Lɛrɛvɔ Sɛbɛ 72 - Kazambale lé Sebe Sauunu 1979

Minwiinzan blɛn tɔ ma bazorole

¹ Salomɔn zé lé. Baleoo, Bale, ’ilé weblebli vɔ minwiinzan blɛn gi, Yé ’ilé we tegele bli vɔ minwiinzan blɛn be gi.

² Yé é dan ilé munu lé we ble lɛ tegele, Yé é dan i wuozan kiénénu lé we ble lɛ é boen ma,

³ Gɔnu lé ilé munu ke é nyanale wo nwiin, ilé vole drɔɔ é dan kɛlɛ lɛ ana, Gɔpanénu é ziin, wo tamunu é dan ilé we tegele dɔɔ lɛ.

⁴ Minwiinzan é dan we tegele kɛlɛ lɛ Bale wuozan kiénénu lɛ, É dan nyanégyɛzan lé nénu si lɛ we gi, Yé mi lé éé yaan wo ta, é dan azan zɔn lɛ.

⁵ Wo dan kana lɛ i lee bléyi lé yiri ke ana, ’bɛ bléyi faa va, Moné faa bɔrale nya, mi kulu é kulunu faa va;

⁶ É dan kɛlɛ lɛ bélé lɛɛ lé éé dan lu lé wa wo, a ta, a zo, Bélé lɛɛ blɛnnu lé woo tɛrɛ voo drɔɔdrɔɔ, wo dale zo.

⁷ ’Bɛzan zé yinu ta, mi tegelenu vwi é dan bi lɛ, Yé vole drɔɔ é dan kɛlɛ lɛ blɛn fɔɔ ’té moné ’ka ana é dɛrɛ lo.

⁸ É dan pla lɛ munu nwiin, é sia wɛyi ’ko ma yé é bɔ a koɛ ma, É sia yuu ma yé é bɔ fɔɔ tɛrɛ glɛ sina.

⁹ Nyéné saa ta munu wo dan ’wo powuo zun lɛ a ’lɛ, Yé a nyanézannu é dan ’wo ’wuo wɔra lɛ a gane wuo.

¹⁰ Taasis munu nwiinzan blɛnnu valé ’yiworonatɛrɛ nwiinzannu, wo dan vagɔɔli banwo lɛ a lɛ, Séba valé Saba munu nwiinzan blɛnnu wo dan blɛ kɛlɛ lɛ a lɛ.

¹¹ Minwiinzan blɛnnu faa wo dan dia lɛ a ’lɛ, Bɛnnu faa é dan a bɔ lɛ.

¹² Naa, nyanégyɛzan lé éé siaan, é dan a si lɛ munu lee, Yee valé wenaanébɔmazan lé a bɔvazan do kpen ’ka lo, a nya.

¹³ É dan é nyanai zén lɛ nyanaizénlazan valé nyanégyɛzan ta, É dan nyanégyɛzannu si lɛ we gi;

¹⁴ É dan wo si lɛ munu lé woo yaan wo ta, é valé glawekɛlɛmunu lee. Yé é dan wo nyɛ ye lɛ fɛwezan nya.

¹⁵ Wo dan vo lɛ é yuɛma, yé wo dan Sébatɛrɛ la kyan nɔ lɛ a lɛ; Wo ’ka dan yara si lɛ alé bazorole ta lo, wo dan a drɔɔ vo lɛ yi faa do do ma.

¹⁶ ’Sa é dan kɛlɛ lɛ di tɛrɛ la, gɔblɛnnu bɛlo ta, Yé wo nɛnɛnu é dan nyɔɔn lɛ bélé Liban lé yilinu zo; Munu vwi é dan bi lɛ fla bélé tɛrɛ la lu zo,

¹⁷ A tɔ é dan kɛlɛ lɛ ana yifaama, A tɔ é dan vo lɛ ana bélé yiri mɔnle zo, A tɔ gi lé wo dan wo ke drɔɔ vo lɛ, Yé bɛnnu faa é dan a fe lɛ léé, azé a néné.

¹⁸ ’Wo Gakelebale, Izraɛl lé Bale drɔɔ vo ma. Yee do kpen ɛ we blɛnblɛn kɛla!

¹⁹ ’Wo a tɔ zin bɔle drɔɔ vo yifaama ma! Tɛrɛ faa ’é fan a tɔbɔle nya ma! Amɛɛn! Amɛɛn!

²⁰ Izai be David lé bazorolenu nyaana lo.