Lɛrɛvɔ Sɛbɛ 42 - Kazambale lé Sebe Sauunu 1979

SEBE FIÉZAN (Lɛrɛvɔle 42–72) Mi lé wa si élé tɛrɛ la gla nya, alé bazorole

¹ David lɛrɛ ’ko vɔle gɔɔn lɛrɛvɔzannu zilɛzan lɛ. Bale tɔbɔlɛrɛ lé Koré kulunu ɛ vɔ.

² Fɛan zo lé vɔlɛ éé flin‐é ’yi lé éé yoroan, a minilɔrɔ nya, Oo Bale, a zo duo lé an boen éé flin‐é i yelɔrɔ nya.

³ Bale, Bale yuɛmale, i lɔrɔ an boen gya. Mɛ yi la léé, maa dan go lɛ yé maa Bale yara yee?

⁴ An yuɛyi kɛlɛ anlé fɛblele nya é yiéyi valé é béli, ’Té wa fé an lɛ bléyi faa ma léé: Izé Bale a kyɛɛn?

⁵ We lé ko kɛlɛ yi la, dé a sele dɔ an gi, ’té an bli sɛrɛ an gi, Dé maa a tawona mi gu va, ’Té maa a wo ’lɛ, ’té ko go Bale lé kɔn vazia, ’Té fɛti kɛlɛmunu Woo siaan ginanale valé Bale bɔvɔle nya; Dé a sele dɔ an gi, ’té an bli sɛrɛ an gi.

⁶ An boen, mɛmalé i fuu éé sié i ta yé i dunnuma an gii? I bli ’é vo Bale lɛ; naa, maa dan a tɔ zin fe lɛ é ziin, Yee ɛ ke an Siéwegizan valé anlé Bale nya.

⁷ Anbozen fuu faa a é sile é ta, Bɛwemalé dé maa a Juudɛn tɛrɛ laoo, Dé maa a Eɛmɔn gɔ valé Miséaa gɔ maoo, an bɔn‐in bɔrɔan bii Bale ɛ ma.

⁸ Wɛyi nwale do éé wɛyi nwale do laan, ’té ilé ’yi blɛnnu éé gi wé; Ilé wɛyi nwalenu faa valé ilé wɛyi fɔrɔlenu faa éé diaan an ta.

⁹ É yiéyi Gakelebale éé zin kɛla an lɛ; É béli maa a tɔ zin fé lɛrɛnu nya, An bazoroan Bale lé éé an voo é yuɛma, a lɛ.

¹⁰ Bale, anlé gɔlɛgɔ, maa lé i lɛ léé: Mɛmalé i gi saan an maa? Mɛmalé é a lé maa tawoo bli kyɛdɔle nya, ’Té an nyanézan éé yaan an taa?

¹¹ Dé nyanépa‐antazannu a an sɔnɔna, ’té wa fé an lɛ yifaama léé: Izé Bale a kyɛɛn? É so an wɔlɛ zi.

¹² An boen, mɛmalé i fuu éé sié i ta yé i dunnuma an gii? I bli ’é vo Bale lɛ; naa, maa dan a tɔ zin fe lɛ é ziin, Yee ɛ ke an Siéwegizan valé anlé Bale nya.