Lɛrɛvɔ Sɛbɛ 35 - Kazambale lé Sebe Sauunu 1979

Bɔle mi va ma bazorole

¹ David zé lé. Gakelebale, ’i an ta guli dan an mazannu va, Munu lé woo guli daan an va, ’i guli dan wo va ma.

² ’I mibotakuunfɛ kiéné valé a blɛnzan si, Yé ’i nwa bɔle an va we ma.

³ ’I din pla valé din blanzan si yé ’i nwa nyané pa antazannu ma. ’Bé fe an boen lɛ léé: Maa a i siéwegizan nya.

⁴ Munu lé wa a va léé, ’wo an gyɛ, yara ’é wo gyɛ ma. Munu lé woo gi bɔrɔan an ma wenyané nya, ’wo gyɛ ’wo zuo yé wo yuɛ ’é tana ma.

⁵ ’Wo kɛlɛ bélé ’sapɛɛ lé fu a sian, a zo ma, Yé Gakelebale lé lanje ’é wo bin ma.

⁶ Gunu ’é dɔra wolé zi ta yé a ta ’é kɛlɛ yɔrɔyɔrɔ yé wo dia, Yé Gakelebale lé lanje ’é wo zuo bin ma.

⁷ Wo séli vɔ an lee, ’té an ’ka we do kɛlɛ lɛ wo lɛ lo, Wo guru blɛn bo anlé tɛrɛla nyaale we ma, ’té an ’ka we do kɛlɛ lɛ lo.

⁸ ’Wo ga za ma ma, ’té wo ’ka we do dɔɔa a gi lo, Yé séli lé wa vɔ, ’é wo kun ma. ’Wo dia a gi yé ’wo ga za ma ma.

⁹ Yé an boen gi é dan nana lɛ Gakelebale lé we ma, Yé an gi é dan nana lɛ, ’té éé giéan é glɛ ta, an Siéwegizan lé we ma.

¹⁰ An wɔlɛnu faa é dan a fe lɛ léé: Gakelebale, de ɛ bɔa Wenaanébɔmazan sile lɛ mi lé a plɛplɛ mini a ta, a lee, bélé bii zoo? De ɛ bɔa wenaanébɔmazan valé nyanégyɛzan sile lɛ, mi lé é alé fɛnu sia, azan lee, bélé bii zoo?

¹¹ Vié wenayezannu nwaan an ma; Yé wenu lé maa ’ka wo dɔɔa lo, woo wo laan an lee.

¹² Woo anlé wezin lɛi paan wenyané nya, An boen éé voo é pla.

¹³ Dé wa gyɛ kɛlɛna, an bɔlɔ zén an ta, Yé maa an boen kɛla kiéné lɔrɔ sɔnle nya, Yé an bazoroan an ’wuo vɔle nya an wuo.

¹⁴ An tawo drɔɔ bélé fɛan zo lé gyɛ a an béé ma; dé ’bɛ kaan lo, dé an bwe léé, a ma, a zo, Yé an vo é plinle bli kyɛ dɔle nya, bélé an bu ɛ ga.

¹⁵ Naa, dé an saan, wo gi éé nanaan yé wo zén ékeva, Woo zén‐é ékeva an ma trɔnné va, an sɔnɔle we ma; Wo ’ka daan an ma sɛrɛle ma lo.

¹⁶ Wo valé Kazambale lé zi ma wenyané fezannu, wo ’ka daan an ma we nanale ma lo. Woo wo suiɛ giéan ékema an ma.

¹⁷ Mizan, i dan daan lɛ wo naginile ma é pla bléyi kyɛn vaa? ’I an boen ta béli dɔ, wo lé woo an ma vɔɔan, wo lee. ’I anlé tɛrɛla ta béli dɔ golizra boronénu lee.

¹⁸ Maa dan i tɔ zin fe lɛ munu ’léé blɛn lé woo zén‐é ékeva, wo va. Maa dan i tɔ nwa lɛ munu ’léé di va.

¹⁹ Munu lé an sɛrɛ wo gi, ’té wo ke an nyanézannu nya, té wo gi é nana an ma lo, Yé munu lé woo an za paan é pla, té wo yara kplililii bo an ma, an sɔnɔle nya lo.

²⁰ Naa, vole drɔɔ dére ’ka wozé nya lo, Woo bɔn‐in bɔrɔan dabli kɛlɛle nya munu lé wo ke é nyanale tɛrɛ la drɔɔ, wo ma.

²¹ Woo wo ’léé fuoan an ma, A fele nya léé: I ya, i ya, ’ko, ka ye.

²² Gakelebale, ’i wo yé, té i vo é tadɔle lo. Mizan, té i si an ma baa lo.

²³ ’I vuo, ’i nwa, ’i anlé we ble. Anlé Bale, anzan, ’i dɔ an zuo.

²⁴ Gakelebale, anlé Bale, ’i anlé we ble ilé we tegele yɛrama. Té wo gi é nana anlé we ma lo.

²⁵ Té wa fe wo bli gi léé: I ya, ka ye, we lé ko ke a va, yee lo, lo. Té wa fe léé: Ko a mini, lo ma.

²⁶ Munu lé wo gi éé nanaan we tɔntɔn bɔle an ma we ma, Yara ’é wo faa gyɛ yé wo yuɛ ’é tana ma. Munu lé woo nwaan an ma, yara ’é wo gyɛ yé munu ’é serele bo wo ma ma.

²⁷ Yé munu lé an kɛlɛle nwiinplazan nya sɔ wo lɛ, Wo gi ’é nana, ginanale lé éé giéan é glɛ ta, a nya, Yé ’wo vo fena yifaama léé, Gakelebale lé é sɔ a lɛ léé, A wuozan é vo drɔɔ, ’wa tɔ nwa ma.

²⁸ Yé an nɛnɛ é dan ilé we tegele tɔ bié lɛ, É dan i tɔ zin fe lɛ yi faa do do ma.