Lɛrɛvɔ Sɛbɛ 7 - Kazambale lé Sebe Sauunu 1979

We tegele ma laa bazorole

¹ Bli kyɛ dɔ lɛrɛ lé David a vɔ Gakelebale lɛ, Bɛnjamɛn mi Kus lé we ma.

² Gakelebale, anzé Bale, maa a an yɔɔna naginina i va; ’I an si nyané pa antazannu faa lee, yé ’i an si we gi.

³ Dé wo da an wi kini ékema bélé golizra lé Éé mi minié ’té a bɔvazan do kpen ’ka lo, a zo.

⁴ Gakelebale, anlé Bale, dé maa ’bɛ kɛlɛ, Dé we ple a an lee,

⁵ Dé an wenaané kɛlɛ mi lé a bli ke an ma drɔɔ, a lɛ, Mi lé éé yaan an ta, ’té maa ’ka we do kɛlɛ lɛ lo, dé maa a kyeen wo,

⁶ An nyanézan ’é an zuo bin yé ’é an kun ma, Yé ’é anlé tɛrɛla nyaa ma, Yé ’é anlé fua vɔ vun va ma. Ka ye do.

⁷ Gakelebaleoo, Bale, ’i nwa ilé bliflile nya, ’I nwa an nyanézannu lé wɛwɛ ma ma, ’I vuo, bɔle an va we ma, ’i webleyi dɔ.

⁸ Munu faa ’wo zén ékeva i zi. ’I go wo ta loru fɛna nwale na.

⁹ Gakelebale éé migɔnɔnu lé we blé; Gakelebaleoo, Bale, ’i we tegele kɛlɛ an lɛ Anlé we drɔle valé anlé we wéiin yɛrama.

¹⁰ ’I mi nyanénu lé wenaané kɛlɛle glɛ dɔ Yé ’i mi tegele dɔ gligli, Bale tegele, bii ɛ mi bli valé a giwe gi daan.

¹¹ Bale a an takuunzan nya, Yee ɛ mi drɔlenu sié we gi.

¹² Bale a weblezan tegele nya, Bale bli éé flian bléyi faa va.

¹³ Dé mi nyané ’ka é bli nɔlaan lo, é ’élé gwɔun lɛ vɔa, É ’élé sa ganaan yé éé a vulina ginian.

¹⁴ É ’élé migyɛ dinwɔlɛnu vulian a vazia, Yé éé kyɛ vɔa élé sawɔlɛnu ’léé.

¹⁵ Bé ye, mi nyané éé wenaané ma ’lɛra, Éé weple bɔn sié, yé éé vié yaan,

¹⁶ Éé migyɛguru boo, éé a lɛ soo, Yé migyɛguru lé é a bo bɛ, éé diaan a gi.

¹⁷ Alé weple éé nɔlaan yeeboen ta, Yé alé glawe éé zunwo abozen yarapɛla.

¹⁸ An dan Gakelebale tɔ bɔ lɛ alé we tegele ma, An dan Loruzan Gakelebale tɔ vɔ lɛ lɛrɛ nya.