Lɛrɛvɔ Sɛbɛ 48 - Kazambale lé Sebe Sauunu 1979

Bale lé fla blɛn, Siɔn

¹ Bale tɔbɔlɛrɛ do lé. Lɛrɛ lé Koré benu a vɔ, yee lé.

² Gakelebale a blɛn, yee lé wa tɔ zin fé yifaama, Kolé Bale lé fla, ’té é ke gɔblɛn sauun nwiin bɛ, ana.

³ Gɔ ’ko a é nɔnɔmi, éé tɛrɛlamunu faa gi nanaan, Siɔn gɔblɛn lé. A san do lé é ke yirinwana bɛbolazia, minwiinzan blɛn lé fla a ’bɛna.

⁴ Kazambale lé é ke élé fuakɔn gi, wa dɔɔ léé, é a mi yɔɔna plɛplɛ nya.

⁵ Naa, bé ye, minwiinzan blɛnnu zén ékeva, Yé wo bié ékeva,

⁶ Wa nagini yé wo gi faa vuru ’wo ma, Wo kana yé wo fwila.

⁷ Wo ma kun nyɔɔnle ma, Bélé lezan lé é ke né yaana, alé nyané blele zo.

⁸ Wo wo bin bélé Yirinwanazia fu lé éé Taasis lé ’yitagoronu ’wiié, a zo.

⁹ We lé wa zuo fe yé ko a ’ma, yee lé ko ye, Lai sunyanu lé Gakelebale lé fla, Kolé Bale lé fla; Bale é dan Jérusalɛm dɔ lɛ gligli yifaama. Ka ye do.

¹⁰ Oo Bale, ko bɔn‐in bɔrɔan ilé zin ma Ilé kɔn sauun gi.

¹¹ Oo Bale, fɛan zo lé i tɔ éé goo baa, A zo duo lé i tɔ zin fele zuogi éé goo fɔɔ tɛrɛ glɛ sina; I bɛyi a we tegele saa kɛlɛbɛ nya.

¹² Siɔn gɔblɛn tamunu gi éé nanaan, Juda lé tɛrɛla blɛnnu gi éé nanaan é baba, Ilé weblelenu lé we ma.

¹³ ’Ka gié Siɔn lé fɛna, ’ka gié a zi, ’Ka alé kɔn torolenu nɔnɔ,

¹⁴ A zi gɔrɔnu lé wo boro ke, ’ka nagini. ’Ka alé fuakɔnnu gi gini é zima, A zuo fele mi kulunu lé wo dan da lɛ bɛ, wo lɛ we ma.

¹⁵ Bale lé é ke kolé Bale nya lɛɛfaama a glɛ ’ka lo, yé é ’ka nyaan monomono lo, yee lé ke bɛ. Yee ɛ dan zi gɔɔn lɛ ko lɛ fɔɔ yé é bɔ ko gayi ma.