Lɛrɛvɔ Sɛbɛ 56 - Kazambale lé Sebe Sauunu 1979

Pale Bale ta lé bazorole

¹ David lɛrɛ ’ko vɔle gɔɔn lɛrɛvɔzannu zilɛzan lɛ. Lɛrɛvɔafɛ lé wa laama plala lé ke térébɛnt yili nwiin baa, ’wa vɔ a va. Bale tɔbɔlɛrɛ lé David a vɔ, bléyian va lé Filisitinu a kun Gat, yee lé.

² Baleoo, Bale, ’i nyanai zén an ta, naa, munu a an blana bɛ nyané wo; Yiéyi bléyi faa va woo guli daan an va, yé woo nyané paan an ta.

³ Yiéyi bléyi faa va an mazannu an blaan bɛ nyané wo; Wa di; woo guli daan an va bélé boblɛnzannu zo.

⁴ Dé kana a an gi, An paan bii ɛ ta.

⁵ An dan anbo tɔ bɔ lɛ Bale gi, a dére lé we ma; An paan Bale ta; maa ’ka kanaan fɛ do lee lo. Munu é bɔa mɛ we kɛlɛle lɛ an lɛɛ?

⁶ Bléyi faa ma woo an dérenu vɔɔan, Wolé ’wuogibɔrɔlenu a wenyané saa nya an ma.

⁷ Woo dére paan do, woo an ma vɔɔan, woo an pa boo, É sɔ wo lɛ léé, ’wo an gyɛ, azama.

⁸ Wo bli a a lɛ léé, wolé weple kɛlɛle nya lé wo dan so lɛ we lee; Baleoo, Bale, ’i migɔnɔnu zun i bliflile nya ma.

⁹ Nɔɔnu lé maa a wo tɛrɛ la, i wo nɔnɔan; ’I an yuɛyi zén ilé kuo gi; Wolé we ’ka é gyɛle ilé sɛbɛ gi loo?

¹⁰ Yian nya lé an siaan, an nyanézannu woo po yélié; Maa a gi dɔɔ léé, Bale péli a an va.

¹¹ An dan anbo tɔ bɔ lɛ Bale gi, a dére lé we ma; An dan anbo tɔ bɔ lɛ Gakelebale gi, a dére lé we ma.

¹² An paan Bale ta; maa ’ka kanaan fɛ do lee lo. Munu é bɔa mɛ we kɛlɛle lɛ an lɛɛ?

¹³ Oo Bale, maa i kun dérean nya, é a lé maa a lɛ sɔɔ; Maa dan i bɔ vɔ lɛ.

¹⁴ Naa, i an boen so gale lee, I an ganenu dɔ gligli léé, té wo buu lo, Léé, an tawo Bale ’lɛ vole é yuɛma lé san gi.