Lɛrɛvɔ Sɛbɛ 22 - Kazambale lé Sebe Sauunu 1979

Nyanéblele lee siaale — Bale tɔbɔlɛrɛ vɔle

¹ Lɛrɛ lé David a vɔle gɔɔn lɛrɛvɔmunu ’lɛzan lɛ. ’Wa vɔ lɛrɛvɔafɛ lé wa laama tukinile lé vɔlɛ, a va.

² Anlé Bale, anlé Bale, mɛmalé i an vo an doo? Yé i si an va yé i go yé i ’ka bɔa an va lo, yé i ’ka tɔné dɔa an dunnulenu lɛ loo?

³ Anlé Bale, an siaan i lɛ é yiéyi, yé i ’ka a zi vɔa lo; Dé é a béli nyaoo, an ’ka flin‐é pelo.

⁴ Naa, i a sauun duowo, I nyanaan Izraɛlmunu lé i tɔzinfele méléna.

⁵ Ko tranu pa bii ɛ ta; Wo pa i ta yé i wo si munu lee.

⁶ Wo siaa bii ɛ lɛ, yé i wo si wenu gi; Wo pa bii ɛ ta, yé yara do kpen ’ka wo gyɛ lɛ lo.

⁷ Yé maa, maa ’ka mi nya lo, maa a blibli nya. Munu éé serele boo an ma yé woo an yé boami nya.

⁸ Munu faa lé woo an yé, woo an ma we nanaan, Woo yéri sié an ma, ’té woo ’wuo nyɔɔn‐an an ma.

⁹ Ébo bɛ pa Gakelebale lee. Gakelebale a si we gi ma. É dan a si lɛ munu lee; é sɔ a lɛ, azama.

¹⁰ Iin, i an bɔra an bu bɔn gi, I dɔ an zi, ’té maa a an bu nyɔ ma;

¹¹ An bɔra bléyian va an bu bɔn gi, ’té i an tabin‐é fɔɔ kyɔ, Wo an yaa yian nya, ’té i a anlé Bale nya fɔɔ kyɔ.

¹² Dé kleblele bɔ an ma, Dé mi do kpen ’ka da lɛ bɔ lɛ an va lo, té i si an ma baa lo.

¹³ Dirigɔné kiɛre a é dirile an zi. An zi lɛ a é sɔɔle Bazan dirigɔnénu nya.

¹⁴ Woo ’léé fuoan an ma Bélé golizra lé éé fɛ wi kinié ékema, ’té éé siaan, a zo.

¹⁵ Maa a bélé ’yi lé éé yoroan, a zo, Yé an wɔlɛnu faa éé kinié ékema; An bli a bélé zɔrɔnyɔnɔ pa zo, Yé a ’yi éé boo an bɔn‐in.

¹⁶ Anlé plɛplɛ nyaa, maa a tɔɔtɔɔ, Yé an nɛnɛ kua an lagolo ma, I an vo gale lé vun va.

¹⁷ Blénnu an zi lɛ sɔɔan, Wenyanékɛlɛzannu diri an zi, Wo an bɛnu valé an ganenu fɔn.

¹⁸ An bɔa an wɔlɛnu faa nɔnɔle lɛ. Wo vo an naginina, ’té wo yuɛ a an va;

¹⁹ Wo anlé sɔnu guli ’wo ke ma, Yé wo ’munnu zun anlé varɔ grɔgrɔ ma.

²⁰ Yé bii Gakelebale, té i si an ma baa lo. Biian i ke anlé plɛplɛ nya, ’i da, ’i bɔ an va é kele.

²¹ ’I an boen takuun gwɔun lee, ’I an vole é yuɛma takuun blénnu lé plɛplɛ lee.

²² ’I an si golizra lɔ ma, ’I an si du bélinu ’léé.

²³ Maa dan i tɔ zana dɔɔ lɛ an bwenu va, Maa dan i tɔ nwa lɛ zén‐ékevamunu méléna.

²⁴ Ka lé ka kanaan Gakelebale lee, ’ka a tɔ zin fe. Ka faa lé ka ke Jakɔb kulu nya, ’ka a tɔ zin bɔ. Ka faa lé ka ke Izraɛl kulu nya, ka ma ’é nyɔɔn a ’lɛ.

²⁵ Naa, é ’ka serele bo lɛ nyanaizénlazan lé nyanéblele ma lo, yé é ’ka a ye lɛ boawe nya lo. Yé é ’ka é yara yɔɔ lɛ a ma pelo; Naa, dé é siaa a lɛ bléyian va, éé tɔné dɔa a lɛ.

²⁶ Bii tɔ zin lé maa dan a fe lɛ zén‐ékevamunu gu blɛn va; Maa dan anlé Bale kunle lɛ sɔɔ lɛ munu lé woo kanaan i lee, wo yuɛ va.

²⁷ Wenaanébɔmazannu wo dan fɛ ble lɛ yé wo dan kan lɛ, Munu lé woo Gakelebale naginian, wo dan a tɔ nwa lɛ. Ka bli ’é vo é yuɛma yifaama ma.

²⁸ Munu lé wo ke tɛrɛ faa glɛ sina, wo dan ’wo bɔn‐in bɔrɔ lɛ Gakelebale ma, yé wo dan nɔla lɛ a vazia; Bɛn gi munu é dan dia lɛ i ’lɛ.

²⁹ Naa, plale mi nwiin a Gakelebale zé nya; Éé plaan bɛnnu nwiin.

³⁰ Tɛrɛlami blɛnnu faa é dan fɛ ble lɛ yé wo dan dia lɛ é ziin i ’lɛ; Munu faa lé woo zunwo vun va, wo dan wo ’wuo tua lɛ i ’lɛ, Munu lé wo ’ka bɔa vole lɛ é yuɛma lo, woo lé.

³¹ Mi kulunu é dan a bɔ lɛ, Munu é dan Mizan lé we fe lɛ mi kulunu lé wo ’ka tan wo yaa lɛ lo, wo lɛ.

³² Mi kulunu ’ko, dé wo da bléyian va, wo dan Mizan lé wetegele zuo fe lɛ, Wo dan alé nyanama zuo fe lɛ migɔnɔ lé wo wo yaa é dɛrɛ, wo lɛ.