Lɛrɛvɔ Sɛbɛ 71 - Kazambale lé Sebe Sauunu 1979

Mi kwa lé bazorole

¹ Gakelebale, an vɔ i zi ma; Té yara an gyɛ pelo ma.

² I a tegele, amalé ’i an si we gi yé ’i an si munu lee. ’I an ban i tɔné nya, yé ’i bɔ an va.

³ ’I kɛlɛ an lɛ gɔlɛgɔ lé é ke an yɔɔna nya, a nya, ’Té an bɔa yɔɔle lɛ ana yifaama, I dére nɔ an lɛ léé, i dan an si lɛ we gi, Naa, i a anlé gɔlɛgɔ valé an yɔɔna plɛplɛ nya.

⁴ Mi ple lé éé glawe kɛla, ’i an si ’bɛ lee; Anlé Bale, ’i an si mi nyané lee.

⁵ Naa, Mizan, Gakelebale, an bli a bii ɛ lɛ. An paan bii ɛ ta an boroné la bléyi va fɔɔ kyɔ.

⁶ ’Té dé maa a an bu bɔn gi, fɔɔ kyɔ, maa a é tɛnle bii ɛ ma; Bii ɛ an bɔra an bu bɔn gi; Bléyi faa ma bii ɛ tɔ zin lé maa fé.

⁷ Mi kiɛre gi éé vuruan anlé we ma, Yé bii, bii a an vɔzizan plɛplɛ nya.

⁸ An ’léé ’é fan i tɔ zin fele nya ma. An ’léé ’é i tɔ zin bɔ yi faa do do ma ma.

⁹ Dé an kɛlɛ kwakwa, té i an vo lo; Dé anlé plɛplɛ nyaoo, té i sɔn vɔ an ma lo.

¹⁰ Naa, an nyanézannu éé we fé an ma, Yé munu lé woo an ma vɔɔan, woo an ma we blé wo ke va,

¹¹ ’Té wa fé léé: Bale sɔn vɔ a ma; Kaa a zuo bin ma, kaa a kun, a ta weblezan do kpen ’ka lo.

¹² Baleoo, Bale, té i si an ma baa lo, Anlé Bale, ’i da é kele, ’i bɔ an va.

¹³ Munu lé wa a va léé, ’wo an gyɛ, yaragyɛwe ’é bɔ wo ma yé ’wo sɛrɛ tata ma. Munu lé wa a va léé, ’wo an saan, yara blɛn ’é wo gyɛ yé wo serele bo wo ma ma.

¹⁴ Yé maa, an bli é dan kɛlɛ lɛ i lɛ yifaama, Maa lé i tɔ zin fele gi é dan gyɛ lɛ.

¹⁵ Yi faa do do ma an dan ilé we tegele valé ilé misilewegi zana dɔɔ lɛ, Naa, an ’ka bɔa a faa zuo fele lɛ lo.

¹⁶ Mizan, Gakelebale, maa dan i panyanama plɛplɛnu zuo fe lɛ. I a tegele, bii do lé we tegele sele é dan dɔ lɛ an gi.

¹⁷ Oo Bale, i we paale sia an gi an boroné la bléyi va fɔɔ kyɔ, Yé maa ilé we blɛnnu zuo fele sia fɔɔ kyɔ.

¹⁸ Baleoo, Bale, té i sɔn vɔ an ma lo, dé an kɛlɛ kwa yé an nwana kɛlɛ fuoo, té i sɔn vɔ an ma lo, Léé, maa ilé gla zana dɔɔ bléyi ’ko vamunu lɛ, Maa ilé plɛplɛ zana dɔɔ bléyi voéla gi munu lɛ.

¹⁹ I kɛlɛwe tegele éé goo fɔɔ yé é zun la ma; I we blɛnblɛnnu kɛlɛ; oo Bale, de ɛ ke i bɔmazan nyaa?

²⁰ I kleblele valé we tɔntɔn bɔ ko ma kiɛre, Naa, bii ɛ fu vɔ ko ma é ziin, Gurunu lé wo wɔlɛ ma nyaana ’ka lo, i dan ko bɔra lɛ wo gi.

²¹ ’I an kɛlɛ blɛn é ziin, ’I an tɔrɔ paa é ziin.

²² Anlé Bale, maa dan i tɔ zin fe lɛ gitaa nya, maa dan i yara pale we la vɔ lɛ lɛrɛ nya. Izraɛl lé mi sauun, maa dan i tɔ nwa lɛ kɔnɔ gyɛle nya.

²³ Dé maa i tɔ nwa an gi é dan nana lɛ a we ma, An boen lé bé si munu lee, ’bɛ gi é dan nana lɛ;

²⁴ An dan ilé we tegele zana dɔɔ lɛ yi faa do do ma, Munu lé wa a va léé, ’wo an gyɛ, yara ’é wo gyɛ ma, yé yaragyɛwe ’é bɔ wo ma ma.