Lɛrɛvɔ Sɛbɛ 38 - Kazambale lé Sebe Sauunu 1979

Nyanéblezan lé bazorole

¹ David a vɔ, we sele dɔle mi gi we ma.

² Gakelebale, té i we lɛdɔ an gi i bliflile nya lo, Té i an bla i wɛwɛ zi lo.

³ Naa, ilé sawɔlɛnu vɔ an ma, Yé i bɛ a é dɔrale an ta klilii.

⁴ I bliflile zama an kɔlɛ do kpen ’ka an ta lo, Anlé wenyané ma lé an wɔlɛnu ’ka plɛplɛ é dɛrɛ lo.

⁵ Naa, anlé weplenu mini an ’wuo lɛ; Wa bélé kɔné bɛnzan zo; wo bɛn mini an ta.

⁶ An manɔnnu nyɛ éé zén‐é yé wo yuunu a wo gi, ’Tu lé an gyɛle we ma.

⁷ Maa a é plinle, an fuu faa a é sile an ta tata, Bladi nyanadi an tawoo bli kyɛdɔle nya.

⁸ Naa, gyɛ naané do an bun‐annu blé bélé kyɛ zo, Yé an kɔlɛ do kpen ’ka an ta lo.

⁹ Anlé plɛplɛ ’ka lo, an wi faa a é sole é ke ’léé. An zuru vɔle bɛ nyané we ma an dunnulenu éé bɔraan an ’léé.

¹⁰ Anzan, i an blibɔmawenu faa dɔɔ, Yé bawuruma flin lé maa a wo, wo ’ka é yɔɔle i ma lo.

¹¹ An zuru éé diaan, anlé plɛplɛ éé sié an ta, Yé an yuɛ va ’ka é kinile é dɛrɛ lo.

¹² An manɔn lé we ma lé an béénu valé an dɔɔzannu éé sié an ma baa, Yé an lelenu ’ka biéan an ma é dɛrɛ lo.

¹³ Munu lé wa a va léé, wo an gyɛ, wo ’wolé sannu pla an wuo; Munu lé wo ke we tɔntɔn bɔle an ma naginina, woo we nyanénu fé an ma, Yé bladi nyanadi woo bɔn‐in bɔrɔan dabliwenu nya an ma.

¹⁴ Yé maa, maa a bélé tɔnéwiizan zo, maa ’ka we maan lo; Maa a bélé bobogyɛzan zo, maa ’ka we do sié a la lo;

¹⁵ Maa a bélé mi lé é ’ka we maan lo, a zo, Bélé mi lé wezivɔdére ’ka a ’léé lo, a zo.

¹⁶ Gakelebale, an bli a bii ɛ lɛ. Anzan, anzé Bale, ’i we an zi.

¹⁷ Naa, yé maa léé, dé an gane saan, té i zi nɔ wo lɛ léé, Wo gi é nana anlé we ma lo, yé té wo nwa an ma lo.

¹⁸ Naa, é vo sɛ yé an dia, Yé anlé nyané blele a yifaama an ’lɛ.

¹⁹ Maa anlé weplenu fé, Yé anlé wenyanénu lé we ma lé kana a an gi.

²⁰ Yé an nyanézannu fuu a wo ta, yé wa plɛplɛ. Munu lé wo an za paan é pla, wa di.

²¹ Woo anlé wezin kɛlɛle lɛgi paan wenaané nya; Maa we zima naginian, amalé wa an mazannu nya.

²² Gakelebale, té i sɔn vɔ an ma lo. Anzé Bale, té i si an ma baa lo.

²³ Mizan, an Siéwegizan, ’I da bɔ an va é kele.