Lɛrɛvɔ Sɛbɛ 66 - Kazambale lé Sebe Sauunu 1979

Bale tɔbɔlɛrɛ lé

¹ David lɛrɛ ’ko vɔle gɔɔn lɛrɛvɔmunu zilɛzan lɛ. Bale tɔbɔlɛrɛ lé. Lɛrɛ do lé. Ka faa lé, ka ke é nyanale tɛrɛ la, ’Ka siaa Bale lɛ ginanale nya.

² ’Ka alé fua tɔ vɔ lɛrɛ nya, ’Ka alé fuasan nwa a tɔ zin fele nya,

³ ’Ka fe Bale lɛ léé, i panyanamanu woo kana zén‐é mi gi. Ilé plɛplɛ blɛn zama i nyanézannu éé blaané dére fé i lɛ.

⁴ Tɛrɛlamunu faa éé diaan ’wo bli la i ’lɛ, yé woo i tɔ bɔa lɛrɛvɔle nya, Yé woo i tɔ sian lɛrɛ nya.

⁵ ’Ka da, ’ka ’wuogibɔrɔ Bale panyanamanu ma. Dé é we kɛlɛ blaminu lɛ, éé kana zén‐é munu gi.

⁶ É wɛyi nɔla tɛrɛ gale nya, Wo yuu kini wo gane la, Yé ko gi nana a gi.

⁷ Alé plɛplɛ nya lé éé plaan munu nwiin, Éé bɛnnu naginian é yuɛ nya, Té tɔnégiplɛplɛ munu é nwa lo ma. Ka ye do.

⁸ Bɛngɔnɔnu, ’ka kolé Bale drɔɔ vo, Kalé a tɔ zin fele zuogi ’é go ma.

⁹ É kobozen vo é yuɛma, Yé é ’ka nyi si lɛ léé, ko saan lo.

¹⁰ Oo Bale, naa, i ko gi dan Bélé fɛan zo lé woo gɔɔlifu selean kyɛ ta, a zo.

¹¹ I ko kun séli nya, I kɔné bɛnzan dɔ ko nwiin,

¹² Bé kɛlɛ léé, munu é pla ko nwiin; Ko gié kyɛ valé ’yi va, Naa, i ko si we ’konu gi fɛ kiɛre nɔle ko lɛ we ma.

¹³ An dan go lɛ ilé kɔn gi balebanwi lé wa kyɛ blé, a nya. Anlé balekundérenu lé maa a fe i lɛ, an dan wo lɛ sɔɔ lɛ;

¹⁴ We fele we ma lé an ’léé fuo, Yé anlé kleblebléyi va lé maa wo fe.

¹⁵ Maa dan ’bla nyɔnɔzannu nɔ lɛ i lɛ, balebanwi lé wa kyɛ blé, a nya, Yee valé ’blagɔnénu nyɔnɔ nya; Maa dan saraka bo lɛ ’blanu valé boligɔnénu nya. Ka ye do.

¹⁶ Ka faa lé ka kanaan Bale lee, ’ka da, ’ka tɔné dɔ, Yé we lé é a kɛlɛ an boen lɛ, maa dan a zuo fe lɛ.

¹⁷ An siaa a lɛ, Yé a tɔ zin fele bɔra an nɛnɛ ta.

¹⁸ Dé é kɛlɛ kɔɔn léé, weple é vo an bli gi, ’Té Mizan ’ka anlé bazorole nyi sié lo.

¹⁹ Naa, Bale a nyi si, Yé é anlé bazoro dére ban é tɔné nya.

²⁰ Bale ’ka sɔn vɔ lɛ anlé bazorole ma lo, Yé é ’ka zin kɛlɛle an lɛ yi ga lɛ lo. Amalé Bale drɔɔ ’é vo ma.