Lɛrɛvɔ Sɛbɛ 50 - Kazambale lé Sebe Sauunu 1979

Bale bɔle bozen

¹ Lɛrɛ lé Azafa a vɔ. Bale, Bale, Gakelebale, i we fe yé i tɛrɛlamunu laa, Bé pélisia yirinwanazia fɔɔ yé é bɔ yirivɔna.

² Siɔn lé é ke é nɔnɔmi, ’té gun ’ka a ma lo, Ana lé Bale élé fua tagɔɔn‐an.

³ Kolé Bale a dana, é ’ka voo é tadɔle lo; Kyɛ a blena a ’lɛ, Lɛɛdafu plɛplɛ a zi lɛ sɔɔan.

⁴ É a la valé tɛrɛ laana, Élé munu lé weblele we ma;

⁵ É léma: ’I anlé yarapawelazannu zén ékema an va, Wo lé wo gi pa an va do saraka bole nya.

⁶ Yé lanu é dan alé we tegele zana dɔɔ lɛ, Naa, Bale ɛ ke weblezan nya. Ka ye do.

⁷ Anlé munu, ’ka tɔné dɔ yé maa dan we fe lɛ ka lɛ; Izraɛl, maa dan we lɛ kini lɛ ka lɛ. Maa a Bale nya, ilé Bale nya.

⁸ Kalé sarakanu bole ma‐an an we pla ka lɛ yara tɔntɔn nya lo; Kalé balebanwi lé wa kyɛ blé, a gini a an gi yifaama.

⁹ Maa ’ka dan ilé kɔn gi dirigɔné do si lɛ lo, Maa ’ka dan boligɔnénu si lɛ ilé wikɔn gi lo.

¹⁰ Naa, pɔrɔ gi winu faa a anzé nya, Winu ’léé kiɛre lé ke gɔ blɛnnu nwiin bɛ, wo faa a anzé nya.

¹¹ Maa gɔblɛnnu ta mianénu faa dɔɔ, Fɛ faa lé woo kɔɔan bwii, wa anzé nya.

¹² Dé lɔrɔ a an gyɛna, maa ’ka dan a fe lɛ i lɛ lo, Naa, tɛrɛ valé é tafɛnu faa a anzé nya.

¹³ An dirigɔnénu wi bléé? An boligɔnénu nyɛ miniaan?

¹⁴ Bale bɔvɔle ’é kɛlɛ kalé saraka bole nya ma, Yé’i ilé balekunle lɛ sɔɔ Loruzan lɛ.

¹⁵ Kleble yi nya i an ’laa; Maa dan i si lɛ munu lee, yé i dan an tɔ zin bɔ lɛ.

¹⁶ Yé Bale lé mi nyané lɛ léé: É kɛlɛ kaa yé i voo anlé bélidɔwenu nɔnɔna, Yé anlé gipawe a i ’léé?

¹⁷ Biian anlé wepaale za ke i gi loo? Yé biian i an dére vuli i zuo loo?

¹⁸ Dé i kyeenwozan ye, i nanaan a va, Yé bii valé leginimunu péli a do.

¹⁹ I ’léé fuoan wenaané fele nya, Yé i nɛnɛ éé dabli dérenu fé.

²⁰ I nyana, yé i wenu fé i bwe ma, I yaragyɛwe bɔa i bu be ma.

²¹ I kɛlɛwenu lé ke bɛ, yé an vo é tadɔle, É dɔ i gi léé, maa a bélé bii zo; Naa, maa dan we fe lɛ i lɛ yara tɔntɔn nya, yé maa dan ilé we faa bɔra lɛ i lɛ.

²² Kaan ka gi éé saan Bale ma, ’ka yuɛ pa kabo va ma; Dé an da ka wi kini ékema, ’té mi do ’ka ka sié an lee lo.

²³ Mian éé an baan an bɔvɔle nya, éé an tɔ zin bɔa, Yé mian éé yuɛ paan élé tawobɛ va, Fɛan zo lé Bale éé mi sié we gi, maa dan a gɔɔn lɛ a lɛ.