Lɛrɛvɔ Sɛbɛ 41 - Kazambale lé Sebe Sauunu 1979

Gyɛamazan lé bazorole

¹ Lɛrɛvɔzannu nwiinzan zé lé. Lɛrɛ do lé David a vɔ.

² Mian éé gibɔrɔan nyanégyɛzannu ma, azé a néné. We tɔntɔn bɔyi nya, Gakelebale a sié we gi;

³ Gakelebale éé yuɛ paan a va yé éé a vo é yuɛma. Azé a néné tɛrɛ la, Yé i ’ka dan a pa lɛ é nyanézannu lee yé wo ’wolé sɔlɛwe kɛlɛ a lɛ lo.

⁴ Gakelebale éé bɔa nyanéblezan va élé yialafɛ ta; Bé tɔrɔ paan alé gyɛnu faa gi.

⁵ Maa léé: Gakelebale, ’i nyanai zén an ta. ’I an boen béli; naa, an wenyané kɛlɛ i ma.

⁶ An nyanézannu éé dére nyanénu fé an ma léé: É dan ga lɛ mɛ bléyi vaa? A tɔ é dan nyaa lɛ tɛrɛ la mɛ bléyi vaa?

⁷ Dé mi do da we lɛ an va, éé dabli dérenu fé, ’Té éé voo an ma wenaanénu ginina, Léé, dé é bɔra béera ’té éé an glewoo.

⁸ An nyanézannu faa woo péli vɔa do yé woo an ma we blé kyeen gi; É dɔ wo gi léé, we tɔntɔn lé é bɔ an ma, é dan anzé nyaa lɛ;

⁹ Wo léé: Gawe a kun, Bé ye é yiale bɛ; é ’ka dan nwa lɛ é dɛrɛ lo.

¹⁰ An béé boen lé, maa an giwe fé a lɛ, ’Té an ke é pale a ta, ’té éé fɛ blé an va bɛ, Yee ɛ é gane tɛɛn nwaan an ma.

¹¹ Bii Gakelebale, i nyanai ’é zén an ta, ’i an dɔ an dɔbɛ gi; Yé maa dan a lɛgi pa lɛ wo ma tegele.

¹² Dé an nyanézan ’ka an kele lɛ lo, ’Bɛ nya lé maa dan a gi dɔɔ lɛ léé, an sɔ i lɛ.

¹³ Anlé we a tegele, amalé i bɔ an va, Yé i an dɔ i ’lɛ yifaama.

¹⁴ ’Wo Gakelebale, Izraɛl zé Bale drɔɔ vo, Lɛɛfaama, té a glɛ é dɔ lo. Amɛɛn! Amɛɛn!