Lɛrɛvɔ Sɛbɛ 55 - Kazambale lé Sebe Sauunu 1979

Mi lé a béé a liwo, alé bazorole

¹ David lɛrɛ ’ko vɔle gɔɔn lɛrɛvɔzannu zilɛzan lɛ. Kɔnɔ lé a balenu ke, ’wa gyɛ a va. David zé lé.

² Kazambaleoo, Bale, ’i anlé bazorole ban i tɔné nya, Té i yɔɔ anlé nyanainya dére ma lo.

³ ’I tɔné dɔ an lɛ yé bé zi pa. An vo nɔɔna anlé blikyɛdɔle gi, ’té an ma éé nyɔɔn‐an,

⁴ An nyanézannu valé mi nyanénu lé yaale an ta we ma; Naa, wo we tɔntɔn bɔ an ma, Yé wo an zuo bin bliflile nya.

⁵ An zuru éé diaan an gi, Yé gale lé kana nyɛ ’wii an zuru va.

⁶ Kanale valé di kinile an gi an kunwo, An ma faa éé nyɔɔn‐an.

⁷ Yé maa léé: Oo, dé é a kɔɔn lé an bɛa é vo bélé plala zo, ’Té an si yé an bɔ an flinna;

⁸ Bé ye, maa dan fwi lɛ baa, Maa dan nyana lɛ nyéné saa lé fɛna. Ka ye do.

⁹ ’Té an so wo lee é kele, ’Té an si ana bélé lu zana fu zo, bélé fu giéle plɛplɛ zo.

¹⁰ Mizan, ’i wo dére sɛrɛ tata; ’i wo dére kini ékema. Naa, maa a ye léé, woo glawe kɛla fla, ’té woo zɔ dɔa;

¹¹ Tu valé é kinile ma, munu éé giéan flazigɔrɔ ta loru; Weple valé we lɛrɛlɛrɛ kɛlɛle wo kun,

¹² Wenaané kɛlɛle a fla, Mi saan dére valé dablidére ’ka sié fla ’ko vuunnu la lo.

¹³ Mian éé an ma we sɛra, an nyanézan kaan lo; dé é a kɔɔn ’bɛ nya, ’té maa ’wuo dɔ a wuo; Mian éé nwaan an ma, an mazan kaan lo, Dé é a kɔɔn ’bɛ nya, ’té maa yɔɔ a lee.

¹⁴ Biian maa valé bii bɔ ékema, Biian i ke an yuɛgibɔzan valé an béé nya, bii lé.

¹⁵ Ko nyanaan ékeva, ’té ko ko ke giwe fé ko ke lɛ bli drɔɔ nya. Ko goo migu va Bale lé kɔn gi.

¹⁶ Gale ’é bɔra wo ma fiaa ma, Yé ’wo go migalenu nyanana é yuɛma ma. Naa, wenaané a wolé kɔn gi, wo méléna.

¹⁷ Yé maa, an siaan Kazambale lɛ, Yé Gakelebale é dan an si lɛ we gi.

¹⁸ É nyanadi, é bladi, é yiéyi, an bakinimaflin woo, ’té maa dunnuan, Yé é dan an dére ’ma lɛ.

¹⁹ Wo lé wo bié an ma, é dan an si lɛ wo lee, yé é dan vole drɔɔ nɔ lɛ an lɛ, Naa, an mamunu a di.

²⁰ Bale é dan a ’ma lɛ, yé é dan wo kɛlɛ lɛ kiéné, Yee lé é ke é nyanale élé webleblin ta yifaama, a glɛ ’ka lo. Ka ye do. Naa, wo kɛlɛwe ta ’ka vɔɔan lo, Yé wo ’ka kanaan Bale lee pelo.

²¹ Munu lé wo ke wo nya drɔɔ bɛ, éé bɛ nwaan wo ma, Gipawe lé wa kɛlɛ, é a sɛrɛ;

²² A nɛnɛ la a néné bélé zɔrɔnyɔnɔ blagi lé, Naa, guli a a bli gi; A dérenu a yɔrɔyɔrɔ bélé nyɔnɔ zo, Naa, wa bélé gwɔun lé wa soo é kɔlɛ gi, a zo.

²³ ’Ilé we bɛ pa Gakelebale lee yé é dan bɔ lɛ i va, É ’ka dan mi tegele vo lɛ léé, é saan lo.

²⁴ Yé bii, oo Bale, i dan wo zun lɛ guru wɔlɛ ma; Nyɛ zanamunu valé misaandére fezannu, I dan wolé tɛrɛla lɛɛ lɛ do bɔi lɛ a ta. An paan bii ɛ ta.