Lɛrɛvɔ Sɛbɛ 32 - Kazambale lé Sebe Sauunu 1979

Wenyané fele valé zanté vɔle

¹ Bale tɔbɔlɛrɛ lé David a vɔ. Mian Bale a ma we vo alé bélidɔwe sɛrɛle ma, Yé é alé wenyanénu fwi, azé a néné.

² Mian Gakelebale ’ka weple dɔa a nwiin lo, Yé dabli ’ka a gi lo, azé a néné.

³ Bléyian va lé an vo é tadɔle, ’té an gaan an wɔlɛ gi. ’Té an dunnuan bladi fɔɔ nyanadi;

⁴ Naa, é béli valé é yiéyi i bɛ a é dɔrale an ta klilii, An fuu si an ta yé an ga bélé yɛrɛ gabléyi va fɛnu zo. Ka ye do.

⁵ Maa anlé wenyané bɔra i lɛ, an ’ka anlé weple yɔɔ lɛ lo. Maa léé, an dan anlé wesɛrɛlenu fe lɛ Gakelebale lɛ. Yé wenyané lé é an wɔlɛ gi nyaa an ma, bé fwi. Ka ye do.

⁶ ’Bɛ zo lé é a lé Bale lé zi sɔlɛmunu faa ’wo bazoro i lɛ wolé nyané blebléyi va. Dé ’yi blɛnnu nwɛɛn ’wo gɔnu ta, wo ’ka dan bɔ lɛ azan ma lo.

⁷ Bii a an yɔɔna nya, i an ta béli dɔ kleblele lee. I an zi lɛ sɔɔan guliwuo vo lɛ lɛrɛnu nya. Ka ye do.

⁸ Gakelebale léé: An dan we paa lɛ i gi, yé zi lé é a lé i tawo a ta, maa dan a gɔɔn lɛ i lɛ; An dan we pla lɛ i lɛ, maa dan an yuɛ pa lɛ i va.

⁹ Té ka kɛlɛ bélé wisoo valé sokofale lé, wo ’ka we dɔɔa lo, wo zo lo; Woo wo dɔa yé woo wo kunwo foliɛwɔlɛ lé é ke é vɔle wo ’léé, a nya, Té wo bié mi ma lo we gi.

¹⁰ Mi nyanénu lé nyanéblelenu a kiɛre Naa, mian éé paan Gakelebale ta, alé zin é dan a zi lɛ sɔɔ lɛ.

¹¹ ’Kaa mi tegelenu, ka gi ’é nana Gakelebale gi, yé ginanale lé a glɛ ’ka lo, ’é kɛlɛ ka gi ma. ’Kaa faa lé ka bli ke tegele, ’ka siaa gi nanale nya ma.