Lɛrɛvɔ Sɛbɛ 51 - Kazambale lé Sebe Sauunu 1979

David zanté vɔ Bale lɛ

^1-2 David lɛrɛ ’ko vɔle gɔɔn lɛrɛvɔzannu zilɛzan lɛ. Bléyian va lé David go Bat‐Sééba va, ’bɛ zuo yé balelayezan Natan da a va.

³ Baleoo, Bale, ’i bli kɛlɛ an ma drɔɔ ilé zin yɛrama, ’I anlé bélidɔwe sɛrɛlenu fwi ilé nyanai zénle blɛn yɛrama;

⁴ ’I an zuru tata yé ’i anlé weple si an ma, ’I anlé wenyané si yé ’i an gi bɔ.

⁵ Naa, maa anlé bélidɔwe sɛrɛlenu dɔɔ, Yé anlé wenyané sele a an gi bléyi faa va.

⁶ Maa wenyané kɛlɛ bii do ɛ ma; Yé we lé é ke é naané i yuɛ gi, maa a kɛlɛ, Amalé i we ’wuo dɔa tegele, Gun ’ka ilé weblele ma lo.

⁷ An bu an bɔn si wenyanékɛlɛzan nya, Bé ye, an bɔra weple nya an lee.

⁸ Naa, é sɔ i lɛ léé, webozen ’é kɛlɛ mi bɔn gi, Amalé ’i wedɔɔle paa an gi.

⁹ ’I an gi bɔ izopéyilibɛ nya, yé maa kɛlɛ tata; ’I an zuru yé an kɛlɛ fu bélé kununu lii zo.

¹⁰ ’I ginanale valé fɛti kɛlɛle vun we, maa ’ma, Yé an wɔlɛnu lé i wo yéli bɛ, ’wo dɔ é ke ’léé yé an gi ’é nana ma;

¹¹ ’I anlé wenyanénu si ana, ’I anlé weplenu faa fwi.

¹² Baleoo Bale, ’i bli dɛrɛ bɛ nɔ an lɛ, ’I léli zin nɔ an lɛ é ziin.

¹³ Té i an si i ma baa lo, Té i i léli sauun si an gi lo.

¹⁴ ’I ilé mibélile ma gi nanale nɔ an lɛ é ziin, Bli lé ke é zima munu vazia, ’bé vɔ an gi.

¹⁵ Maa dan ilé we paa lɛ wenyanékɛlɛzannu gi, Yé wenyanékɛlɛzannu é dan da lɛ i va.

¹⁶ Baleoo Bale, an Siéwegibale, ’i mi nyɛ si an bɛ ma, Yé maa dan i tɔ nwa lɛ ilé nyanai zénle ma.

¹⁷ Mizan, ’i an ’léé fuo, Yé an dan i tɔ zin fele zana dɔɔ lɛ.

¹⁸ Dé é a kɔɔn léé, i a sarakanu va, ’té maa a bo i lɛ; Naa, balebanwi lé wa kyɛ blé, é ’ka i gi nanaan lo.

¹⁹ Dé mi léli si é ta élé wenyané ma, ’bɛ a saraka lé é sɔ Bale lɛ, a nya; Baleoo, Bale, mi lé a bli gi kyɛ dɔ fɔɔ yé é so a kɔlɛ zi, i ’ka serele boo ’bɛ ma lo.

²⁰ ’I wezin kɛlɛ Siɔn lɛ ilé zin nya, ’I Jérusalɛm zi gɔrɔ bo.

²¹ Yé i dan saraka tegelenu nyi si lɛ, Balebanwi lé wa kyɛ blé, ’bɛ valé wi lé wa no é boo nya, i dan wo si lɛ, Yé wo dan i ban lɛ dirigɔnénu nya, i banna.