Lɛrɛvɔ Sɛbɛ 27 - Kazambale lé Sebe Sauunu 1979

Bale bɔle lé bazorole

¹ David zé lé. Gakelebale a an vakinizan nya, é a an Siéwegizan nya. Maa kanaan de ɛ lee? Anlé tɛrɛla a Gakelebale lee; ’Té de lee lé an kanaan?

² Dé mi nyanénu bié an ma, an minile we ma, Nyané pa antazannu valé an nyanézannu Wo ɛ sɔné éé saan yé woo ɛ diaan.

³ Dé guli dan sunyanu da yii lɛ an ma Kana ’ka dan zén lɛ an gi kiéné boenwo lo; Dé wo nwa an ma gulidanle nya, An bli é dan vo lɛ Bale lɛ duowo.

⁴ We do lé an bli ke é bɔle a ma é baba, ’té maa a laan Gakelebale lee: Yee lé ke léé, an nyana Gakelebale lé kɔn gi anlé tɛrɛla faa gi, Gibɔrɔle Gakelebale tɔ blɛn ma we gi, Yee valé alé kɔn ze vɔle we ma.

⁵ Naa, é dan an takuun lɛ élé kɔn gi we tɔntɔn bɔyi nya, É dan an yɔɔ lɛ élé kɔn gi, É dan an dɔ lɛ gɔlɛ ta loru.

⁶ Yé sin, é an ’wuo nwa an nyanézannu lé wo an zi lɛ sɔɔ, wo ta; Maa dan saraka bo lɛ a lɛ alé sɔkɔn gi, béli fɛnle nya; An dan Gakelebale tɔ bié lɛ lɛrɛvɔle nya.

⁷ Gakelebale, ’i tɔné dɔ an dére lɛ; maa i laama, ’I nyanai zén an ta, yé ’i anlé bazoro dére ’ma.

⁸ Gakelebale lé an bli gi léé, maa ’é yara gini. Gakelebaleoo Bale, maa a i yara ginina.

⁹ Té i yara yɔɔ an ma pelo, Té i wuozan si i ma i bliflile nya lo. An Siéwegizan Bale, Bii a an bɔavazan nya, té i an vo lo, té i sɔn vɔ an ma lo.

¹⁰ Dé an ti valé an bu sɔn vɔ an ma, Gakelebale é dan an si lɛ.

¹¹ Gakelebale, ’i kɛlɛwenu paa an gi, ’I go an nya zi tegele ta An nyanézannu lé we ma.

¹² Té i an vo an mazannu lee yé wo ’wolé blibɔmawe kɛlɛ an lɛ lo, Naa, viéwenayezannu éé nwaan an ma, Wo valé munu lé wa a va léé, ’wo kle pa an ta, wo nya.

¹³ Dé an ’ka é pale a ta léé, maa Gakelebale lé zin yé tɛrɛ la ’ko lo ’naan, ’Té maa kɛla kaa?

¹⁴ ’I bli vo Gakelebale lɛ. ’I dɔ gligli, yé ’i bli ta dɔ plɛplɛ ma. ’I bli vo Gakelebale lɛ.