Lɛrɛvɔ Sɛbɛ 68 - Kazambale lé Sebe Sauunu 1979

Guliwuo vole wo lɛ lé lɛrɛ

¹ David lɛrɛ ’ko vɔle gɔɔn lɛrɛvɔmunu zilɛzan lɛ. David zé lé. Pisɔmé lé. Bale tɔbɔlɛrɛ lé.

² Dé Bale nwa, a nyanézannu éé kinié ékema, Yé a mazannu éé fwilaan a ’lɛ.

³ Mi nyanénu ta éé saan Gakelebale ’lɛ, Wo zuo éé dirian bélé kyɛgoi lé a zuo éé dirian, a zo; Wo ’yi éé boo bélé zɔrɔyoduo zo.

⁴ Naa, mi tegelenu gi éé nanaan, woo kɛla a ’wuovolɛzannu nya Bale ’lɛ, Wo gi éé nanaan fɔɔ nɛnɛbole nya.

⁵ ’Ka lɛrɛ vɔ Bale lɛ, ’ka a tɔ nwa. Mian é ke giéna fɛna pɛblɛɛ zi, ’ka zi ta gyɛ a ’lɛ. A tɔ lé Gakelebale, ’ka zana gyɛ a ’lɛ.

⁶ Ti valé bu galazannu ti lé; zanagalalomu takuunzan lé, Yee ɛ ke Bale lé é ke é nyanale fɛna ’lɛzan na, a nya.

⁷ Munu lé munu sɔn vɔ wo ma, Bale éé wo lele no, Éé luunu voo woboma yé éé wozé kɛla néné; Tɔnégiplɛplɛmunu woo nyanaan tɛrɛ gale ta.

⁸ Oo Bale, dé i dɔ ilé munu ’lɛ, Yé i tawo nyéné saa lé fɛna, ka ye do,

⁹ Tɛrɛ ma nyɔɔn, lanu fee gyɛ Bale ’lɛ. Sinai gɔ ma nyɔɔn Bale ’lɛ, Izraɛl lé Bale ’lɛ.

¹⁰ Oo Bale, i fɛ dɔ lɛɛ zin pa zia, Ilé tɛrɛ lé a fuu si a ta, bé fuu dɔ a ta.

¹¹ Oo Bale, tɛrɛ lé bé ma’lɛrɛ ilé zin nya wenaané bɔmazannu zé nya, Ilé munu wo nyanana kɛlɛ a ta.

¹² Mizan dére do fe, Nwunvɔlomu lé wa zuo fé, wa mi gu blɛn nya.

¹³ Sunyanu nwiinzannu fwi; wo lu kini. Lezan lé é vo kɔn ’léé, éé gulizarafɛnu gulian.

¹⁴ Naa, bléyian va lé ka nyanaan ’blagɔrɔnu méléna ’Té plala bɛanu ta a é sɔɔlale gɔɔlifu nya, Yé a kyɛɛnu nyɔɔ a bélé kyan zo nyananyana.

¹⁵ Dé Plɛplɛfaazan Bale minwiinzannu kini ékema tɛrɛ la, Tɛrɛ é dan kɛlɛ lɛ fu bélé Salmɔn gɔ ta glasépun zo.

¹⁶ Bale lé gɔblɛnnu, Bazan lé gɔblɛnnu, Gɔblɛnnu lé wo nwiin ke kiɛre, Bazan lé gɔblɛnnu,

¹⁷ Gɔblɛnnu lé ka nwiin ke kiɛre, mɛmalé ka maawoo Gɔblɛn lé Bale a si a va é nyanana nya, a maa? Iin, Gakelebale é dan nyana lɛ a nwiin lɛɛfaama, a glɛ ’ka lo.

¹⁸ Woo Gakelebale lé goronu nɔnɔan baa vu vu ’léé, Baa wuru é wuru ’léé nya; Mizan a wo worona, é si Sinai gɔ nwiin yé é wɔra é nyanana ’lɛzan na.

¹⁹ Bii ɛ gié gɔ ta loru, bii ɛ go guligyɛzannu nya i lee, I ’wii munu ta, Oo Gakelebale, yé i go tɔnégiplɛplɛmunu nya ilé fɛna.

²⁰ ’Wo Mizan drɔɔ vo yi faa do do ma. Dé wo ko kele, Bale éé ko sié wo lee. Ka ye do.

²¹ Bale a ko siémunuleezan nya, Yé Gakelebale, Mizan, é bɔa ko sole lɛ gale lee.

²² Iin, Bale é dan é nyanézannu ’wuo ’wii lɛ, Munu lé woo ’wolé tɛrɛla kɛla wenyané kɛlɛle nya, é dan wo bɛlo fɔn lɛ.

²³ Mizan léma: Maa dan wo si lɛ Bazan yé an da wo nya, Maa dan wo si lɛ wɛyi wɔlɛ ma yé an da wo nya,

²⁴ Yé i i gane vɔ nyɛ va, Yé ilé blénnu é dan i nyanézannu nyɛ flan lɛ.

²⁵ Oo Bale, woo i giéna yé, Woo anlé Bale, an nwiinzan lé tawobɛ yé fɛna sauun na.

²⁶ Lɛrɛvɔzannu ɛ ke zi ’lɛ, yé flingyɛzannu a ’bɛnu zuo, ’Té poogyɛblɛnnu a wo méléna.

²⁷ ’Ka Bale drɔɔ vo zén‐ékevamunu va, Izraɛl kulunu, ’ka Mizan drɔɔ vo.

²⁸ Bé ye, wo faa voélazan Bɛnjamɛn ɛ ke wo ’lɛzan nya, ’Bɛ zuo Juda nwiinzannu valé ’wolé palunu lé; Zabulɔn nwiinzannu koo, Néfitali nwiinzannu koo, ’bɛnu ɛ ke ’bɛnu zuo.

²⁹ Ilé Bale léé: ’I plɛplɛ ye ma; Baleoo, Bale, we lé bé kɛlɛ ko lɛ, ’bé ta plaa ma.

³⁰ I nyanaan i bangikɔn gi, ’té i plaan Jérusalɛm nwiin; Minwiinzannu é dan da lɛ blɛnu nya i lɛ.

³¹ I kana blɛn zén gyan gi winu gi, Wo valé dirigɔnénu palu valé munu lé dirinénu gi, Wozannu éé diaan i ’lɛ, gɔɔlifu nya wo lee. Munu lé gulidanle sɔ wo lɛ, ’i wo kini ékema.

³² Mi blɛnnu éé sié Éjipiti tɛrɛ la; Étiopi tɛrɛlamunu éé dan vlan nya, ’té wo bɛ a é soile Bale vazia.

³³ ’Kaa munu lé Kazambale ke é plale ka nwiin, ’ka lɛrɛ vɔ a lɛ, ’Ka Mizan tɔ nwa. Ka ye do.

³⁴ Mian éé giéan é ’lɛzia lanu gi, lanu lé wo ’ka nyaan pelo, wo gi, ’ka lɛrɛ vɔ a lɛ. Ka ye, é we fe yé wa dére ’ma; a dére plɛplɛ lé wa ’ma.

³⁵ ’Ka Bale kɛlɛ blɛn. Alé fuasan a Izraɛl ta, yé alé plɛplɛ a la gi.

³⁶ Oo Bale, i nyanaan ilé fɛna sauunna, yé i kana zén‐é munu gi. Izraɛl lé Bale éé gla valé plɛplɛ no élé munu lɛ. Bale drɔɔ ’é vo ma.