Lɛrɛvɔ Sɛbɛ 33 - Kazambale lé Sebe Sauunu 1979

Bale tɔbɔ lɛrɛ

¹ ’Kaa mi tegelenu, ka gi ’é nana Gakelebale gi ma. Bale tɔ zin fele éé mi tegelenu nyɛɛan.

² ’Ka Gakelebale tɔ bié kɔnɔ gyɛle nya, ’Ka a tɔ bié, gitaa lé a bale ke vu, a nya.

³ ’Ka lɛrɛ dɛrɛ vɔ a lɛ. Kalé lɛrɛvɔafɛnu valé ka dérenu, ’wo wo ’ma ma.

⁴ Naa, Gakelebale dére a tegele, Yé alé nyanamanu faa lɛ éé sɔɔan yara palale nya.

⁵ We tegele valé we drɔle sɔ a lɛ; Gakelebale éé tɛrɛ faan élé zin nya.

⁶ Gakelebale dére lanu kɛlɛ, É lagi sunyanu faa kɛlɛ é ’léé fu nya.

⁷ É wɛyinu zén ékeva guru do gi, Gurunu lé wo ’ka wo wɔlɛma yé lo, é wo wɔra é ke la fɛdona.

⁸ Tɛrɛlamunu faa ’é kana Gakelebale lee ma. Tɛrɛlamunu faa ma ’é nyɔɔn a ’lɛ ma,

⁹ Naa, éé we fé, yé a we éé bɔa; Éé dére do fé, yé fɛ éé kɛla.

¹⁰ We faa lé bɛnnu woo gi daan a ma, Gakelebale a gi sɛra, Éé migɔnɔnu bɔngiwenu gi sɛra tata;

¹¹ Gakelebale gi danmawenu woo voo ana yifaama, Yé a bligiwenu woo voo ana mi kulu é kulunu va.

¹² Bɛn lé Gakelebale ke wolé Bale nya, wozé a néné. Migɔnɔ lé Bale wo si a va élé tɔnɔ nya, wozé a néné.

¹³ Gakelebale a la gi loru, ’té éé fɛ naginian, ’Té éé blaminu faa yé;

^14-15 Yee ɛ tɛrɛlamunu faa bli kɛlɛ, Yee ɛ ke wo faa kɛlɛwenu nayezan nya. Éé nyanaan élé fɛna ’Té éé tɛrɛlamunu faa naginian téiin.

¹⁶ Gulidanzannu kiɛre boen, wo ’ka minwiinzan sié we gi lo, Plɛplɛbozen é ’ka guliwuovolɛzan sié munu lee lo,

¹⁷ Mi sile we gi ’ka sié wisoo lé plɛplɛ va lo, Dé plɛplɛ a mi leeoo, ’bɛ ’ka a sié munu lee lo.

¹⁸ Bé ye, Gakelebale yuɛ a é dɔle munu lé woo kanaan a lee, wo ta, Munu lé wo bli ke alé zin lɛ, a yuɛ a wo va,

¹⁹ Léé, ’é woboen si gale lee, Yé ’é wo vo é yuɛma lɔrɔbléyi va.

²⁰ Koboen bli a Gakelebale lɛ; É a ko bɔvazan valé ko takuunzan nya.

²¹ Naa, alé we ma lé ko gi a é nanale, Naa, ko bli a é vole a tɔ sauun lɛ.

²² Gakelebale, ilé zin ’é vo ko ta ma, Naa, ko bli a bii ɛ lɛ.