Lɛrɛvɔ Sɛbɛ 40 - Kazambale lé Sebe Sauunu 1979

Bale tɔ bɔ lɛrɛ

¹ David lɛrɛ ’ko vɔle gɔɔn lɛrɛvɔzannu zilɛzan lɛ. David zé lé. Lɛrɛ do lé.

² An Gakelebale lɛbɛn, ’té an bli a a lɛ, Yé a tɔné a é dɔle an lɛ, yé é an siaalenu ’ma.

³ É an gana zamagawo guru gi, Voli wɔlɛ ma; Yé é an dɔ gɔlɛ ta, Yé é anlé tawole dɔ plɛplɛ

⁴ Yé é lɛrɛ dɛrɛ paa an gi, Kolé Bale tɔbɔlɛrɛ lé. Mi kiɛre ’bɛ ye, yé wo kana Gakelebale lee, Yé wo pa a ta.

⁵ Mian éé paan Gakelebale ta, ’Té é ’ka nanaan boblɛnzannu valé viéwozannu va lo, azé a néné.

⁶ Gakelebale, anzé Bale, ilé we blɛnnu valé i gidanmawenu lé Woo wezin kɛla ko lɛ, i wo gi gyɛ. I zoɛ mi ’ka lo. É sɔ an lɛ léé, an ilé we ’konu faa zana dɔɔ yé maa a nwɛɛn fɛfaana, Naa, wo ’léé a kiɛre fɛan zo, an ’ka bɔa wo faa zuo fele lɛ lo.

⁷ I bli ’ka bɔa sarakanu valé blɛnu ma lo, I an tɔné lɛ so; Balebanwi lé wa kyɛ blé, ’bɛ valé wenyané ’yibofɛ, i ’ka wo ma laan an lee lo.

⁸ Yé maa léé, bé ye, an da, Sɛbɛ plinle lé wa gyɛ anzé nya, ’bɛ nya an lee.

⁹ Anzé Bale, é sɔ an lɛ léé, maa ilé blibɔmawe kɛlɛ. Ilé bélidɔwenu a an bli wɔlɛ ma.

¹⁰ Maa ilé wetegele zuo fé mi gu blɛn lé wo zén ékeva, wo va; Bé ye, maa ’ka an lɔlu lɛ taan lo, Gakelebale, i ’bɛ dɔɔ.

¹¹ Maa ’ka ilé we tegele yɔɔan an bli gi lo, Maa ilé webozen valé ilé mi silewe gi zana dɔɔan; Maa ’ka ilé zin valé i yara pale we ta yɔɔan Mi gu blɛn lé wo zén ékeva, wo ma lo.

¹² Bii Gakelebale, i ’ka dan sɔn vɔ lɛ i nyanai zénle ma an ta lo; Ilé zin valé i yara pale we ta, éé an ta bin‐é yifaama.

¹³ Naa, wenaanénu lé wo nɔnɔ ’léé ’ka lo, wo an zi lɛ sɔɔ; Anlé weplenu lé we ma lé wo we lɛdɔ an gi, Yé an ’ka fɛna yé é dɛrɛ lo, Wo ’léé a kiɛre é mini an nwinnu ta. Yé an fuu si an ta.

¹⁴ Gakelebaleoo, Bale, ilé weai, ’i an si we ’konu lee. Gakelebale, ’i da bɔ an va é kele.

¹⁵ Munu lé wa a va léé, wo an gyɛ, Yara ’é wo gyɛ yé wo yuɛ ’é tana ma; Munu lé wa a va léé, an saan, ’Wo gyɛ ’wo zuo yaragyɛwe nya ma.

¹⁶ Munu lé wo ke a fena an lɛ léé: Éé! Éé! Wo ’léé ’é vo é dɔle yaragyɛwe nya.

¹⁷ Munu faa lé woo i naginian, Ginanale lé éé giéan é glɛ la, wo gi ’é nana a nya ilé we ma. Munu lé ilé mi silewe gi sɔ wo lɛ, ’Wa fe léma: ’Wo Gakelebale tɔ nwa ma. Té wo daan a fele ma lo.

¹⁸ Maa a nyanégyɛzan nya, we do ’ka an lee lo, Naa, Mizan éé gibɔrɔan an ma, Bii ɛ ke an bɔvazan nya yé bii ɛ an vo anbo ma. Anzé Bale, té i mɔn lo.