Lɛrɛvɔ Sɛbɛ 31 - Kazambale lé Sebe Sauunu 1979

Pale Bale ta lé bazorole

¹ David lɛrɛ ’ko vɔle gɔɔn lɛrɛvɔmunu ’lɛzan lɛ.

² Gakelebale, an vɔ i zi; Té yara an gyɛ pelo. Ilé we tegele ma, ’i an si munu lee.

³ ’I an ban i tɔné nya; ’I kɛlɛ an lɛ gɔlɛ lé éé an takuun‐an, a nya; yee valé kɔn plɛplɛ nya. Ana lé an sile we gi na yé.

⁴ Naa, i a anlé gɔlɛgɔ valé anlé guliyɔɔkɔn plɛplɛ nya; Yé i tɔ lé we ma i go an nya, ’té i zi gɔɔn‐an an lɛ.

⁵ Séli lé wa vɔ an ’lɛ, i dan an so lɛ a gi, Naa, i a an takuunzan nya.

⁶ Maa an léli bɛ pa i lee; Gakelebale, webozen fe Bale, i dan an si lɛ munu lee.

⁷ Miyilinu lé wo tɔnɔ ’ka lo, wo bɔmunu za a an gi. Yé maa anbo bɛ pa Gakelebale lee.

⁸ Ilé zin ma lé an gi é dan nana lɛ fɔɔ yé é gié é glɛ ta; Naa, i an ye nyanaizénlazan nya, yé bé gi dɔɔ léé, anboen a nyané blena.

⁹ I ’ka dan an vo lɛ an nyanézannu lee lo, I dan an vo lɛ anboma.

¹⁰ Gakelebale, ’i nyanai zén an ta, naa, maa a kleblena. An yara koo, an boen koo, an kɔlɛ koo, wo lɔrɔ nyaa bélé sɔwuli zo blikyɛdɔle nya.

¹¹ Nyané blele é anlé tɛrɛla lɔrɔ nyaa an ma, Yé blikyɛdɔle an yi kɛlɛ sɛ. Anlé weple kɛlɛle ma lé anlé plɛplɛ nyaa, Yé maa a gana an wɔlɛ gi.

¹² An mazannu faa an yé serelebomafɛ nya, An punmazannu an yé naaninvɔmafɛ nya; an béénu an yé kanamafɛ nya; Munu lé woo an yé béera, woo vlanburuwo an lee.

¹³ An sele éé saan munu gi bélé mi lé é ga, a zo. Maa a bélé bɔple zo.

¹⁴ Maa an sɔnɔzannu dére maan, Di kini munu gi fɛfaana. Dé wo zén ékeva an ma weblele we ma Woo dére paan do an gyɛle we ma.

¹⁵ Gakelebaleoo Bale, maa anbo bɛ paan bii ɛ lee. Maa léé, bii a anlé Bale nya.

¹⁶ An yinu a bii ɛ lee; ’I an si an nyanézannu valé nyané pa antazannu lee.

¹⁷ ’I yara soi maa, i wuozan va ma, ’I an si we gi ilé zin nya.

¹⁸ Gakelebale, dé maa i tɔ laa té yara an gyɛ lo. Yara ’é mi nyanénu gyɛ ma, ’Wo zun mi galenu nyanana ’wo lɔlu lɛ tanle nya ma.

¹⁹ Kwakwa ’é vɔ viéwolɔlunu ta ma, Yuɛma plɛplɛ lɔlunu lé woo we fé mi tegele ma, Boblɛn naané valé serele bole nya, kwakwa ’é vɔ wo ta ma.

²⁰ Ilé zin a blɛɛn; Bé tadɔa munu lé woo kanaan i lee, wozé nya, Yé bé no munu lé woo yɔɔna naginian i va, wo lɛ, Blaminu yuɛ va.

²¹ Bii ɛ wo yɔɔan i bɛ wuo nyanépawotamunu lee, Dérenu lé wa fé wo ma, bii ɛ wo takuun‐an wo lee ilé kɔn gi.

²² Gakelebale drɔɔ ’é vo ma. É élé zin kɛlɛ an lɛ, Bélé fɛan zo lé maa a fla plɛplɛ la, a zo.

²³ Nyɛ zén an gi bléyian va, maa léé: Wo an bin i yara ma baa. Naa, dé an siaa i lɛ I anlé nyanainya dére ’ma.

²⁴ ’Kaa‐an ka sɔ Gakelebale lɛ, Gakelebale ’é sɔ ka lɛ ma. Gakelebale éé yarapawelazannu tabin‐é; Yé éé we lɛdɔa boblɛnzannu gi plɛplɛ.

²⁵ Ka faa lé ka bli ke Gakelebale lɛ, ’Ka dɔ gligli yé ka bli ta dɔ plɛplɛ ma.