi lé Éé zaa nwaan pɔrɔ ti lé yili vɔle we ma, a zo.

⁶ Yé kele tɔɔn, fɛnu lé wo wo ma nyaa, wo wo ’wii Zaanu valé maato nya.

⁷ Wo ilé kɔn kyɛ ble, Kɔn lé wo i tɔ pa a ma, wa guru zana a gi, yé wa sɔnné sɛrɛ.

⁸ Wo lé ’wo bli gi léé: Kaa wo faa gyɛ ékeva do ’té. Wo tɛrɛla fɛna sauunnu faa kyɛ ble.

⁹ Wo ’ka kolé tɔmasenu yé é dɛrɛ lo; Balelayezan ’ka ana é dɛrɛ lo, Yé dé a lɛɛ vo nɔɔ? ko va mi do ’ka ’bɛ gi dɔɔa lo.

¹⁰ Baleoo, Bale, yaamitazan é dan ko sɔnɔ lɛ fɔɔ bléyi kyɛn vaa? Ko nyanézan é dan serele bo lɛ i tɔ ma yifaamaa?

¹¹ Mɛmalé i bɛyi si ana yé i bɛ vɔ é ke laa? ’I bɛ si é ke la, ’i wo sɛrɛ tata.

¹² Bale a an nwiinzan blɛn nya é li é kwakwa, Yee ɛ mi sié we gi tɛrɛ la.

¹³ Bii ɛ wɛyi fee gyɛ ilé plɛplɛ nya, Bii ɛ fɛ yuɛmale blɛnnu ’wuo ’wii ’yinu ta.

¹⁴ Bii ɛ yuéi ’wuo wii, Yé bé nɔ nyéné saa ta munu lɛ wolé fɛblele nya.

¹⁵ Bii ɛ ’yibɔnanu valé ’yiyoronu kɛlɛ ’té woo duun‐an, Yé yuunu lé wo ’ka bélié monomono lo, i wo béli.

¹⁶ Yiéyi a izé nya; béli a izé nya; Bii ɛ san valé yiri kɛlɛ.

¹⁷ Bii ɛ tɛrɛ glɛ sina faa dɔ, Bii ɛ yɛrɛgabléyi valé lɛɛdabléyi kɛlɛ.

¹⁸ Mi nyanézan éé Gakelebale sɔnɔan, Yé tawomunu woo serele boo i tɔ ma, wenu ’ko sele ’é dɔ i gi ma.

¹⁹ Té i ilé plala boen pa bwi gi winu lee lo. Té i gi é san ilé mi kiénénu ma yifaama lo.

²⁰ ’I gipawe ye we blɛn nya ma, Naa, fɛnu lé ana gunu ke, ana a migyɛmunu yɔɔnanu nya.

²¹ Mi lé wo yaa a ta, té é diéra yaragyɛle nya lo. Wenaanébɔmazan valé nyanégyɛzan, ’wo i tɔ nwa ma.

²² Baleoo, Bale, ’i nwa, ’ilé we wuo vɔ. I sɔnɔnu lé tavozannu a woo yi faa do do ma, a sele ’é dɔ i gi ma.

²³ Té i gi san i mazannu lé siaalenu ma lo, Munu lé woo nwaan i ma, ’té wolé wele wooo gi ke gyɛna yifaama bɛ, té i gi é san wo ma lo.