Lɛrɛvɔ Sɛbɛ 34 - Kazambale lé Sebe Sauunu 1979

Wo Bale tɔ bɔ alé zin lé we ma

¹ David a vɔ bléyian va lé ébo kɛlɛ gwegyɛzan zo Abimélɛk ’lɛ yé ’bɛ a bin, a bléyi va.

² An dan Gakelebale drɔɔ vo lɛ bléyi faa va; Yé a tɔ zin fele é dan bɔra lɛ an ’léé yifaama.

³ Maa anbo tɔ bɔ Gakelebale gi, Wenaanébɔmazannu ’wo tɔné dɔ yé wo gi ’é nana ma.

⁴ ’I da, ko Gakelebale tɔ kɛlɛ blɛn ma. Kaa faa a tɔ bié ma.

⁵ An Gakelebale nagini, yé é we an zi; Wenu lé woo kana zén‐é an gi, é an si wo lee.

⁶ Dé mian nɔla a vazia yé é a nagini, a yara éé soian ginanale nya, Yé yara ’ka a gya yé é ’wuo vɔ é wuo lo.

⁷ Dé wenaanébɔmazan siaa, Gakelebale a dére maan, Yé éé a sié alé kleblelenu faa gi.

⁸ Munu lé woo kanaan Gakelebale lee, alé lanje éé yiié wo zi, Yé dé gawe bɔ wo ma, éé wo sié a gi.

⁹ Gakelebale a é zin fɛan zo, ’bé gi dan do yé i dan a ye lɛ. Mian éé yɔɔna naginian Bale va, azé a néné.

¹⁰ Ka‐an ka ke Gakelebale lé munu nya, ’ka kana a lee ma. Naa, munu lé woo kanaan a lee, we do ’ka dan vuru lɛ wo ma lo.

¹¹ Golizra boronénu ’ka dan fɛblele ye lɛ lo yé lɔrɔ é dan wo gyɛ lɛ, Naa, munu lé woo Gakelebale naginian, fɛ zima do kpen ’ka dan kle lɛ wo ma lo.

¹² An benu, ’ka da an va, ’ka tɔné dɔ an lɛ. An dan kanale Gakelebale lee paa lɛ ka gi.

¹³ É sɔ de ɛ lɛ léé, élé tɛrɛla é kɛlɛ nénéé? É sɔ de ɛ lɛ léé, é gi é nana yi kiɛre nyaa?

¹⁴ ’I yuɛ pa ibo va wenyané fele ma; Yé ’i yuɛ pa i lɔlu va dabli dérenu fele ma;

¹⁵ ’I si wenyané ma baa, yé ’i wezin kɛlɛ. ’I vole drɔɔ nagini yé ’i go a zuo ma.

¹⁶ Gakelebale yuɛ a mi tegelenu ta, Yé a tɔné a é dɔle wolé siaalenu lɛ.

¹⁷ Gakelebale éé yara yɔɔan mi nyanénu ma, Wo sele saanle munu faa gi we ma.

¹⁸ Dé mi tegelenu siaa, Gakelebale a maan, Yé éé wo sié wolé kleblelenu faa gi.

¹⁹ Munu lé wo bli kyɛ dɔ é baba, Gakelebale a wo sɔnɔ, Yé munu lé wo boen fuu si wo ta, éé wo sié we gi.

²⁰ We tɔntɔn éé bɔa mi tegelenu ma gɔnɔ kiɛre, Naa, Gakelebale éé wo sié ’bɛ we gi yifaama.

²¹ É ’é yuɛ paan é wɔlɛnu faa va, A wɔlɛ do kpen ’ka dan yéli lɛ lo.

²² We tɔntɔn éé mi nyané gya, Yé woo we lɛdɔa mi tegele nyanézannu gi.

²³ Gakelebale é ’é wuozannu boen sié we gi, Yé munu faa lé woo vɔa a zi, woo soo welɛdɔle wo gi lee.