Lɛrɛvɔ Sɛbɛ 5 - Kazambale lé Sebe Sauunu 1979

Mi ta béli dɔle ma bazorole

¹ Lɛrɛ do lé David a vɔle gɔɔn lɛrɛvɔmunu lɛ. ’Wo séén fɛn a va.

² Gakelebaleoo Bale, ’i tɔné dɔ an dérenu lɛ. ’I an dunnulenu ’ma ma.

³ An nwiinzan, anlé Bale, ’i anlé siaalenu ’ma ma. Naa, an bazoroan bii ɛ lɛ.

⁴ Gakelebale, i an dére maan é bladi, Bladi an yara nɔlaan i vazia, yé maa i naginian.

⁵ Naa, Bale lé a gi éé nanaan wenaané ma, ’bɛ ’ka i nya pelo; Mi nyanénu ’ka nyanaan i sɔnɔ lo.

⁶ I yuɛ ’ka tavomunu ta lo; Munu faa lé woo weple kɛla, wo za a i gi.

⁷ I zamaga dɔa viézannu nwiin; Munu lé woo mi nyɛ zanaan, ’té woo dabli kɛla, Gakelebale ’ka wo yé mi nya lo.

⁸ Naa, maa, i nyanai zénle blɛn lé we ma lé an goo ilé kɔn gi. An diaan an bli la ilé kɔn sauun gi kana nya an gi.

⁹ Gakelebale, ’i go an nya ilé we tegele gi an nyanézannu lé we ma, ’I ilé zi ta bɔ ékema an gane wuo.

¹⁰ Naa, dére tegele do kpen ’ka sié wo ’léé lo, Wo bli a é fanle mi blifliwe nya, Wo bɔrɔ gi a mi vun lɛ sole nya, Yé blaanépadérenu a wo nɛnɛ ta.

¹¹ Baleoo, Bale, ’i wo bla bélé wegyɛzannu zo. Wo gibɔrɔle ’é go wo nya wo saanna. ’I wo nɔ wolé wenyanénu kiɛre lɛ. Naa, woo nwaan bii ma, bɛzama.

¹² ’Té munu faa lé wo pa i ta, wo gi é dan nana lɛ, Ginanale lé éé giéan é glɛ ta, é dan kɛlɛ lɛ wo gi yifaama, yé i dan wo takuun lɛ; Wo lé i tɔ sɔ wo lɛ, I dan kɛlɛ lɛ wo ginanamazan nya.

¹³ Naa, Gakelebale, i mi tegele drɔɔ voo. Bé zi lɛ sɔɔan bélé mitakuunfɛ zo.