Lɛrɛvɔ Sɛbɛ 36 - Kazambale lé Sebe Sauunu 1979

Blami lé wenyané valé Bale lé we zin

¹ David lɛrɛ ’ko vɔle gɔɔn lɛrɛvɔzannu zilɛzan lɛ. Gakelebale wuozan David zé lé.

² Bélidɔwe sɛrɛle éé we fé mi nyané bli wɔlɛ ma; Kanale Bale lee ’ka wo bli gi lo.

³ É ’ébo tɔrɔ paan Élé weple lɛ sɔɔle we ma, ’bɛ valé alé mi zapale lɛ sɔɔle we ma.

⁴ A ’léé dérenu a saandérenu valé dablidérenu nya; Éé sɔn vɔa wedɔɔle valé wezin kɛlɛle ma.

⁵ Éé bɔn‐in bɔrɔan weple nya é yialafɛ ta, Éé dɔa zi lé é ’ka zima lo, a ta, É ’ka sɔn vɔa wenaané ma lo.

⁶ Gakelebale, ilé zin bɔ fɔɔ la gi, I yarapale we la éé goo fɔɔ la ma.

⁷ Ilé we tegele a bélé ilé gɔ blɛnnu zo, Ilé weblelenu a bélé guru blɛɛn zo. Gakelebale, i munu valé winu kunwo é zima.

⁸ Oo Bale, ilé zin wea é baba. Blaminu woo yɔɔna ginian i bɛ wuo.

⁹ Ilé kɔngifɛ kiɛre wo kaan, Ilé fɛ néné no wo lɛ yé lɔrɔ éé sié wo ma.

¹⁰ Naa, vole é yuɛma ’wuo a i va; I san lé we ma lé ko san yé.

¹¹ ’Ilé zin kɛlɛ munu lé wo i dɔɔ, wo lɛ. Yé ’ilé we tegele vɔ munu lé wo bli ke tegele, wo lee.

¹² Té boblɛnzan an zɔn é gane nya lo, Té an fwi mi nyanénu lee lo.

¹³ Weple kɛlɛzannu dia é kwakwa, Wo zana a gi, yé wo ’ka bɔa nwale lɛ lo.