Lɛrɛvɔ Sɛbɛ 73 - Kazambale lé Sebe Sauunu 1979

SEBE YAAZAN (Lɛrɛvɔle 73–89) Bale lé we tegele

¹ Azafa lé lɛrɛ lé. Iin, Bale éé wezin kɛla Izraɛl lɛ, Munu lé wo bli gi ke é bɔle, wo lɛ.

² Naa, duowo, é vo sɛ yé an gane é saan. É vo kiéné yé an buu;

³ Naa, an mi nyanénu lé ginanale ye aan wo, An maabo tavozannu va.

⁴ Fɛ do ’ka nyané paan wo ta lo fɔɔ yé wo ga, Yé wa é buale wo kɔlɛ ma; yé wa yɔrɔyɔrɔ;

⁵ Nyanénu lé tɛrɛlamunu a blé, wo ’ka a do kpen blé lo, Kleblelenu lé éé bɔa tɛrɛlami pɔnénu ma, é ’ka bɔa wo ma lo.

⁶ Boblɛn a é vɔle wo bɔrɔ ma bele bɔrɔmafɛ zo, Glawe kɛlɛle a wo ta bélé varɔ zo.

⁷ Weple éé bɔraan wo gi, Wenu lé woo gibɔrɔan wo ma, woo bɔraan wo ’léé.

⁸ Woo mi ma we nanaan, yé woo yaamitadére nyanénu fé; Boblɛn dére éé bɔraan wo ’léé,

⁹ Woo wenyané fé lai we ma, Wo nɛnɛ éé bɔrɔwoo tɛrɛ la boblɛn dére nya.

¹⁰ Wean ma lé munu kiɛre zén wo zuo, yee lo: Wo dɔ’wo dére ta,

¹¹ Yé wo léé: Bale é dan ’bɛ dɔɔ lɛ kaa? Loruzan é dan ’bɛ gi dɔɔ lɛ kaa?

¹² A zo lé mi nyanénu zé ke; Wo gi éé nanaan yifaama, yé wolé fuafɛnu gi éé gya.

¹³ Amalé an bli gibɔle kɛlɛ we pla nya, Yé an bɛ ma folile, ’té we ’ka an nwiin lo bɛ, ’bɛ kɛlɛ we pla nya.

¹⁴ Yi faa do do ma woo an blaan, Bladi faa ma woo we lɛdɔa an gi.

¹⁵ Dé maalé kɔɔn léé, é sɔ an lɛ léé, an we fé bélé wo zo, ’Té maa dabli kɛla ilé nénu lɛ.

¹⁶ Dé an ’wuogibɔrɔ a gi ’male we ma, A gi ’male a an ma blɛn;

¹⁷ Fɔɔ yé an wɔra Bale lé fɛna sauunnu na, Yé fɛan zo lé mi nyanénu lé we ’wuo éé plaan, yé maa a ye.

¹⁸ Iin, i wo dɔa zi yɔrɔyɔrɔ ta, Bé kɛlɛ léé, wo dia yé wo sɛrɛ tata,

¹⁹ Yé bé gini do, keletɔɔn, wozé nyaa. Wo wo si ana é kele, yé ana vo é pla.

²⁰ Mizan, dé i nwa, wo sele éé saan i gi, Bélé nyɛgyɛle zo.

²¹ An bli kɛlɛ bléyian va é nyané, Yé anlé we ’namale an bɔn fan,

²² An ’ka we dɔɔa lo, yé an ’wuo ’ka an ta lo, Maa a i yuɛ gi bélé wi zo.

²³ Naa, duowo, maa a i va yifaama, I an kun an bɛyi ma;

²⁴ I dan go lɛ an nya, ’té i we plaan an lɛ, ’Bɛ zuo i dan an bɛn si lɛ ilé fua fɛna.

²⁵ De ɛ ke anzé nya la gii? Bii do kpen kaan loo? Yé an gi éé nanaan bii do ɛ gi tɛrɛ la ’ko.

²⁶ Dé an bli ble an gi yé an kɔlɛ ’ka an ta é dɛrɛ lo, Bale é dan kɛlɛ lɛ gɔlɛgɔ nya an bli lɛ; é dan kɛlɛ lɛ anzé nya yifaama;

²⁷ Naa, bé ye, munu lé woo sié i ma baa, woo zamaga woo; Wo faa lé woo sié i va, i dan wo si lɛ ana tata.

²⁸ Naa, dé é a anzé nya, an biéle Bale sɔnɔ é a an ma é zima; Mizan, Gakelebale, a an vɔzizan nya, I panyanamanu faa zuo fele we ma.