Lɛrɛvɔ Sɛbɛ 25 - Kazambale lé Sebe Sauunu 1979

Zi gɔɔnle valé mi tabinle ma bazorole

¹ David zé lé. Gakelebale, anboen éé nwaan bii ɛ vazia.

² Anlé Bale, an paan bii ɛ ta, té yara an gyɛ lo ma. Té an nyanézannu gi é nana anlé we ma lo ma.

³ Munu faa lé wo bli ke i lɛ, wo fuu ’ka dan si lɛ wo ta lo. Munu lé wo yuɛ gi éé blaan é boa Wo ɛ fuu é dan si lɛ wo ta.

⁴ Gakelebale, ’i an bɔn‐in kini i zuo tawobɛnu ma, ’Ilé zinu tawe paa an gi.

⁵ ’I go an nya ilé webozen lé zia yé ’i we paa an gi. Naa, i a an Siéwegibale nya, Bii ɛ lɛ lé an bli ke yifaama.

⁶ Gakelebale, i nyanai zénle valé ilé zin sele ’é dɔ i gi ma, Naa, wo ’ka nyaan lo.

⁷ An boroné la saanlenu valé ilé bélidɔwe lé maa sɛrɛ, té wo sele é dɔ i gi lo ma. An sele ’é dɔ i gi ilé nyanaizénle yɛrama, Oo Gakelebale, ilé zin lé we ma.

⁸ Gakelebale a é zima; é a tegele; Amalé éé zi nagɔɔn‐an wenyanékɛlɛzannu lɛ.

⁹ Éé goo bokiénézannu nya wetegele lé zia, Éé élé zi tawe paan bokiénézannu gi.

¹⁰ Gakelebale lé zinu faa a nyanaizénle valé yarapale we la zinu nya, Munu lé woo alé gipawe kɛla yé ’té wa sɔnnénu paan, wo lɛ.

¹¹ Oo Gakelebale, i tɔ lé we ma ’I an mawe vo anlé weple ma, naa, é a blɛn.

¹² Mi kyɛn ɛ kanaan Gakelebale lee? Zi lé é a lé é a si a va ézé nya, Gakelebale a gɔɔn‐an a lɛ.

¹³ A boen é dan nyana lɛ gi nanale gi, Yé tɛrɛla é dan kɛlɛ lɛ a kulunu zé nya.

¹⁴ Munu lé woo kanaan Gakelebale lee, é a wo béé nya, Yé éé wo bɔn‐in kinié élé gipawe ma.

¹⁵ An yuɛ a yifaama Gakelebale lɛ, Naa, é dan an ganenu si lɛ séli gi.

¹⁶ ’I an nagini yé ’i nyanai zén an ta, Naa, wo an vo an do yé maa a wenaanébɔmazan nya.

¹⁷ Anlé nyané blɛn blele gi gyɛ an bli gi; ’I an si anlé kleblele gi.

¹⁸ An kɛlɛ nyanaizénlazan nya anlé nyanéblele gi fɛan zo, bé ye do, Yé ’i an ma we vo anlé wenyanénu faa ma.

¹⁹ An nyanézannu a kiɛre fɛan zo, bé ye do, Yé wa an zuo binna zapale naané nya fɛan zo, bé ye do.

²⁰ Dé maa an yɔɔna gini i sɔnɔ, ’I yuɛ pa anboen va yé ’i an si we gi. Té yara an gyɛ lo we ma.

²¹ Dé an bli kɛlɛ i lɛ, An nwiin pla valé anlé wedrɔle ’wo an ta béli dɔ ma.

²² Baleoo, Bale, ’i Izraɛl si Wolé kleblelenu faa gi.