Lɛrɛvɔ Sɛbɛ 37 - Kazambale lé Sebe Sauunu 1979

Mi ple valé mi zin lé we ’wuo plana

¹ David zé lé. Té mi nyanénu lé we é ’na i ma lo, Munu lé woo wenaané kɛla, té i wo ma maawo lo.

² Naa, wo ma éé yuruan é kele bélé lu zo, Yé woo zɔrɔan bélé lu drɔɔdrɔɔ zo.

³ Bii, ’i pa Gakelebale ta, yé ’i wezin kɛlɛ, ’I nyana tɛrɛ la, yé ilé tɛrɛla ’é kɛlɛ drɔɔ.

⁴ Gakelebale ’é kɛlɛ i ginanamazan nya, Yé fɛ lé i bli bɔ a ma, é dan a nɔ lɛ i lɛ.

⁵ ’I ilé we bɛ pa Gakelebale lee, ’Ibo bɛ pa a lee, yé é dan we kɛlɛ lɛ.

⁶ É dan ilé we tegelenu bɔra lɛ bélé san zo, É dan ilé we drɔle bɔra lɛ bélé é yiéyi yiri zo.

⁷ ’I nyana drɔɔ Gakelebale ’lɛ, yé i bli ’é vo a lɛ; Yé mian alé we nyian é wo, té alé we é ’na i ma lo, Yé mi lé é ’é bɔngiwe nyanénu lɛ sɔɔ, té alé we é ’na i ma lo.

⁸ ’I bliflile vo, ’i sɔn vɔ bli tɔntɔn ma, Té we é ’na i ma lo. ’Bɛ éé goo mi nya wenaané gi.

⁹ Naa, wo dan mi nyanénu zana lɛ a gi, Yé munu lé woo bli voo Gakelebale lɛ, tɛrɛ é dan kɛlɛ lɛ wozé nya.

¹⁰ É vo sɛ, ’té mi nyané ’ka é dɛrɛ lo; Fɛana lé é ke é kyɛn, dé bé nagini, ’té é ’ka ana lo.

¹¹ Tɛrɛ éé voo nyanaizénlazannu zé nya, ’Té woo vole drɔɔ boen yé.

¹² Mi nyané éé mi tegele ma we pa dɔa Yé éé suiɛ dɔraan ékela a ma;

¹³ Mizan éé yéri sié mi nyané ma, Naa, é a yé léé, alé yi bɔ é pu.

¹⁴ Mi nyanénu éé gwɔun soo a gi, Woo sa ganaan yé a yili éé plin‐an, Wa kɛla wenaanébɔmazan valé nyanégyɛzan gyɛle za ma, ’É valé munu lé wo ke zi drɔle ta, wo bɔrɔ bole we ma.

¹⁵ Wolé gwɔun éé wɔraan wobozen zuru va, Yé wolé sanu éé yélié.

¹⁶ Mi tegele lé fɛ sɛné fila vɔ É mini mi nyanénu kiɛre lé fɛ di yele ta;

¹⁷ Naa, mi nyanénu bɛ é dan yéli lɛ, Naa, Gakelebale éé mi tegelenu kunwo é zima.

¹⁸ Munu lé wolé we ke tegele, Gakelebale wozé yinu dɔɔ, Yé wolé fua éé voo ana yifaama.

¹⁹ Yara ’ka dan wo gyɛ lɛ we tɔntɔn bɔyi nya lo. Yé lɔrɔ dɔbléyi va wo dan kan lɛ.

²⁰ Naa, mi nyanénu é dan zamaga wo lɛ, Yé Gakelebale nyanézannu é dan san lɛ bélé winu lé lublele zo, Wo ta é dan saan lɛ bélé kyɛgoi zo.

²¹ Mi nyané ɛ drɔn gya yé é ’ka a no lo; Mi tegele ɛ mi mawe dɔɔ yé éé fɛ no.

²² Naa, munu lé Gakelebale éé wo drɔɔ voo, tɛrɛ é dan kɛlɛ lɛ wozé nya Yé munu lé éé bale paan wo ma, wo dan ga lɛ.

²³ Gakelebale éé mi zin gane dɔrana vaboo Yé alé tawobɛ éé sɔa Bale lɛ.

²⁴ Dé é dia é ’ka voo ana lo, Naa, Gakelebale a é kunle a bɛ ma.

²⁵ Maa a é kyɛn mi boroné nya, naa, sin, maa kɛlɛ é kwa; Yé maa ’ka a ye lɛ do léé, Bale é sɔn vɔa mi tegele ma lo, Yé maa ’ka alé nénu ye lɛ fɛ doro pana lo.

²⁶ É a yifaama mi mawe dɔɔzan nya, yé éé drɔn paan; Yé a kulu drɔɔ a é vole.

²⁷ ’I yara si wenaané ta, yé ’i wezin kɛlɛ, Yé i dan nyana lɛ kli.

²⁸ Naa, we tegele sɔ Gakelebale lɛ, Yé é ’ka sɔn vɔa élé yarapawelazannu ma lo; Éé wo tabin‐é yifaama. Naa, mi nyanénu kulu é dan ga lɛ.

²⁹ Tɛrɛ é dan kɛlɛ lɛ mi tegelenu zé nya, Yé wo dan nyana lɛ ana yifaama.

³⁰ Mi tegele lɔlu éé wedɔɔdére fé, Yé a nɛnɛ éé we tegele fé,

³¹ Alé Bale lé bélidɔwe a a bli gi; A gane ’ka dan zi saan lɛ pelo.

³² Mi nyané éé mi tegele mavɔɔan, Yé éé kwa kulian léé, é a gyɛ.

³³ Gakelebale ’ka a voo mi nyanénu lee lo, Yé dé wo alé we ble, Bale ’ka dan a gyɛ lɛ we nya lo.

³⁴ ’I bli vo Gakelebale lɛ, ’i tawo alé zi ta, Yé é dan i kɛlɛ lɛ blɛn tɛrɛ ’ko yele izé nya we ma; I dan mi nyanénu kulu gana ye lɛ.

³⁵ Maa mi nyané ye, ’té alé plɛplɛ faa a a lee, É a bélé yili drɔɔdrɔɔ lé é kwɛɛ vɔ, a zo.

³⁶ É gié, yé bé ye, é ’ka ana é dɛrɛ lo. Maa a gini, yé maa ’ka a ye lɛ é dɛrɛ lo.

³⁷ Mi lé alé we ke tegele, bé gini do; yé mi lé alé we ke é drɔle, bé ye do; Naa, mi drɔɔ kulu é dan kɛlɛ lɛ.

³⁸ Naa, Bale é dan tɔnégiplɛplɛ munu sɛrɛ lɛ tata, Yé é dan mi nyanénu kulu ga lɛ.

³⁹ Mi tegelenu sile we gi éé sié Gakelebale va; É a wo takuunzan nya wolé kleblebléyi va.

⁴⁰ Gakelebale éé bɔa wo va, yé éé wo soo we lee; Éé wo soo mi nyanénu lee yé éé wo sié we gi, Wo wo yɔɔna nagini a va, azama.